Mensahe sa Unang Kapangulohan
Moserbisyo sa Ginoo Inubanan sa Gugma
Ang Ginoong Jesukristo mitudlo, “Bisan kinsa nga buot magpatunhay sa iyang kinabuhi kawagtangan hinoon siya niini: ug bisan kinsa nga magawagtang sa iyang kinabuhi tungod kanako, magapatunhay niini” (Lucas 9:24).
“Ako nagtuo,” miingon si Presidente Thomas S. Monson, “nga ang Manluluwas nagsulti kanato nga gawas kon kalimtan nato ang atong kaugalingon diha sa pagserbisyo sa uban, adunay gamay ra nga katuyoan sa atong kaugalingong kinabuhi. Kadtong kinsa nagpakabuhi lamang alang sa ilang kaugalingon sa katapusan maminusan ang ilang pagkatawo ug sa mapasumbingayon nga paagi mawagtangan sa ilang kinabuhi, samtang kadtong nahikalimot sa ilang kinabuhi diha sa pagserbisyo sa uban motubo ug molambo—ug sa ingon moluwas sa ilang kinabuhi.”1
Sa mosunod nga mga kinutlo gikan sa pangalagad ni Presidente Monson, siya nagpahinumdom sa mga Santos sa Ulahing mga Adlaw nga sila mga kamot sa Ginoo ug ang mga panalangin sa kahangturan nagpaabut niadtong matinud-anong moserbisyo sa uban.
Pagserbisyo diha sa Templo
“Dakong serbisyo ang mahatag kon kita mobuhat sa mga gitugyan nga mga ordinansa niadtong kinsa miagi lapas sa tabil. Sa kasagaran kita wala makaila niadtong kinsa atong gihimoan sa buluhaton. Kita wala magpaabut nga pasalamatan, ni kita adunay kasigurohan nga ilang dawaton ang atong gitanyag ngadto kanila. Bisan pa niana, kita nagserbisyo, ug tungod niana nga paagi kita nakaangkon nianang diin moabut nga walay laing paningkamot: nga sa tinuod mahimong mga manluluwas sa Bukid sa Zion. Sama sa atong Manluluwas nga mihatag sa Iyang kinabuhi isip puli nga sakripisyo alang kanato, sa ingon kita, bisan sa gagmay nga paagi, mobuhat og sama kon kita mohimo og puli nga buluhaton sa templo alang niadtong kinsa walay pamaagi sa pagpadayon sa unahan gawas kon adunay usa ka butang nga gibuhat alang kanila pinaagi kanato nga ania dinhi sa yuta.”2
Kita ang mga Kamot sa Ginoo
“Akong mga kaigsoonan, gilibutan kita niadtong nanginahanglan sa atong pagtagad, atong pagdasig, atong suporta, atong paghupay ug atong kamabination—mga sakop man sila sa pamilya, mga higala, mga kaila, o mga estranghero. Kita ang mga kamot sa Ginoo dinhi sa yuta, uban sa mando nga moserbisyo ug motabang sa Iyang mga anak. Nagdepende Siya sa matag usa kanato. …
“Kana nga serbisyo diin kitang tanan gitawag mao ang serbisyo ni Ginoong Jesukristo.”3
Nagsunod sa Serbisyo sa Manluluwas
“Sa Bag-ong Kalibutan, ang nabanhaw nga Manluluwas mideklarar, ‘Kamo nasayud sa mga butang nga kamo kinahanglan gayud nga mobuhat diha sa akong simbahan; kay ang mga buhat nga kamo nakakita nga Ako mihimo kana kamo mobuhat usab’ [3 Nephi 27:21].
“Kita nagpanalangin sa uban samtang kita nagsunod sa serbisyo ni ‘Jesus nga taga-Nazaret … nga nagpangadto-ngadto sa paghimog mga kaayohan’ [Mga Buhat 10:38]. Ang Dios mopanalangin kanato nga makakaplag og hingpit nga kalipay sa pagserbisyo sa atong Amahan sa Langit samtang kita nagserbisyo sa Iyang mga anak dinhi sa yuta.”4
Ang Panginahanglan sa Pagserbisyo
“Kinahanglan kitang hatagan og higayon nga moserbisyo. Sa mga miyembro nga dili na aktibo o nagpanagana nga mahimong aktibo, kita mainampoong makapangita og paagi sa pagtabang nila. Ang paghangyo nila sa pagserbisyo basin maoy makapadasig nila nga kinahanglan silang mag-aktibo. Apan ang mga lider nga makatabang unta nila usahay magduhaduha sa pagbuhat niini. Atong hinumduman nga mahimo nga mausab ang mga tawo. Mahimo nilang talikdan ang ngil-ad nga mga kinaiya. Makahinulsol sila sa mga kalapasan. Makahupot sila nga takus sa priesthood. Ug makaserbisyo nga makugihon sa Ginoo.”5
Gihimo Ba Nato ang Tanan?
“Ang kalibutan nagkinahanglan sa atong tabang. Gihimo ba nato ang tanan? Gihinumduman ba nato ang mga pulong ni Presidente John Taylor: ‘Kon kamo dili mopalambo sa inyong balaang mga tawag, ang Dios mohimo kaninyong responsable alang niadtong kinsa mahimong inyo untang maluwas kon kamo naghimo pa sa inyong katungdanan’? [Mga Pagtulun-an sa mga Presidente sa Simbahan: John Taylor (2001), 201]. Adunay mga tiil nga pabarugon, mga kamot nga tabangunon, hunahuna nga awhagon, kasingkasing nga dasigon, ug mga kalag nga luwason. Ang mga panalangin sa kahangturan naghulat kaninyo. Inyo ang pribilehiyo nga dili lang tigtan-aw apan partisipante sa pagserbisyo. …”6
Pagtudlo Niini nga Mensahe
“Kon [kamo] adunay gugma nga sama kang Kristo, mahimo [kamo] nga mas andam sa pagtudlo sa ebanghelyo. Mahimo [kamo] nga madasig sa pagtabang sa uban nga makaila sa Manluluwas ug mosunod Kaniya.”7 Ikonsiderar sa pag-ampo nga madugangan ang gugmang putli niadtong inyong gibisitahan. Samtang nagpalambo kamo og sama kang Kristo nga gugma alang kanila, kamo mas makaserbisyo sa makahuluganong paagi sa Ginoo ug niadtong inyong gitudloan.