FOUNGA HONO Fili ha Kaungāmeʻa Lelei
Mei ha lea ʻi he fakataha lotu ʻa e ʻUnivēsiti Pilikihami ʻIongí ʻi he ʻaho 16 ʻo Sānuali 1973.
Tā fakatātā ʻo e ʻatá ʻe Cody Bell
ʻI ha savea naʻe fai ʻi he ngaahi uooti mo e siteiki ʻo e Siasí ne filifili, ne mau ʻilo ai ha foʻi moʻoni mahuʻinga. Ko e niʻihi ko ia ʻoku ʻi ai honau kaungāmeʻa ne mali ʻi he temipalé, ʻoku nau faʻa mali foki mo kinautolu ʻi he temipalé, ka kinautolu ne ʻikai mali honau kaungāmeʻá ʻi he temipalé, ne ʻikai ke nau mali mo kinautolu ʻi he temipalé. Naʻe hā mai ʻoku mālohi ange ʻa e ivi tākiekina ʻo e kaungāmeʻá ʻi he fakaʻaiʻai ʻa e mātuʻá, fakahinohino ʻi loki akó, pe ofi ki he temipalé.
ʻOku tau faʻa fakahehema ke hoko ʻo hangē ko kinautolu ʻoku tau saiʻia aí. Hangē ko e fakamatala fungani ʻa Nataniela Hautoné (Nathaniel Hawthorne) ʻi he “The Great Stone Face”, ʻoku tau fakaʻaongaʻi ʻa e ʻulungaanga, mo e tōʻonga fakakaukau, pea aʻu ki he meʻa ʻoku fai ʻe he niʻihi ʻoku tau saiʻia aí—pea ko e angamahení ko hotau kaungāmeʻá. Feohi mo kinautolu ʻoku hangē pē ko kimoutolú, ʻoku ʻikai ke nau palani ki he fakafiemālie fakataimi pē, ngaahi taumuʻa fuonounou, pe ngaahi holi ʻoku fakangatangata pē ka ki he ngaahi meʻa ʻoku mahuʻinga tahá—ʻa e ngaahi taumuʻa ʻoku taʻengatá.
ʻOku tohi ʻi ha holisi ʻi he fakahahake ʻo e Siasi Fakamanatu ʻo e ʻUnivēsiti Sitenifōtí ʻa e moʻoni ko ʻení: “Ko e meʻa kotoa ʻoku ʻikai taʻengatá [ʻoku] fuonounou ia, [pea] ko ia kotoa ʻoku ʻikai ke taʻe fakangatangatá, [ʻoku] fuʻu siʻisiʻi.”1
Mavahe mei homou kaungāmeʻa fakamāmaní, ʻoku ou tapou atu ke mou fakakaungāmeʻa ki hoʻomou Tamai Hēvaní. ʻOkú Ne tuʻu mateuteu ke tali ʻa e lotu ʻa ho lotó. Koeʻuhí ko e Tamai ia ho laumālié pea fakatupu ʻa kimoutolu ʻi Hono tataú, ʻo ʻilo ʻa e ikuʻangá mei he kamataʻangá, he ʻikai ngalo ʻi Hono poto pea ʻe moʻoni ʻa ʻEne akonakí ʻo taʻengata. Fakakaungāmeʻa kiate Ia.
ʻOku ʻi ai ʻa e kaungāmeʻa mahuʻinga ʻe taha ʻoku totonu ke mou maʻu, ko e pīsope ʻo homou uōtí. Kuo uiuiʻi ia ʻe he ʻOtuá ʻi he kikite, mo e hilifaki ʻo e nimá ʻe kinautolu ʻoku maʻu ʻa e mafaí. ʻOkú Ne maʻu e totonu ki he tokoni fakalangí ʻi hono ʻoatu kiate koe ha faleʻi mo ha fakahinohino. Fakakaungāmeʻa kiate Ia.
Fili tokanga ho ngaahi kaungāmeʻá.