Ko e Meʻaʻofa ʻAho Fāʻeleʻi ʻa ʻEku Pīsopé

Maliana Kulusi, Lio ti Senelo, Palāsila

ʻI hoku ʻaho fāʻeleʻí ʻi ha pongipongi Sāpate ʻe taha, ne u teuteu mo hoku husepānití ke ʻalu ki he lotú ka naʻe tatangi e telefoní. Naʻá ku tali ia, pea naʻe pehē mai e pīsopé, “ʻOku ou ʻilo ʻoku hoko he ʻahó ni ho ʻaho fāʻeleʻí, ka ʻe lava nai ke ta fakataha mo au ʻi hoku ʻōfisí ʻi ha miniti ʻe 30 mei heni? ʻOku ou fie talanoa mo koe.”

ʻI heʻeku fie ʻiló, ne u fakavave atu ki he lotú.

ʻI heʻeku ʻi hono ʻōfisí, ne pehē mai e pīsopé kiate au, “Sisitā Kulusi, ʻoku ʻi ai haʻaku meʻaʻofa maʻau ki ho ʻaho fāʻeleʻí. ʻOku ui koe ʻe he ʻEikí ke ke hoko ko e palesiteni ʻo e Kau Finemuí. Te ke tali e uiuiʻi ko ʻení?” Ne u ongoʻi lōmekina, ka naʻá ku tali e uiuiʻí. Naʻe fokotuʻu pea vaheʻi au he ʻaho ko iá.

ʻI heʻeku foki ki ʻapi hili e lotú, ne u tangutu ʻi hoku funga mohengá. Naʻe ongo kiate au ʻa e mafatukituki ʻo e fatongiá. Naʻá ku tangi mo ongoʻi taʻefeʻunga ki he ngāué. Ko ha fatongia mafatukituki ke tataki ʻa e kau finemuí! Naʻe papitaiso au ʻi hoku taʻu 22 pea ne teʻeki ke u kau atu kimuʻa ki he ngaahi ʻekitivitī ʻa e Kau Finemuí. Te u lava fēfē ʻo hoko ko e palesiteni ʻo e Kau Finemuí?

Naʻá ku fai e meʻa pē naʻá ku ʻiloʻi ko ia ke faí—naʻá ku tūʻulutui ʻo kole ki he Tamai Hēvaní ke maʻu ha fakahinohino ʻi he uiuiʻi foʻou ko ʻení. ʻI he momeniti ko iá ne u aʻusia ha meʻa he ʻikai ke toe ngalo ʻiate au. ʻI heʻeku fakakaukauloto atu ki he finemui takitaha, ne mahino kiate au ko e tokotaha kotoa ko ha ʻofefine ʻo e Tamai Hēvaní. Ne nau takitaha fie maʻu ha palesiteni ʻoku ʻofa ʻiate ia pea lava ke ne tokoniʻi ia ke mahino ʻoku ʻofa e ʻOtuá ʻiate ia. Naʻá ku sioloto ki he hingoa ʻo e kau finemui māmālohi kotoa pē (ʻa ia kuo teʻeki ai ke u feʻiloaki mo iá), pea ne mahino kiate au ko e ngaahi ʻofefine foki kinautolu ʻo e Tamai Hēvaní pea naʻa nau fie maʻu ʻeku tokangá. Naʻá ku ongoʻi ʻa e meʻa kotoa te nau malavá.

Naʻe ʻikai faingofua ʻa e ngaahi māhina ne hokó. Naʻá ku ngāue mālohi ke ʻiloʻi ʻa e finemui takitaha pea ke mahino ʻa ʻene ngaahi fie maʻú. Naʻe ngāue fakataha ʻa e kau finemui mālohi he siasí, ne tokoniʻi ʻe heʻemau kau palesitenisií ʻa kinautolu ʻa ia naʻe māmālohi ke foki mai ʻo mālohi. Naʻá ku mamata ki he ngāue ʻa e toʻukupu ʻo e ʻEikí ʻi ha ngaahi founga lahi.

ʻI he taimi naʻe tukuange ai au mei hoku uiuiʻí, ne u hohaʻa he naʻe mei lava ke u fai ha meʻa lahi ange. ʻI heʻeku aʻu atu ki ʻapí, ne u tūʻulutui ʻo kole ki he Tamai Hēvaní pe naʻe lelei ʻa ʻeku ngāué. Naʻá ku maʻu ha ongo lelei ʻokú Ne fiefia.

Naʻá ku fakakaukau ki he ʻaho fāʻeleʻi ko iá ʻi he taimi naʻá ku mei lava ke fakafisingaʻi e uiuiʻí koeʻuhí ko hoku ngaahi fatongia kehé. Ka ko au ne mei mole lahi tahá ʻaki e ʻikai ke tali e uiuiʻí. Ne mei mole hoku faingamālie ke ako e loto fakatōkilaló, maʻu ha mahino, fakatupulaki ʻa e faʻa kātakí, pea hoko ko ha meʻangāue ʻi he toʻukupu ʻo e ʻEikí. Ka ko e taupotu tahá, naʻe mei tō noa ʻa e falala mai e ʻEikí kiate aú, pea ʻikai ke u lava ʻo ʻilo ko e faingamālie ke tokoní ko ha meʻaʻofa.