Nangandam aron Moserbisyo, Nagserbisyo aron Maandam
Gihatag sa Dios kaninyo ang Aaronic Priesthood kay Siya dunay ipabuhat kaninyo—karon ug sa umaabut.
Mga paghulagway pinaagi ni Taia Morley
Si Jonathan akong higala kinsa nagpasakop sa Simbahan upat ka tuig nang milabay. Siya lang ang miyembro sa Simbahan sa iyang pamilya. Human siya makadawat sa Aaronic Priesthood, nagsugod siya sa pagserbisyo ngadto sa uban nga usa ka pagserbisyo nga wala pa niya mabuhat sukad. Nahibalo si Jonathan nga sa pagserbisyo, daghan siya og angay nga kat-unan. Gusto sab siyang mahimo nga takus ug mas kasaligan, mao nga nagtuon siya sa ebanghelyo, nag-ampo, ug mitambong sa iyang mga miting sa Dominggo ug sa seminary. Naningkamot gayud siya sa pagsunod sa mga sugo ug sa mga sumbanan sa Simbahan. Makugihon niyang gituman ang iyang mga katungdanan sa priesthood, lakip ang pagkahimong talagsaon nga home teacher. Ang iyang libro nga Katungdanan ngadto sa Dios nakatabang kaniya nga makasabut sa mga katungdanan ug sa pagkat-on kon unsaon sa pagtuman niini.
Ang matinud-anong priesthood nga panerbisyo ni Jonathan naghatag niya og espirituhanong kalig-on. Nakatabang kini nga siya mapanalipdan sa dautang mga impluwensya. Maayo kaayo ang iyang paglambo samtang nagserbisyo siya ug nag-andam alang sa iyang umaabut. Sa miaging tuig, takus siya nga midawat sa Melchizedek Priesthood ug sa endowment sa templo. Karon nagmisyon na siya sa Brazil.
Ang Aaronic Priesthood sa kasagaran gitawag og “priesthood alang sa pagpangandam.” Gihatag sa Dios kaninyo ang Aaronic Priesthood kay Siya dunay ipabuhat kaninyo—karon ug sa umaabut. Ang inyong matinud-anong pagserbisyo sa Aaronic Priesthood nag-andam kaninyo alang sa mas dako pang mga oportunidad sa pagserbisyo sa umaabut nga mga katuigan. Sama ni Jonathan, kamo nangandam sa “pagdawat sa Melchizedek Priesthood, sa pagdawat sa mga panalangin sa templo, pag-alagad og full-time nga misyon, nga mamahimong mahigugmaong bana ug amahan, ug sa pagpadayon sa tibuok kinabuhi nga pagserbisyo sa Ginoo” (Matinud-anon sa Tinuohan: Usa ka Pakisayran sa Ebanghelyo [2004], 4).
Tingali dili mo makahibalo sa tanang detalye sa talagsaong mga oportunidad nga giandam sa Langitnong Amahan kaninyo, apan sigurado ko nga maandam kamo sa paghimamat kanila kon inyong hinumduman ang pagbuhat sa mosunod isip usa ka naghupot sa Aaronic Priesthood.
Sundon si Jesukristo
Isip usa ka naghupot sa priesthood, kamo representante ni Jesukristo. Nagpasabut kana nga gihangyo kamo sa pagsunod Kaniya ug sa pagbuhat sa gusto Niya nga ipabuhat. Unsa man kaha ang Iyang buhaton? Sa matag sitwasyon, Iyang gigahin ang Iyang kinabuhi sa pagserbisyo ug pagpanalangin sa uban. Mao usab ang inyong buhaton. Igahin ang inyong kaugalingon sa pagserbisyo sa uban—ug dayon magpatubo ug magpalambo aron duna kamoy dugang pa nga ikahatag! Hinumdumi sa unsang paagi nagtubo si Jesus sa Iyang kabatan-on: Siya “mitubo sa kaalam ug sa gidak-on, ug sa kahimuot kaniya sa Dios ug sa tawo” (Lucas 2:52).
Ang usa ka bahin sa pagsunod sa Manluluwas mao ang pagkahimong maalamon ug himsog sa pisikal sa inyong kabatan-on. Nagkinahanglan nga maningkamot gayud kamo ug padayon kutob sa inyong mahimo (tan-awa sa D&P 4:2). Kahimut-an kamo sa Dios samtang magpaduol kamo Kaniya pinaagi sa inadlawng pag-ampo, pagtuon sa ebanghelyo, kamasulundon, ug pagserbisyo. Kahimut-an kamo sa uban kon magmabination kamo ug maunungon sa inyong pamilya ug sa sama kang Kristo nga pagpakighigala sa tanan.
Hinumdumi nga si Jesus kanunay mituman sa kabubut-on sa Amahan. Nagsunod kamo kang Kristo kon inyong gitinguha ang kabubut-on sa Dios sa tibuok adlaw nga mogiya sa inyong panerbisyo ug lihukon ang espirituhanong mga pag-aghat nga inyong nadawat.
Pagpangalagad sa mga Ordinansa sa Priesthood
Ang mga ordinansa sa priesthood gikinahanglan alang sa tanang anak sa Dios ug mopanalangin sa Iyang mga anak sa patas nga paagi. Sugod sa inyong pagka-deacon, mitabang kamo sa pagpangalagad sa ordinansa sa priesthood pinaagi sa pag-apud-apod sa sakrament. Padayon kamong mangalagad sa mga ordinansa diha sa Aaronic Priesthood samtang mangandam kamo ug makapanalangin sa sakrament, mobunyag, ug moapil sa pag-orden sa ubang naghupot sa Aaronic Priesthood.
Aron makaapil sa sagradong mga ordinansa, kinahanglang limpyo kamo. Ang inyong moral nga kalimpyo makadugang sa talagsaong espirituhanong gahum sa mga ordinansa nga inyong gipangalagaran. Paningkamuti nga takus kamo sa tanang paagi sa paghupot sa sagradong mga butang sa sakrament sa Ginoo (tan-awa sa D&P 38:42). Kon buhaton ninyo kini, makabarug kamo sa inyong ward o branch isip tinuod nga representante ni Jesukristo. Mapanalanginan sila tungod sa inyong determinasyon sa pagtuman sa mga pakigsaad diin kamo mitabang kanila sa pagbag-o.
Pangalagad sa Kanunay
Isip naghupot sa Aaronic Priesthood, mangalagad kamo. Sa tanang panahon, tinguhaa ang mga oportunidad nga makapangalagad sa inyong pamilya, higala, sakop sa korum, ug sa uban. Ang tanan nga inyong gibuhat diha sa priesthood nakatabang nga kamo makapangalagad sa uban sa pisikal ug sa espiritwal. Sama pananglit, kon motabang kamo sa bishop o branch president pinaagi sa pagserbisyo sa pamilya nga inyong gi-home teach, nagkat-on kamo unsaon sa pag-ila ug pag-atiman ang panginahanglan sa uban. Mangalagad sab kamo sa uban samtang motabang kamo sa paglig-on sa mga sakop sa inyong korum ug pag-rescue sa dili kaayo mga aktibo, mokolekta sa mga halad sa puasa aron ikatabang sa mga kabus ug timawa, motrabaho alang sa mga masakiton ug sa may mga kakulangan, motudlo ug mopamatuod bahin ni Kristo ug sa Iyang ebanghelyo, ug mopagaan sa mga palas-anon sa mga nawad-an og kadasig.
Nangalagad kamo samtang nagtudlo kamo sa mga leksyon sa inyong mga miting sa korum ug sa inyong mga family home evening. Nangalagad kamo samtang nagdapit kamo sa tanan sa pagduol kang Kristo (tan-awa sa D&P 50:29)—diha sa panimalay, sa inyong korum, sa eskwelahan, uban sa full-time nga mga misyonaryo, ug bisan asa man kamo.
Ang Inyong Kaugmaon
Hisguti uban sa inyong mga ginikanan o mga adviser kon unsa ang inyong mga gikinahanglan alang sa umaabut nga mga buluhaton isip naghupot sa Melchizedek Priesthood, misyonaryo, bana, ug amahan. Isulat diha sa luna nga sulatanan ang pipila sa talagsaong mga responsibilidad ug unsaon nga maandam kamo niini karon samtang magserbisyo kamo sa Aaronic Priesthood. Tingali lisud kini sa pagkakaron, apan hinumdumi nga ang pinakamaayong paagi sa pag-andam mao lamang ang pagbuhat sa ipabuhat karon kaninyo sa Langitnong Amahan. Hinaut nga makaplagan ninyo ang kalipay samtang magserbisyo kamo karon ug mag-andam alang sa mahimayaon ninyong kaugmaon.