Shkoni Pas Gjurmëve të Tij

Nga Melisa Zenteno

Revistat e Kishës

Të bërit si Shpëtimtari është një proces gradual e për tërë jetën dhe ju mund të filloni duke ndërmarrë hapa të vegjël çdo ditë.

Shkrimet e shenjta na nxisin të bëhemi si Jezu Krishti dhe “të ec[im] edhe vetë sikurse ka ecur ai” (1 Gjoni 2:6). Por ndërmarrja e atij hapi të parë mund të jetë e vështirë – sidomos kur nuk dini se si t’ia filloni.

Ju do të gjeni ndihmë te manuali Predikoni Ungjillin Tim: Një Udhëzues për Shërbimin Misionar. Ju mund të mendoni se është thjesht një manual për misionarët kohëplotë, por në fakt është një mjet i mrekullueshëm që mund t’ju ndihmojë të filloni punën për synimin tuaj për t’u bërë si Shpëtimtari. Kapitulli 6 është hartuar për t’ju ndihmuar juve të kuptoni dhe zbatoni nëntë cilësi të veçanta si të Krishtit.

Ja tek janë disa sugjerime për mënyrën se si ta përdorni manualin Predikoni Ungjillin Tim dhe shkrimet e shenjta ndërsa kërkoni të zhvilloni cilësi si të Krishtit:

• Për të filluar shkoni tek Aktiviteti i Cilësive në fund të kapitullit 6 te Predikoni Ungjillin Tim (faqe 130). Ky aktivitet mund t’ju ndihmojë të përcaktoni se cilat cilësi janë aktualisht forcat tuaja shpirtërore dhe me cilat duhet të punoni.

• Pas përfundimit të aktivitetit, zgjidhni me lutje një cilësi ku të përqendroheni. Merrni parasysh leximin e seksionit në kapitullin 6 rreth asaj cilësie.

• Vendosni synime të veçanta e të matshme që do t’ju ndihmojnë ta zhvilloni këtë cilësi. Jepini vetes një afat kohor për të punuar për atë synim. Më pas, vlerësoni përparimin tuaj. Për shembull, nëse po përpiqeni të keni më shumë dashuri hyjnore, ju mund të vendosni një synim për të thënë gjëra pozitive rreth vëllait ose motrës suaj tri herë çdo ditë për një javë. Në fund të javës, ju do të vlerësoni se si ia dolët me synimin tuaj dhe do të bëni rregullime që do t’ju ndihmojnë të vazhdoni të përmirësoheni.

• Predikoni Ungjillin Tim siguron shkrime të shenjta që t’i studioni me secilën cilësi. Ju mund t’i studioni me lutje shkrimet e shenjta të renditura dhe t’i shkruani përshtypjet që merrni teksa lexoni.

• Kërkojini ndihmë Atit Qiellor që të zhvilloni një karakter si të Krishtit. Kërkoni ndihmë të veçantë si: “Të lutem më jep forcë për të mposhtur zemërimin tim kur motrat dhe vëllezërit më marrin gjërat e mia”. Sa më specifike të jenë lutjet tuaja, aq më e lehtë do të jetë për ju që të njihni përgjigjet e Zotit.

Të bërit si Shpëtimtari ynë, Jezu Krishti, është një proces gradual dhe një përpjekje e tërë jetës. Ndonjëherë mund të duket më e vështirë se fizika e përparuar. Por mos u dëshpëroni. Zoti na premton: “Ai [ose ajo] që merr dritë e vazhdon në Perëndinë, merr më shumë dritë; dhe ajo dritë shkëlqen gjithnjë e më shumë, derisa dita është e plotë” (DeB 50:24). Ndërsa marrim, studiojmë dhe zbatojmë dritë e të vërtetë dhe vazhdojmë të ndjekim Perëndinë çdo ditë, ne mund të sigurohemi se do të bëhemi më shumë si Shpëtimtari ynë, Jezu Krishti.

Seeking the One [Duke Kërkuar njërin], nga Liz Lemon Swindle, nuk lejohet kopjimi; ilustrim me foto © Shayla Marie Fursov; sfondi © iStock/Thinkstock; filigranë © Hemera/Thinkstock

Detyrat e Përditshme

Veprimet e vogla e të përditshme janë gjurmë përgjatë shtegut për t’u bërë si Shpëtimtari ynë. Merrni parasysh këto aktivitete të tjera që ju ndihmojnë të zhvilloni cilësi si të Krishtit:

• Lexoni shkrimet e shenjta të renditura tek Udhëzuesi për Shkrimet e Shenjta që lidhen me cilësinë që po kërkoni të zhvilloni.

• Lutuni çdo ditë për dëshirën për të ndryshuar dhe forcën për t’u përmirësuar.

• Mbani një ditar për të shkruar përparimin tuaj.

• Flisni me prindërit tuaj. Vërini në dijeni për synimet tuaja në mënyrë që të mund t’ju ndihmojnë.

Lidhja në Bashkëbisedim

Gjatë gjithë muajit tetor, ju do të jeni duke studiuar rreth mënyrës se si të bëheni më shumë si Krishti (nëse lagjja ose dega juaj i ka mësimet e reja në gjuhën tuaj). Pasi ta lexoni këtë artikull, zgjidhni me lutje një cilësi që të punoni këtë javë ose muaj. Ju mund të vendosni një synim dhe më pas të vlerësoni përparimin tuaj. Për shembull, a ishit më shumë dashamirës ose më të bindur apo më të duruar? Si ju ndihmoi synimi juaj për t’u bërë më shumë si Krishti që të mposhtni vështirësitë? Merrni parasysh të ndani përvojën tuaj me të rinj të tjerë ose me familjen tuaj.

Mësime të së Dielës

Tema e Këtij Muaji: Të Bërit më Shumë si Krishti