Naʻá ku Ongoʻi ʻa e Laumālié
“Pea naʻe pehē ʻe Sīsū, ʻoua ʻe taʻofi, kae tuku ke haʻu kiate au ʻae tamaiki īkí: he ʻoku ʻo e kakai peheé ʻa e puleʻanga ʻo e langí” (Mātiu 19:14).
ʻOku ou manatuʻi ha ongo kiʻi meʻa faingaofua naʻe hoko ʻi heʻeku kei siʻí. ʻOku fakahaaʻi ʻe he meʻa takitaha ʻa e ongo ʻa e Laumālié ki lotó ʻi ha ngaahi founga makehe ʻo tatau ai pē ko e hā hotau taʻu motuʻá.
Naʻe hoko ʻa e meʻa ʻuluakí ʻi he taimi naʻe puke ai hoku tokouá. Naʻe telefoni ʻeku tamaí ki ha tangata mei homau uōtí ke haʻu ki homau ʻapí ʻo tokoni ʻi hono foaki ha tāpuaki ʻo e lakanga fakataulaʻeikí. ʻI he fakataha mai homau fāmilí kimuʻa he tāpuakí, naʻe fokotuʻu mai ʻe he tangatá ʻoku totonu ke mavahe ʻa kimautolu fānaú he mahalo te mau maumauʻi ʻa e laumālie ʻo e tāpuakí. Ne tali loto vaivai mai ʻeku tamaí naʻe mahuʻinga ke ʻi ai e fānaú kotoa lolotonga e tāpuakí koeʻuhí he naʻe fie maʻu ʻemau tui haohaoá. ʻI he toʻu ko iá, ne ʻikai ngata ʻi heʻeku ongoʻi ʻa e ʻi ai ʻa e Laumālié, ka ne u ongoʻi foki ʻa e ʻofa lahi ʻeku tamaí ki heʻene fānaú. Ne tokoni ʻeku tangataʻeikí ke u tui pea maʻu ha mahino ki he ʻofa ʻa e Tamai Hēvaní kiate aú.
Hili ha ngaahi taʻu mei ai, ne kau atu homau fāmilí ʻi ha houalotu sākalamēnití. Ko ha tokotaha talēnitiʻia ʻa ʻeku faʻeé ʻi he mūsiká. Neongo ia, naʻe ʻikai ke hiva ia ka naʻá ne foaki kiate au mo hoku ngaahi tokouá ha faingamālie ke mau hiva. ʻOku ou manatuʻi lelei ʻa e foʻi hiva ko ia naʻe ueʻi ia ke mau hivá:
Ne u fakakaukau he talanoá,
ʻI he ʻi māmani ʻa Sisūú,
ʻEne ui e fanau hangē ko ha lami;
Pehē ange naʻá ku ʻi ai mo Ia.
(“ʻOku ou Fakakaukau ʻI heʻeku Lau ʻa e Talanoa Mālie ko iá,” Tohi Hiva ʻa e Fānaú, 35)
ʻI heʻeku hivaʻi mo hoku ngaahi tokouá ʻa e foʻi hivá, ne u ongoʻi māfana mo fiefia. Naʻe fakamālohia ʻeku fakamoʻoní ʻi hono tokoniʻi au ʻe he Laumālie Māʻoniʻoní ke u ongoʻi ʻoku ʻofa ʻa e Tamai Hēvaní mo Sīsū Kalaisi ʻiate au.
ʻOku ou fakamālō ki he tāpuaki ʻo e Laumālie Māʻoniʻoní mo e ʻofa ʻa ʻeku ongomātuʻá mo ʻeku Tamai ʻi Hēvaní.