Mensahe sa Unang Kapangulohan
Pabalik-balik sa Giagian
Nakadungog na ba mo sa karaang panultihon nga ang mga tawo nga nasalaag kalagmitan magbalik-balik sa giagian?
Si Jan L. Souman, usa ka German nga psychologist, gustong motino gamit ang siyensya kon tinuod ba kini. Siya nag-eksperimento og pipila nga Iyang gidala sa dakong kalasangan ug sa Sahara desert ug gigamit ang global positioning system sa pag-monitor asa sila moadto. Sila walay kompas o bisan unsa nga himan. Yano lang ang mga instruksyon ngadto kanila: maglakaw sa tul-id nga direksyon sama sa gipahibalo.
Sa wala madugay si Dr. Souman mihulagway unsay nahitabo. “[Pipila] kanila milakaw nga dag-umon ang panahon, nga ang adlaw nasalipdan sa mga panganod [walay mga reference point nga makita]. … [Sila] nagbalik-balik lang, [pipila] kanila kadaghang mibalik sa ilang giagian nga wala makamatikod niini. ”Ubang mga partisipante naglakaw samtang sanag ang adlaw, nga adunay makita nga lagyo nga mga reference point. “Sila … nagsubay sa hapit hingpit tul-id nga agianan.”1
Kini nga pagtuon gibalik usab sa uban gamit ang lain-laing pamaagi.2 Ang tanan susama og mga resulta.
Kon walay makitang mga timaan, ang mga tawo kalagmitan magbalik-balik sa giagian.
Ang Timaan diha sa Kasulatan
Kon walay espirituhanong mga timaan, ang mga katawhan mahisalaag usab. Kon wala ang mga pulong sa Dios, kita maglakaw pabalik-balik sa giagian.
Isip mga indibidwal ug katilingban, makita nato kini nga sumbanan nga pabalik-balik sa matag dispensasyon sukad sa sinugdanan sa panahon. Kon mawala kanato ang mga pulong sa Dios, kita may kalagmitan nga mahisalaag.
Sa walay pagduha-duha kini ang rason nga ang Ginoo misugo kang Lehi nga pabalikon iyang mga anak ngadto sa Jerusalem para sa mga palid nga tumbaga. Ang Dios nasayud nga ang mga kaliwat ni Lehi magkinahanglan og masaligang mga timaan— mga points of reference—nga makagiya nila sa pagtino kon sila ba anaa sa saktong agianan.
Ang mga kasulatan mao ang mga pulong sa Dios. Kini ang mga timaan sa Dios nga mopakita sa dalan nga atong agian aron mas maduol sa atong Manluluwas ug makab-ot ang angayang mga tumong.
Ang Timaan diha sa Kinatibuk-ang Komperensya
Ang mga instruksyon nga gipamulong diha sa kinatibuk-ang komperensya laing mga timaan nga makatabang nato nga masayud kon kita anaa ba sa saktong agianan.
Usahay mangutana ko sa akong kaugalingon, “Naminaw ba ko sa mga gipamulong diha sa labing bag-o nga kinatibuk-ang komperensya sa Simbahan? Ako ba nakabasa ug mibalik og basa sa ilang mga pulong? Ako ba namalandong niini ug migamit niini sa akong kinabuhi? O nalingaw lang ba ko sa maayong mga pakigpulong ug wala gamita ang ilang dinasig nga mga mensahe sa akong kinabuhi?”
Tingali samtang naminaw o nagbasa mo, misulat mo og mubong mga sulat. Tingali mipasalig mo sa pagbuhat og pipila ka butang nga mas maayo o lahi. Hunahunaa lang ang mga mensahe sa miaging kinatibuk-ang komperensya. Kadaghanan niini nag-awhag nato sa paglig-on sa atong pamilya ug pagpalambo sa atong kaminyoon. Kini nga isyu sa Liahona nag-focus usab niining mahangturong mga mithi, nga may daghang praktikal nga rekomendasyon sa pagpanalangin sa atong kinabuhi.
Kita ba nagtimaan ug naggamit niining bililhon nga tambag? Kita ba nakabantay ug naglakaw padulong niining tinuod ug bililhong mga timaan?
Ang Tambal sa Espirituhanong Pagkawala
Ang mga espirituhanong timaan kinahanglanon aron magpabilin kita sa higpit ug pig-ot nga dalan. Kini mohatag og klaro nga direksyon asa kita angayng moadto—kon kita moila niini ug maglakaw paingon niini.
Kon kita modumili nga magiyahan niining mga timaan, mawala ang kahulugan niini, pangdekorasyon na lang nga walay katuyoan gawas lang sa panglingaw sa kinabuhi.
Dili paigo nga magiyahan lang sa atong kaigmat [instincts].
Dili paigo nga aduna ray labing maayo nga mga intensyon.
Dili mahimo nga magsalig lang sa atong natural nga mga balatian.
Bisan kon kita naghunahuna nga kita nagsunod sa espirituhanon nga dalan, kon walay tinuod nga mga timaan sa paggiya kanato—walay giya sa Espiritu—kita mahisalaag.
Busa, bukahon nato atong mga mata ug lantawon ang mga timaan sa atong manggiloloy-ong Dios nga giandam alang sa Iyang mga anak. Kita mobasa, maminaw, ug mogamit sa pulong sa Dios. Kita mag-ampo uban sa tinuod nga katuyoan ug maminaw ug mosunod sa mga aghat sa Espiritu. Kon atong ilhon ang langitnong mga timaan nga giandam sa atong mahigugmaong Langitnong Amahan, kita mosubay gyud niini. Kinahanglan usab nga kanunay natong korihian ang atong padulngan samtang atong gitumong ang atong mga kaugalingon ngadto sa espirituhanong mga timaan.
Niini nga paagi, kita dili maglakaw pabalik-balik sa giagian apan maglakaw nga may pagsalig ug kasiguroan paingon nianang langitnong panalangin nga katungod sa pagkapanganay sa tanan kinsa naglakaw diha sa tul-id ug pig-ot nga dalan sa pagkatinun-an ni Kristo.
Pagtudlo niini nga Mensahe
Samtang kamo mangandam sa pagtudlo niini nga mensahe, kamo makasiksik sa mga kasulatan alang sa mga ehemplo sa mga tawo kinsa gigiyahan sa espirituhanong mga timaan o sa mga tawo nga nahisalaag.Makasugod mo sa inyong pagtuon gamit niining mga kasulatan: Numeros 14:26–33; 1 Nephi 16:28–29; Alma 37:38–47. Kon kamo giaghat, makapaambit mo og mga ideya gikan niining mga ehemplo ngadto sa inyong gitudloan. Pangutan-a sila kon unsa ang atong makat-unan gikan niini nga mga istorya.
Litrato sa © Thinkstock/iStockphoto