Mga Profile sa Young Adult
Pagkakabig ug Sakripisyo diha sa Finland
Unsa kaha ang matinud-anong young adult sa Finland? Usa ka batan-ong lalaki mipakigbahin sa iyang kultura ug iyang hugot nga pagtuo.
Pipila ka mga milya gikan sa baybayon sa Helsinki, Finland, mao ang usa ka kota diha sa dagat sa Suomenlinna, gitukod niadtong ika-18 nga siglo isip proteksyon batok sa mga kaaway. Milangkob sa unom ka mga isla, kining lig-on nga kota nagrepresentar sa lig-ong determinasyon sa mga tawo sa Finland.
Apan ang mga miyembro sa Finland mobisita og talagsaong building kon sila mobiyahe ngadto sa ilang kapital. Ang Helsinki Finland Temple mao ang pisikal nga simbolo sa ilang pagkakabig ug proteksyon nga ilang nadawat gumikan sa pagsunod sa ebanghelyo.
Para kang Niilo Kervinen, 24 anyos nga young adult gikan sa Rovaniemi, Finland, ang 10 ka oras nga biyahe sakay sa tren ngadto sa Helsinki gamay lang nga sakripisyo para sa panalangin sa pagserbisyo diha sa templo.
Sa wala pa gipahinungod ang Helsinki Finland Temple niadtong Oktubre 2006, Si Niilo ug ubang mga miyembro sa iyang ward kinahanglan nga mobiyahe ngadto sa Stockholm Sweden Temple o sa Copenhagen Denmark Temple. “Ang biyahe sa kasagaran molungtad og usa ka semana atol sa bakasyon sa ting-init,” siya mihinumdom. Ang pagbiyahe sakay sa bus ug pagkatulog gamit sa mga tolda atol sa mga biyahe mao ang pipila sa iyang labing nindot nga mga panumduman.
Apan ang pagkaadunay templo sa iyang yutang natawhan usa ka talagsaon nga panalangin. “Sa dihang ilang gipahibalo ang templo sa Helsinki, nalipay kaayo ko,” miingon si Niilo. “Ang pag-ampo sa pagpahinungod kinasingkasing gihapon nakong mahinumduman matag sulod nako.”
Kini nga gugma para sa templo nakalahi ni Niilo sa iyang mga higala. “Ang mga tawo sa Finland kugihan ug aktibo apan mogahin lang og gamay nga oras sa espirituhanong mga butang sa ilang kinabuhi,” siya mipasabut. Bisan tuod si Niilo miingon nga kanunay siyang napanalanginan og buotang mga higala, samtang siya nagdako, ang kalainan kon sa unsang paagi nagpakabuhi ang iyang mga higala ug sa unsang paagi siya gitudloan sa pagpakabuhi nahimong mas klaro. Kini ang kalainan nga nakapahimo ni Niilo sa pagtinguha sa iyang kaugalingong pagpamatuod sa dihang 17 anyos na siya. “Kinahanglan ko nga modesisyon sa akong barugan ug unsa ko nga mamahimo,” siya miingon. “Uban sa mga panalangin sa Ginoo ug sa paggiya sa pamilya ug buotang mga higala, mas nalig-on ang akong pagpamatuod sa Simbahan.”
Kabahin sa pagkakabig, si Elder David A. Bednar sa Korum sa Napulog Duha ka mga Apostoles miingon, “Ako mosaad nga sa atong pagkasayud sa kamatuoran ug makabig ngadto sa Ginoo, magpabilin kitang lig-on ug makanunayon ug dili mobiya.”1 Bisan tuod nga ang pagbiyahe ngadto sa Helsinki nagkinahanglan og panahon ug kwarta, si Niilo masaligon nga mahimong disipulo ni Kristo. Ug para kang Niilo, dili gyud kini sakripisyo.