Ang Saad Naghatag Kanako og Paglaum
Juliana Fayehun, Lagos, Nigeria
Sa wala madugay human ang akong bana ug ako naminyo, napanalanginan mi og usa ka anak nga lalaki. Sa dihang akong nakita ang iyang pahiyom ug mitan-aw sa iyang mga mata, mibati ko nga utangan sa Langitnong Amahan. Ang among anak ingon og hingpit para kanako. Ang akong bana ug ako nagpasalamat sa Ginoo matag adlaw alang niining bililhon nga gasa.
Niadtong Pebrero 19, 2009, nag-impaki ko aron sa pagpangandam sa akong pag-eskwela og balik para sa akong katapusang tuig sa klase. Ang akong bana ug ako wala masayud nga sa sunod nga adlaw ang among pinalangga nga anak mahilantan ug mobiya niining mortal nga kinabuhi.
Lisud kadto nga kasinatian para nako nga antuson. Ang mga miyembro sa among ward miadto sa among balay aron sa paghupay namo gamit ang mga kasulatan ug mga himno ug sa pag-ampo uban namo. Nagpasalamat ko sa ilang manggiloy-ong pahasubo, apan nagpadayon ang akong kasubo alang sa akong anak nga lalaki. Kon maghunahuna ko niya, ang akong mga mata mapuno sa luha.
Upat ka adlaw human sa iyang kamatayon, nadasig ko sa pagtuon sa Mga Pagtulun-an sa mga Presidente sa Simbahan: Joseph Smith. Samtang akong gikuptan ang basahon, nabukhad kini ngadto sa kapitulo nga giulohan og “Mga Pulong sa Paglaum ug Kahupayan sa Panahon sa Kamatayon.” Gisugdan nako sa pagbasa ug natandog kaayo sa grabeng kasubo nga nasinati nila ni Joseph ug Emma sa dihang nagsugod sila og pamilya. Sa dihang nabasa nako ang kinutlo gikan sa usa ka pakigpulong sa Propeta nga gihatag sa haya sa usa ka dos anyos nga batang babaye, nakapahupay gyud ni nako og maayo.
Gitawag nako akong bana. Kaming duha nagbasa: “Ako … nangutana sa pangutana, ngano nga ang mga masuso, inosente nga mga bata, gipanguha gikan kanato. … Daghan ang gikuha sa Ginoo, bisan pa gani sa pagkamasuso, aron sila makaikyas … sa mga kagul-anan ug mga kadautan niining kalibutan karon; hilabihan ra kaayo sila ka putli, hilabihan ka matahum, aron mopuyo sa yuta; busa, kon hunahunaon sa husto, imbis magbangutan adunay kita’y katarungan sa pagmaya kay gilikay sila gikan sa dautan, ug ato ra sila nga maangkon pag-usab.”
Ang Propeta midugang: “Usa ka pangutana ang tingali ikapangutana—‘Maangkon ba sa mga inahan ang ilang mga anak didto sa kahangturan?’ Oo! Oo! Mga inahan, maangkon ninyo ang inyong mga anak; kay makabaton sila og kinabuhing dayon, tungod kay nabayaran na ang ilang utang.”1
Sukad among nabasa kadtong nindot nga mga pulong, ang among mga pag-ampo sa pamilya nahimong puno sa pasalamat alang sa saad nga pinaagi sa Pag-ula ni Jesukristo makauban namo pag-usab ang among anak.
Karon kami adunay tulo ka talagsaong anak, mga igsoon sa among namatay nga anak. Amo silang gitudloan sa tinuod ug mahangturong ebanghelyo, nga mogiya kanila balik sa ilang Langitnong Amahan ug sa ilang Manluluwas, si Jesukristo.
Nasayud ko nga ang mensahe ni Propeta Joseph Smith kabahin sa kinabuhi human sa kamatayon tinuod. Mapasalamaton ko hangtud sa hangtud alang sa paglaum, kalinaw, ug hingpit nga kalipay nga nadala niini sa among pamilya—sa duha ka bahin sa tabil.