Ngaahi Fakakaukau Maʻá e Efiafi Fakafāmili ʻi ʻApí

ʻOku ʻi he makasini ko ʻení ha ngaahi fakamatala mo e ʻekitivitī ʻe lava ke fakaʻaongaʻi ʻi he efiafi fakafāmili ʻi ʻapí. ʻOku ʻoatu heni ha fakakaukau ʻe ua.

“Founga Hono Fili e Kaungāmeʻa LeleI,” peesi 53: Kosi mei he ngaahi makasiní ha ngaahi fakatātaá ʻo ha kau talavou mo ha kau finemui pea faʻu ha pupuituʻa nounou ki he fakatātā takitaha. Hangē ko ʻení, te ke lava ʻo puke hake ha fakatātā ʻo ha talavou ʻo pehē, “Ko ʻĒlone ʻeni. ʻOku ʻikai kau ki he Siasí, ka ʻoku ʻalu maʻu pē ki he falelotu lahí mo hono fāmilí. ʻOkú ne saiʻia he sipotí mo e lea lelei.” Faʻu ha puipuituʻa peheni ki he fakatātā takitaha. ʻEke ki ho fānaú pe ko fē ʻi he kakai ko ʻení te nau hoko ko ha kaungāmeʻa lelei. Lau mo kinautolu e Sēmisi 2:23 pea aleaʻi e ngaahi founga ʻe lava ke tau hoko ai ko e kaungāmeʻa lelei mo e Tamai Hēvaní.

“Ko Sīsū Kalaisi ʻa Hotau Fakamoʻuí,” peesi 74: ʻOku haʻu ʻa e Toetuʻú! Te ke lava ʻo fai ha meʻa makehe ʻi he faʻahitaʻu ko ʻení ke ʻiloʻi ai e ngaahi tāpuaki meia Sīsū Kalaisí. ʻI he ʻaho kotoa pē ʻi he kai efiafí, ʻe lava ke taufetongi ʻa e mēmipa takitaha ʻo e fāmilí ʻi hono vahevahe ʻa e ngaahi tāpuaki kuó ne maʻu he ʻaho ko iá. ʻE lava ke ke manatua ʻa e ngaahi tāpuaki ko ʻení ʻaki hano tānaki ha ngaahi foʻi mapu ʻi ha foʻi hina—ko e foʻi mapu ʻe taha ki he tāpuaki ʻe taha. Te ke lava ke fakafeʻiloaki atu e fakakaukau ko ʻení lolotonga e efiafi fakafāmili ʻi ʻapi ʻaki hano lau ha potufolofola fekauʻaki mo e moʻui ʻa Sīsū Kalaisí; pea kole ki hoʻo fānaú ke nau tā ha fakatātā ʻo e meʻa ʻoku hoko ʻi he folofolá. Hivaʻi ʻa e “ʻOku ou Feinga ke Hangē ko Sīsuú” (Tohi Hiva ʻa e Fānaú, 40) pe ko ha hiva kau ki he Fakamoʻuí.

ʻI Hoʻo Lea Fakafonuá

ʻOku maʻu ʻa e Liahona mo e ngaahi nāunau kehe ʻa e Siasí ʻi ha ngaahi lea fakafonua lahi ʻi he languages.lds.org.

Ke fakafehokotaki mo e Liahona ʻi he Facebook pea maʻu mo e ngaahi popoaki, ʻaʻahi ki he facebook.com/liahona.magazine.