Ko Hono ʻOmi ʻo e Palaimelí ki ʻApí
Ko Sīsū Kalaisi Hotau Fakamoʻuí
Ako lahi ange ki he kaveinga ʻo e Palaimelí ki he māhina ní!
Naʻe tokoto ha kiʻi taʻahine taʻu 12 ʻi hono mohengá, ʻo fakaʻau ke kovi ange ʻene puké. Naʻe sio fakamamaʻu pē ʻene ongomātuʻá. Naʻe ʻikai ke nau lava ʻo fai ha meʻa ke fakahaofi ia.
Fāifai peá ne nau manatuʻi ha ngaahi talanoa fakaofo ʻa ia naʻa nau fanongo ai ʻo kau ki ha tangata ne nofo ʻi honau lotolotongá ko Hono hingoá ko Sīsū. Naʻe pehē ʻe he kakaí naʻá Ne lava ke fakamoʻui e mahakí mo fakaʻā ʻa e kakai kuí. Mahalo pē naʻa lava ke Nefakahaofi e moʻui ʻa ʻema tama fefiné!
Naʻe lele ʻa Sailosi, ko e tamai ʻa e kiʻi taʻahiné ke kumi ʻa Sīsū. Naʻá ne kole kia Sīsū ke fakamoʻui hono ʻofefiné. Pea naʻe haʻu ha talafekau mo ha ongoongo fakamamahi. Naʻe fuʻu tōmui. Ne ʻosi pekia e taʻahiné. Naʻe folofola ange ʻa Sīsū kia Sailosi, “ʻOua te ke manavahē, ka ke tui pē” (Maʻake 5:36).
ʻI he taimi ne aʻu mai ai ʻa Sīsū mo Sailosi ki he fale ʻo Sailosí, naʻá na ō ki he loki naʻe tokoto ai ʻa e kiʻi taʻahiné. Ne puke hake ʻe Sīsū ʻa e nima ʻo e kiʻi taʻahiné pea folofola ke tuʻu hake. ʻI he taimi naʻá ne tuʻu hake aí, naʻe fakatumutumu ʻene ongomātuʻá. Naʻe toe fakamoʻui ʻe Sīsū ʻa ʻena taʻahiné!
Naʻe fakahā ʻe Sīsū he ʻaho ko iá ʻa e lahi ʻo ʻEne tokangaʻi ki he kiʻi taʻahiné mo hono fāmilí ʻaki ʻene tokoniʻi kinautolu. ʻOku fakahaaʻi ʻe Sīsū ʻa e lahi ʻo ʻEne tokanga kiate kitautolú ʻi ha ngaahi founga fakaʻofoʻofa mo fakaofo:
-
Naʻá ne tokoni ki hono faʻu ʻo e māmani fakaʻofoʻofá mo e meʻa moʻui kotoa pē.
-
Naʻá ne loto fiemālie ke haʻu ki he māmaní ke hoko ko hotau Fakamoʻuí, neongo naʻá Ne ʻafioʻi ʻe faingataʻa ʻaupito.
-
Naʻá ne fakamoleki ʻEne moʻui ʻi he māmaní ke tāpuakiʻi, fakamoʻui, pea mo akoʻi e niʻihi kehé.
-
Naʻá ne moʻui haohaoa.
-
Naʻá ne loto fiemālie ke mamahi maʻa ʻetau ngaahi angahalá ʻi he Ngoue ko Ketisemaní pea pekia he kolosí kae lava ke tau toetuʻu pea foki ki he langí.