Kita Ang mga Kamot sa Ginoo
Ang pagtabang sa mga kabus ug pagpangalagad niadtong nag-antus mahinungdanon sa pagkahimong disipulo ni Jesukristo.
Sa sayo nga bahin sa Dakong Depresyon, unom ka presidente sa stake gikan sa Walog sa Salt Lake naghiusa sa pagsulbad sa nagkagrabe nga kalisud ug kagutom nga mihulga pag-ayo sa daghang mga miyembro sa Simbahan.1 Bisan tuod ang krisis sa ekonomiya nakaapekto sa mga tawo bisan asa, ang Utah nagun-ob gyud pag-ayo.2
Nianang higayuna, ang mga lider sa Simbahan adunay gamay lang nga kapanguhaan aron itabang niadtong nanginahanglan. Siyempre, ilang magamit ang mga halad sa puasa, apan ang nagpadayon nga panginahanglan mas grabe pa kaysa ilang nasinati sukad. Ubos sa direksyon sa Presiding Bishopric, ang Deseret Employment Bureau natukod sa sayong mga 1900. Apan dili kompleto ang mga ekipo niini sa pag-atubang sa ingon ka dakong panginahanglan.
Kining unom ka mga lider sa priesthood nasayud nga kon tabangan ang mga tawo sa ilang stake, dili na sila maglangay-langay. Kinahanglan nilang molihok diha-diha dayon. Gisugdan nila pinaagi sa pagpatrabaho sa mga tawo. Giorganisar nila ang mga lalaki ug gidala sila ngadto sa umahan diin sila makaani. Isip bugti sa ilang paghago, ang mapasalamatong mag-uuma midonar og daghang pagkaon ngadto kanila. Ang sobra gidala ngadto sa balay tipiganan ug giapud-apud ngadto sa uban kinsa gigutom. Samtang nagkadaghan ang mga donasyon, gisugdan sa mga Santos ang pagsulod niini sa lata aron mapreserbar kini. Kini ang sinugdanan sa programa sa welfare sa modernong panahon.
Walo ka dekada ang milabay, ang mga lider sa Simbahan karon sa tibuok kalibutan moamuma sa ilang mga kongregasyon ug mobati sa samang determinasyon sa pagtabang niadtong nanginahanglan.
Niadtong Oktubre 2011 nga kinatibuk-ang komperensya, si Presidente Dieter F. Uchtdorf, Ikaduhang Magtatambag sa Unang Kapangulohan, miingon: “Makamatikod kita sa mga panginahanglan nga naglibut nato naglaum nga may usa ka tawo gikan sa layong dapit nga mokalit og pakita aron sa pagtubag niana nga mga panginahanglan. Tingali naghulat kita sa mga eksperto nga espesyalista sa pagsulbad og pihong mga problema. Kon kita maghimo niini, atong gihikawan ang atong silingan sa serbisyo nga mahimo natong mahatag, ug ato usab nga gihikawan ang atong kaugalingon sa oportunidad sa pagserbisyo. Bisan og dili sayop ang kalabut sa mga eksperto, atubangon na lang nato kini: dili gayud sila igo sa pagsulbad sa tanang mga problema. Hinoon, ang Ginoo mibutang sa Iyang priesthood ug sa mga organisasyon niini diha sa atong pultahan sa tanang kanasuran diin naestablisar ang Simbahan.”3
Kini nga panawagan sa lokal nga mga lider sa Simbahan ug sa mga miyembro sa paglihok sumala sa pagdasig sa Espiritu Santo nakapahimo sa daghang tawo sa tibuok kalibutan, sama sa giingon ni Presidente Uchtdorf, nga “hunahunaon og maayo [sa ilang kaugalingon].”4 Ilang gihulho ang buktunan sa ilang sinina ug mihukom nga “hinumduman diha sa tanan nga mga butang ang kabus ug ang timawa, ang masakiton ug ang nag-antus” (D&P 52: 40).
Ecuador
Samtang giamuma ni Bishop Johnny Morante sa Guayaquil, Ecuador, ang mga miyembro sa iyang ward, nagmasulub-on ang iyang kasingkasing. Kadaghanan sa mga pamilya naglisud sa pagsangkap sa nag-unang mga kinahanglanon sa kinabuhi. Gusto niyang tabangan sila, busa iyang gikonsulta ang mga lider sa ward ug midangup sa Ginoo.
Tungod ang mga oportunidad sa pagtrabaho sa dapit nihit, iyang gisugdan uban sa usa ka grupo nga may 11 ka sister, nag-awhag kanila sa posibilidad sa ginagmayng negosyo. Nakamatikod kining mga sister sa panginahanglan sa dekalidad, barato nga mga suplay sa paglimpyo sa balay, ug naghunahuna kon sila makahimo ug makabaligya niini sa ilang komunidad. Apan unsaon nila paghimo niining mga suplay?
Niining panahona, si Bishop Morante nakaila sa usa ka sister sa iyang ward nga walay trabaho pero sa una nagtrabaho isip chemist sa pharmaceutical. Sa dihang gihangyo siya sa 11 ka sister nga motabang, nalipay siya sa pagtudlo kanila kon unsaon sa paghimo og luwas, dekalidad nga mga suplay.
Nagmugna sila og plano sa negosyo, gibahin-bahin ang mga dapit sa komunidad kon asa i-assigned ang kada sister, mipili og mga produkto nga ilang himoon, ug midesinyo sa mga pakete ug label.
Sulod sa pipila ka bulan, midaghan ang ilang customer ug aduna nay igong kinitaan sa pagpagaan sa ilang kalisud ug pagsangkap sa mga panginahanglan sa ilang mga pamilya.
Sa dihang ang mga manager sa usa ka lokal nga kompanya sa pharmaceutical nasayud kabahin niining negosyo, nakuryuso sila sa istorya sa walay trabaho nga chemist sa pharmaceutical. Sa katapusan gi-interbyu niya siya ug gidawat aron magdumala sa ilang pabrika.
Russia
Sa Rechnoy Ward sa Moscow, Russia, si Galina Goncharova, kinsa nagserbisyo isip ward historian, nadakin-as sa ice ug nabali ang iyang duha ka bukton. Gidala siya sa ospital, diin ang iyang mga bukton giputos. Dili siya makakaon o makasinina nga siya-siya lang. Dili niya masudlay ang iyang buhok o matubag ang telepono.
Sa dihang nasayran sa mga kauban sa ward ang nahitabo, mitabang sila diha-diha dayon. Ang mga naghupot sa priesthood mipanalagin kaniya ug nakig-alayon uban sa mga sister sa Relief Society sa pagmugna og eskedyul sa pagsusi sa kahimtang niining buotan nga sister ug pag-atiman sa iyang mga panginahanglan.
Si Vladimir Nechiporov, ang ward mission leader, miingon, “Nahinumduman namo ang usa ka pamulong nga gihatag sa kinatibuk-ang komperensya kabahin sa estatuwa ni Kristo nga walay mga kamot.5 Ubos sa estatuwa adunay mibutang og plaque nga mabasa, ‘Kamo ang Akong mga Kamot.’ Sulod sa pipila ka semana kining buotan nga sister walay mahimo, ang mga miyembro sa Rechnoy Ward mibati og maayo niadto nga istorya. Kami sa literal nga paagi nahimong iyang mga kamot.”
Pilipinas
Sa dihang ang Bagyong Sendong [Washi] miigo sa Pilipinas niadtong 2011, mibaha og maayo ug kusog kaayo ang hangin. Mga 41,000 ka balay ang nadaut, ug mikalas og sobra sa 1,200 ka kinabuhi.
Sa wala pa ang baha, si Max Saavedra, presidente sa Cagayan de Oro Philippines Stake, nadasig sa pagmugna og stake emergency response team. Miorganisar siya og mga komite sa paghimo sa lain-laing mga buluhaton—tanan gikan sa pagpangita ug pagluwas hangtud sa paghatag og first aid hangtud sa pagsangkap og pagkaon, tubig, ug sinina.
Sa dihang ang baha miubos na sa luwas nga lebel, ang mga lider sa Simbahan ug mga miyembro milihok. Ilang gisiguro nga luwas ang matag miyembro ug gibanabana ang kadaot. Usa ka miyembro misangkap og goma nga balsa aron pagdala sa natanggong nga mga miyembro ngadto sa luwas nga dapit. Giablihan ang mga meetinghouse aron mahimong kapasilungan niadtong nanginahanglan og pagkaon, sinina, mga habol, ug temporaryong dapit nga kapuy-an. Importante gyud kaayo ang limpyo nga tubig, busa gikontak ni Presidente Saavedra ang lokal nga negosyo nga nanag-iya og truck sa bombero, ug nagdala sila og limpyo nga tubig ngadto sa mga meetinghouse evacuation center. Ang mga miyembro nga adunay propesyonal nga kasinatian sa medikal miasikaso niadtong naangol.
Sa dihang ang tanang mga miyembro sa Simbahan nasubay na, si Presidente Saavedra ug ang iyang grupo mibisita sa ubang mga evacuation center sa siyudad ug mitanyag nga motabang. Gihatagan nila sila og pagkaon ug ubang mga suplay. Daghang mga miyembro, bisan tuod nawad-an sila og panimalay, walay hinakog nga miserbisyo sa uban diha-diha dayon human sa unos. Sa dihang ang ulan miundang ug nauga na ang yuta, ang mga boluntaryo sa Mormon Helping Hands gikan sa tulo ka stake miapud-apud sa mga suplay ug ingon mitabang sa pagpanglimpyo.
Brazil
Sulod sa siyudad sa Sete Lagoas, Brazil, adunay dangpanan sa mga babaye nga may kakulangan kansang kinabuhi naapektuhan tungod sa pag-abuso sa druga. Kada adlaw nanlimbasug sila nga mabuhi. Sila adunay gamay nga oven aron sa pagluto og 30 ka buok nga pan sa usa ka adlaw. Bisan tuod ang mga babaye nakadawat og tabang gikan sa usa ka lokal nga humanitarian association, kulang gihapon ang ilang pagkaon. Sa dihang ang mga lider sa Simbahan sa Sete Lagoas Brazil Stake nasayud sa mga panginahanglan niining mga babaye, gusto nilang motabang.
Sila nakigsabut sa mga babaye sa ilang mga panginahanglan. Ang mga babaye miingon nga kon sila makahimo og mas daghang pan, dili lang sila makakaon apan sila makabaligya usab og pipila ka pan ug makakwarta nga ilang gikinahanglan kaayo.
Ang mga lider sa Simbahan ug mga miyembro nakigtambayayong sa lokal nga mga pulis sa militar ug sa lokal nga eskwelahan sa pagpalambo sa mga kahimtang niining mga babaye. Uban sa tabang sa humanitarian grant sa Simbahan ug sa mga boluntaryo gikan sa Simbahan ug sa komunidad, nakahimo sila og bag-ong panaderiya—diin ang mga babaye makahimo og 300 ka buok pan kada adlaw.
Gamit sa hinabang nga ilang nadawat, ang mga babaye sa panaderiya naka-hire sa ilang unang trabahante—usa sa mga babaye nga anaa sa dangpanan.
Ang Buhat sa Welfare
Sama niadtong dinasig nga mga lider sa Simbahan mga dekada na ang milabay kinsa nakakita sa dakong panginahanglan nga anaa kanila ug mitubag niini, ang mga lider sa Simbahan ug mga miyembro sa tibuok kalibutan naghimo usab niini sa ilang kaugalingong mga dapit ug pamaagi.
Sa dihang si Presidente Uchtdorf namulong ngadto sa Simbahan mahitungod sa pag-amuma sa uban, siya miingon: “Ang pamaagi sa Ginoo dili mao ang paglingkod lang sa daplin sa sapa ug maghulat sa pag-agos sa tubig nga mahuman una kita molabang. Magkuyog gayud kini, ihulho ang buktunan sa atong sinina, pagtrabaho, ug paghimo og taytayan o sakayan aron makalabang sa katubigan sa atong mga hagit.”6
Ang pagtabang sa mga kabus ug pagpangalagad niadtong nag-antus mahinungdanon nga bahin sa pagkahimong disipulo ni Jesukristo. Kini ang buhat nga gihimo mismo ni Jesukristo samtang Siya nangalagad sa mga tawo sa Iyang panahon. “Kini nga buhat sa pagsangkap diha sa pamaagi sa Ginoo dili lamang laing aytem diha sa listahan sa mga programa sa Simbahan,” gitapos ni Presidente Uchtdorf. “Dili kini mahimong ibaliwala o pasagdaan. Mahinungdanon kini sa atong doktrina; kini ang lintunganay sa atong relihiyon.”7