Ko Au Ne Faingataʻaʻiá

Taiana Hasi, ʻAlesona, USA

ʻI he ngaahi taʻu siʻi kuo hilí, naʻe ʻasi ha kā motuʻa ʻi he tauʻanga meʻalele homau ʻapisiasí. Ko e kā ʻa ha tamai nofo toko taha ne ʻi ai haʻane fānau ʻe toko fā. Naʻá ne haʻú ke kole ha tokoni. Ne kumi ʻe homau uōtí honau nofoʻanga, pea naʻe kamata ke ʻomi ʻe he tamaí hono fāmilí ki he lotú.

Ne maʻa e vala ʻo e fānaú he taimi ʻe niʻihi pea ʻuli he taimi ʻe niʻihi, ka naʻe mafuefue maʻu pē honau ʻulú. Ne ʻikai ke mau ʻilo pe ko e hā ne mafuefue mo fihi pehē aí. Ko e uike kotoa pē ne haʻu e palesiteni ʻo e Palaimelí mo ha meʻa ke ʻai matala ʻaki e ʻulú mo ha polosi ʻulu. Naʻá ne ngāue leva mo ha faiako ke ngaahi e ʻulu e fānaú kimuʻa pea kamata e Palaimelí.

Naʻá ku hoko ko ha tokoni ʻi he kau palesitenisī ʻo e Palaimelí, pea naʻá ku saiʻia ʻi he malava ʻe he ongo fefiné ni ʻo fāʻofua ki he fānaú neongo e teʻeki ai ke nau tafitafí. Naʻe ʻikai ke u lava ʻo ala ki honau ʻulú, pea naʻá ku fifili pe naʻe lava fēfē ʻe he kau fafiné ʻo fai iá. Naʻá ku fakafiemālieʻi hoku konisēnisí ʻaki ʻeku pehē ʻe lava ke u tokoni ʻaki hono tokangaʻi e toenga ʻo e fānaú lolotonga e ngāue ʻa e ongo fafine ko ʻení.

Naʻe taʻu ʻe tolu ʻa e siʻisiʻi taha ʻi he fāmili ko ʻení. Naʻe ʻikai ke ne lava ʻo talanoa mahino, ka naʻá ne feinga ke hiva leʻolahi ʻi he taimi naʻa mau hiva ai. Naʻe fakatupu ʻita ia kiate au.

Koeʻuhí ʻoku taimi nounou e tokanga ʻa e fānau taʻu tolú, ko ia ne u huki e kiʻi taʻahiné ni ke tokoni ke ne fakafanongo. Naʻá ne malimali mai kiate au ʻi he loto houngaʻia, pea naʻá ku kamata ke ongoʻi ʻa e fiefia mo e ʻofa ʻa e Tamai Hēvaní ki he fānau fakaʻofa ko ʻení—ko ʻEne fānau. Ne faifai peá u vakai ʻo fakalaka atu he ʻulí pea toʻo mai ha polosi ke helu ke matala ʻa hono louʻulu fihí. Naʻe aʻu ʻou fakakaukau ne ongo fakafiefia ʻa ʻene feinga ko ia ke hivá.

Hili ha ngaahi māhina siʻi, ne tuʻu hake e tamai ʻa e fānaú ʻi he houalotu fakamoʻoní ʻo fakamālō mai ʻi hono tokoniʻi ʻene fānaú. Ne pulia e fāmilí ʻi he uike hono hokó.

ʻOku ou houngaʻia he faingamālie naʻá ku maʻu ke tokoni ki he fānau ko iá. ʻI he taimi ne nau aʻu ange aí, ne u ongoʻi naʻa nau fuʻu faingataʻaʻia, ka ne u ʻilo ko au ia ne fie maʻu ke nau tokoniʻi ke u liliu.