Ang Saad ni Porter
Gikan sa “Kita Adunay Dako nga Rason nga Maglipay, Ensign o Liahona, Nob. 2013, 115–16.
Sa dihang namatay ang akong ugangan nga lalaki, ang among pamilya nagpundok aron pagtimbaya niadtong nangabut aron mopahasubo. Sa tibuok gabii, samtang nakig-istorya ko sa pamilya ug mga higala, nakamatikod ko sa among 10 anyos nga apo, si Porter, nagbarug duol sa akong ugangan nga babaye—iyang lola. Usahay magbarug siya sa luyo sa iyang lola, magtan-aw niya. Nakamatikod ko kausa nga gigunitan niya ang bukton sa iyang lola. Nakabantay ko nga iyang hapuhapon ang iyang mga kamot, mogakos niya, ug magtindog tupad niya.
Sulod sa daghang mga adlaw human niana nga kasinatian, dili mawala sa akong hunahuna kini nga talan-awon. Naaghat ko sa pagpadala ni Porter og sulat. Gisultihan ko siya unsay akong nakita ug gibati. Gipahinumduman usab nako siya sa mga pakigsaad nga iyang gihimo sa dihang gibunyagan siya, nagkutlo sa mga pulong ni Alma nga anaa sa Mosiah kapitulo 18:
“Ug karon, ingon nga kamo mga matinguhaon sa pag-ipon ngadto sa panon sa Dios, ug pagatawgon nga iyang mga katawhan, ug andam sa pagtambayayong sa usag usa nga mga alantuson, nga sila mahimo nga magaan;
“Oo, ug mga andam sa pagbangutan uban niadto nga nagbangutan; oo, ug sa paghupay niadto nga nagkinahanglan sa kahupayan, ug mobarug ingon nga mga saksi sa Dios sa tanan nga mga panahon ug diha sa tanan nga mga butang, ug diha sa tanan nga mga dapit nga kamo mahimo nga maanaa, bisan hangtud sa kamatayon, … nga kamo makabaton og kinabuhi nga dayon—
“ … Kon mao kini ang tinguha sa inyong mga kasingkasing, unsay anaa kaninyo batok sa pagpabunyag diha sa ngalan sa Ginoo, ingon og usa ka saksi sa iyang atubangan nga kamo nakasulod ngadto sa usa ka pakigsaad uban kaniya, nga kamo mag-alagad kaniya ug maghupot sa iyang mga sugo, nga siya unta mobu-bu sa kabuhong sa iyang Espiritu diha kaninyo?” (mga bersikulo 8–10).
Akong gipasabut ngadto ni Porter nga gitudlo ni Alma nga kadtong kinsa gustong magpabunyag kinahanglang andam sa pagserbisyo sa Ginoo pinaagi sa pagserbisyo sa uban—sa imong tibuok kinabuhi! Miingon ko: “Wala ko kahibalo kon nakaamgo ba ikaw niini, apan sa imong pagpakita og gugma ug pagpakabana alang ni Lola nagtuman ka sa imong mga pakigsaad. Atong gituman ang atong mga pakigsaad kada adlaw kon kita mabination, magpakita og gugma, ug moatiman sa usag usa. Gusto lang ko nga mahibalo ka nga mapagarbuhon kaayo ko nimo sa imong pagtuman sa pakigsaad! Kon ikaw magtuman sa pakigsaad nga imong gihimo sa dihang gibunyagan ka, makaandam ka nga maordinahan ngadto sa priesthood. Kining dugang nga pakigsaad makahatag nimo og dugang mga oportunidad sa pagpanalangin ug pagserbisyo sa uban ug makatabang sa pag-andam nimo sa mga pakigsaad nga imong himoon sa templo. Salamat sa imong maayong ehemplo ngari nako! Salamat sa imong pagpakita nako kon unsa ang pagtuman sa pakigsaad!”
Mitubag si Porter: “Lola, salamat sa mensahe. Sa dihang naggakos ko kanunay ni Lola, wala ko kahibalo nga nagtuman diay ko sa mga pakigsaad, apan akong gibati ang kainit sa kasingkasing ug mibati og nindot. Nasayud ko nga ang Espiritu Santo kadto diha sa akong kasingkasing.”
Gibati usab nako ang kainit sa kasingkasing sa dihang nakaamgo ko nga si Porter nasayud nga kon siya nagtuman sa iyang mga pakigsaad, siya “kanunayng makabaton sa Espiritu [sa Langitnong Amahan] uban [kaniya]” [D&P 20:77]. Kini usa ka saad nga mahimong posible pinaagi sa pagdawat sa gasa sa Espiritu Santo.