Pagdala sa mga Panalangin sa Priesthood sa Inyong Panimalay

Ni Bonnie L. Oscarson

Kinatibuk-ang Presidente sa Young Women

Samtang inyong tumanon ang inyong mga pakigsaad, inyong magamit ang gahum sa priesthood sa pagpanalangin sa inyong panimalay ug pamilya.

Sa unsang paagi nga kamo isip usa ka batan-ong lalaki o batan-ong babaye, bisan unsa pa ang kahimtang sa inyong pamilya, makagamit sa gahum sa pakigsaad sa priesthood nga inyong gihimo sa bunyag sa paglig-on sa inyong mga panimalay ug pamilya? Ang pagsabut sa tahas ug kaimportante sa atong mga pamilya sa plano sa Ginoo makapadasig nato sa pagtahud sa mga saad nga atong gihimo pinaagi sa pagsiguro nga ang atong labing maayo ug madasigong pagserbisyo gihimo diha sa atong kaugalingong mga panimalay. Atong tan-awon ang pipila ka mga paagi nga kita makagamit sa gahum sa atong mga pakigsaad sa paglig-on ug pagserbisyo niadtong kinsa atong labing gimahal.

Unsaon Ninyo sa Pagtubag?

Lunes na sa gabii, ug kamo dunay daghan kaayong homework. Nakadungog mo sa inyong amahan nga nanawag sa pamilya nga magpundok na alang sa family home evening. Unsa ang inyong buhaton?

Kapilian A: Kamo motubag, “Ah, Pa, wala koy panahon para niana karong gabhiona! Kinahanglan kong magtuon!”

Kapilian B: Motabang dayon ka sa pagpundok sa imong mga igsoon ug malipayong moapil sa mga pag-ampo, musika, ug mensahe.

Kon Adunay Pangulo sa Priesthood diha sa Panimalay

Ang pagsuporta sa inyong mga ginikanan pinaagi sa pag-apil sa family home evening, pag-ampo sa pamilya, ug pagtuon sa kasulatan mao ang pipila ka mga paagi sa paglig-on sa pangulo sa priesthood diha sa inyong panimalay. Adunay daghang mga paagi, sama sa:

Pag-ampo alang sa inyong mga ginikanan. (Sigurado gyud sila nga mag-ampo alang ninyo kada adlaw.)
Pagsuporta sa inyong mga ginikanan sa ilang mga calling sa Simbahan ug pagtabang sa mga buluhaton sa balay, ilabi na kon sila nagkapuliki sa espesyal nga mga buluhaton.
Pagtabang sa inyong mga ginikanan sa pag-abi-abi sa mga home teacher kon sila moabut, ug dayon maminaw sa ilang mensahe.
Kon dunay templo sa inyong dapit, pagtanyag nga mobantay sa mga manghud aron ang inyong mga ginikanan makaadto sa templo ug makaapil sa mga ordinansa sa priesthood.

Hinumdumi nga dili lang ang mga ginikanan ang responsable sa pag-imbitar ug pagmentinar sa Espiritu sa inyong panimalay. Daghan kaayo ang inyong mahimo sa pagdapit sa Espiritu pinaagi sa inyong mga aksyon ug kinaiya. Gibuhat ba ninyo ang inyong bahin sa pagdapit sa impluwensya sa Espiritu sa inyong panimalay?

Kon Walay Pangulo sa Priesthood diha sa Panimalay

Ang mga pamilya dili pareha o wala maglihok sa samang paagi. Tingali kamo anaa sa pamilya nga single-parent ra o walay naghupot sa priesthood sa inyong panimalay.Aduna pay daghang mga paagi sa pagdapit sa gahum sa priesthood sa paglig-on kaninyo ug sa inyong pamilya. Mao kini ang mga butang nga kinahanglan natong buhaton tanan, bisan unsa pa ang atong mga kahimtang:

Paghimo og personal nga pag-ampo, pagtuon sa kasulatan, ug pagpuasa. Kini nga mga paningkamot makatabang ninyo nga malig-on sa espirituhanong paagi ug modapit sa Espiritu nganha sa inyong kinabuhi ug ngadto sa mga dapit nga kamo adunay impluwensya.
Paggahin og panahon sa pagpalambo sa inyong calling o buluhaton sa Simbahan ug mangandam alang sa mga leksyon sa Dominggo. Ang pagbuhat niini makatabang ninyo sa pagbaton og pagsalig sa inyong kaugalingon ug mopakita og suporta alang sa mga programa sa priesthood.
Pagpakita og pagtahud alang sa tanang mga miyembro sa inyong pamilya ug pagsuporta sa ilang maanindot nga mga kalihokan. Kini nga mga pagpili makatabang sa paglig-on sa tibuok pamilya.
Pagpakigbahin ngadto sa inyong pamilya ang mga butang nga inyong nakat-unan ug gibuhat diha sa inyong mga klase sa Simbahan ug sa mga korum. Usa kini ka paagi sa pagtudlo sa mga pagtulun-an sa ebanghelyo nganha sa panimalay.
Pangita og mga paagi sa pagserbisyo niadtong naglibut kaninyo pinaagi sa yanong mga buhat sa pagkamabination.
Pagtabang sa mga buluhaton sa balay o pagtabang og igsoon.
Pagpakita og Kristohanong gugma sa inyong pamilya—kini adunay dakong epekto sa pagtukod og lig-on nga mga relasyon sa pamilya kay sa bisan unsang lain ninyong buhaton.

Pagtuman sa Inyong mga Pakigsaad

Pinaagi sa pagserbisyo, paghigugma, ug paglig-on sa atong mga pamilya, kita nagmatinud-anon sa mga pakigsaad nga atong gihimo atol sa bunyag sa pagbarug isip saksi ni Jesukristo, pagsunod sa Iyang mga sugo, ug paglig-on niadtong naglibut nato. Kita makagamit sa kalig-on sa mga pakigsaad sa priesthood aron mahimong usa ka panalangin ug tabang sa atong mga panimalay ug pamilya: Priesthood, pagserbisyo,ug panimalay mao ang mga pulong nga kinahanglang makonektar sa atong mga hunahuna sa kahangturan. Ang mga miyembro sa atong kaugalingong mga pamilya kinahanglang mao ang unang prayoridad samtang kita mangita og mga paagi sa pag-apil sa buhat sa kaluwasan. Kon kita naglig-on sa atong mga pamilya, gilig-on usab nato ang Simbahan, ang atong mga komunidad, ug ang kalibutan.