Ko e Maʻa Fakasekisualé

ʻOku faʻa ongoʻi taʻepauʻia e mātuʻá ʻi he taimi ʻe niʻihi ʻoku maʻu ai ha faingamālie ke nau akoʻi ai e maʻa fakasekisualé ki heʻenau fānaú. Neongo ia, ʻe lava ʻe he ngaahi fealēleaʻaki ʻi he tefito ko ʻení ʻo fakaafeʻi mai ʻa e Laumālié pea tokoni ke teuteuʻi ʻa e fānaú ke nau fakahoko mo tauhi e ngaahi fuakava toputapú.

ʻI he peesi 50–51 ʻo e makasini ko ʻení, naʻe tohi ai ʻe Neli F. Melioti, ko e tokoni ua ʻi he kau palesitenisī lahi ʻo e Kau Finemuí ʻo pehē, “Naʻe ʻomi ʻe he Tamai Hēvaní ʻa e ngaahi mālohi ʻo e fakatupu ʻi he nofo malí koeʻuhí ko ha ngaahi taumuʻa fakaʻotua pē.” ʻOku tau ako mei he Tohi Tuʻutuʻuni Fika 2: Ko Hono Puleʻi ʻo e Siasí ʻoku kau ʻi he ngaahi taumuʻa ko iá ʻa hono “fakahaaʻi ʻa e ʻofá mo fakamālohia fakaeloto mo fakalaumālie ʻo e ngaahi haʻi ʻi he vā ʻo e husepānití mo e uaifí” ([2010], 21.4.4). ʻE lava ke tokoni atu e ngaahi fokotuʻu ʻi laló ki hoʻo akoʻi hoʻo fānaú fekauʻaki mo e haohaoa fakasekisualé. ʻE lava foki ke ke vakai ki he “Ko Hono Akoʻi ʻo e Angamaʻá mo e Angamāʻoniʻoní” ʻi he Liahona ʻOkatopa 2012, ke maʻu ai ha ngaahi fakakaukau lahi ange ki he founga ke talanoa ai ki he tefito ko ʻení.

Ngaahi Fokotuʻu ki hono Akoʻi ʻo e Toʻu Tupú

Fakakaukau ke lau mo hoʻo fānau taʻu hongofulu tupú ʻa e “ʻOku Mau Tui ki he Angamaʻá” ne fai ʻe ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá, ʻi he Liahona ʻo Mē 2013. Fakaafeʻi kinautolu ke nau fai ha ngaahi fehuʻi fekauʻaki mo e haohaoa fakasekisualé. Te ke lava foki ʻo ngāue ʻaki “Maʻa Fakafoʻituituí” ne fai ʻe ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻi he Liahona ʻOkatopa 2000 ke tokoni ki hono tali ʻenau ngaahi fehuʻí.
Ko e Fakalelei ʻa Sīsū Kalaisí ʻa e tefito ʻo e nāunau fakalēsoni maʻá e toʻu tupú ki he ngaahi lēsoni he Sāpaté ʻi he māhina ní. Fakakaukau ke fakaʻaongaʻi ʻa e ngaahi nāunau fakalēsoní ke akoʻi hoʻo toʻu tupú fekauʻaki mo e fakatomala ʻoku fie maʻu ki he angahala fakasekisualé (vakai, lds.org/youth/learn). ʻE lava foki ke mou lau mo aleaʻi ʻa e “Ko e Hā Hono ʻUhinga pea Ko e Hā ʻoku Fie maʻu ai ke u Vetehia ki Heʻeku Pīsopé?” ne fai ʻe ʻEletā C. Scott Grow ʻo e Kau Fitungofulú ʻi he Liahona ʻOkatopa 2013.
Kapau ʻoku ofi mai ha temipale, fakakaukauʻi ke mou ʻaʻahi ki he kelekele ʻo e temipalé mo ho fāmilí pea aleaʻi ʻa e ʻuhinga kuo pau ke tau moʻui maʻa ai ke hū he temipalé. Te ke lava ʻo vahevahe mo kinautolu e ngaahi tāpuaki kuó ke maʻu mei he mōihū ʻi he temipalé. Te ke lava foki ke palani ha taimi ke fakahoko ai homou fāmilí ʻa e papitaiso maʻá e kau pekiá.
Te ke lava ʻo lau mo e toʻu tupú ʻa e “Haohaoa Fakasekisualé” ʻi he Ki Hono Fakamālohia ʻo e Toʻu Tupú ([tohi, 2011], 35–37) pea fakaʻilongaʻi e ngaahi tāpuaki ʻoku tau maʻu tupu mei heʻetau moʻui maʻá. Te ke lava ʻo poupouʻi hoʻo fānaú ke nau hiki ha ngaahi taumuʻa ʻoku fekauʻaki mo e maʻa fakasekisualé.

Ngaahi Fokotuʻu ki hono Akoʻi ʻo e Fānaú

Te ke lava ʻo fakahoko ha efiafi fakafāmili ʻi ʻapi peá ke fakaʻaongaʻi ai ha ngaahi fakatātā ʻo e temipalé ke aleaʻi hono mahuʻinga mo e toputapu ʻo e temipalé. Hili iá peá ke fakamatalaʻi ange ko hotau sinó ko ha ngaahi temipale toputapu foki ia.
Lau mo hoʻo fānaú ʻa e tefito ʻo e tui hono hongofulu mā tolú pea mou talanoa ʻo kau ki he mahuʻinga hono tauhi ke maʻa ʻetau ngaahi fakakaukaú. Hiki ha lisi ʻo ha ngaahi tohi, heleʻuhila, mo e ngaahi hiva te ne fakafonu ho ʻatamaí ʻaki e ngaahi meʻa leleí. Te ke lava ʻo lau, mamata mo hivaʻi fakataha kinautolu.