Mga Higala sa tibuok Kalibutan
Ako si Dria gikan sa Pilipinas
Mabuhay, Kaibigan!*
Gikan sa usa ka interbyu uban ni Amie Jane Leavitt
Naghandom ba kamo nga makapuyo og usa ka isla? Kini si Alejandria, apan ang iyang pamilya ug mga higala motawag niya og Dria sa minubo. Siya nagpuyo sa isla sa Cebu sa Pilipinas uban sa iyang mama, papa, ug duha ka igsoong babaye. Siya dunay usa ka magulang nga lalaki usab, apan namatay sa wala pa matawo si Dria. “Nasayud ko nga kabahin gihapon siya sa among pamilya, ug makakita ko kaniya sa umaabut tungod kay ang pamilya mahangturon, miingon siya.
Usa sa akong paborito nga buhaton mao ang sayaw. Usa ko ka ballet dancer. Sunod tuig naglaum ko nga mosaka sa sunod nga lebel, nga mao ang pointe. Nagpasabut kini nga ako makasul-ob na og espesyal nga ballet nga sapatos nga makatabang nako sa pagsayaw ginamit ang akong kumagko sa tiil.
Ang Pilipinas dunay sobra sa 7,000 ka mga isla, mao nga dunay daghang maanindot nga mga dapit nga bisitahan. Ang among balay duol sa baybayon, ug ganahan kong magdula sa dagat. Usa sa akong paborito nga buhaton mao ang paglangoy. Gani gitudloan nako akong kaugalingon kon unsaon!
Ganahan ko nga mouban sa akong pamilya sa pagbisita sa lain-laing mga kabaybayunan. Kausa miadto mi sa Palawan—usa ka isla nga dunay labing dakong underground river sa kalibutan. Nag-dive ako didto ginamit ang akong snorkel gear ug mitan-aw sa tanang mabulukon nga mga isda.
Usa ka adlaw sa eskwelahan, pipila ka klasmeyt miingon nga ang Mormons dili motuo sa Dios. Giingnan nako sila nga kami nagtuo. Sa pagkasunod nga adlaw nagdala ko og pipila ka mga pass-along kard nga dunay litrato ni Jesus sa atubangan ug ang mga Artikulo sa Hugot nga Pagtuo sa luyo. Sa dihang ang akong mga klasmeyt mitan-aw sa litrato ug mibasa sa pipila sa atong mga gituohan, sila nalipay nga kita nagtuo sa Dios.
Gusto Ko nga Makita ang Templo
Swerti kami nga nagpuyo duol sa Cebu City Philippines Temple. Naka-tour ko sa templo uban sa akong pamilya sa wala pa kini gipahinungod. Maanindot kaayo kini, malinawon nga dapit. Mapasalamaton ko nga tungod sa mga templo, ang akong pamilya magkauban hangtud sa kahangturan.