Sunda ang Propeta
Gikan sa debosyonal sa Church Educational System nga gipamulong sa Brigham Young University–Idaho niadtong Mayo 5, 2013. Alang sa kompleto nga teksto sa Iningles, bisitaha ang lds.org/broadcasts.
Samtang kita nagsunod ni Presidente Monson ug naningkamot nga mahisama kaniya, kita molampus gayud nga mahimong mas matinud-anong mga disipulo ni Ginoong Jesukristo.
Pipila ka tuig ang milabay, sa hapit na ang kinatibuk-ang komperensya, si Presidente Thomas S. Monson mitudlo og talagsaon nga leksyon. Nahitabo kini atol sa panagpundok sa mga General Authority kinsa mibiyahe sa Siyudad sa Salt Lake, Utah, daghan gikan pa sa laing mga dapit sa kalibutan kon asa sila nagserbisyo isip mga Area Presidency. Kami nagpundok aron matudloan sa Unang Kapangulohan ug sa Napulog Duha ka mga Apostoles.
Samtang nagkaduol ang miting, ang tanan ingon og anaa na gawas lang ni Presidente Monson. Pipila ka minuto sa hapit na magsugod ang miting, mihunong kami sa pakig-istorya sa usag usa ug milingkod uban sa balaang pagtahud sa pagpaminaw sa pasiuna nga musika, naghulat sa pag-abut sa propeta.
Kami mapailubong naghulat sa dihang alas-9:00 na sa buntag ug milapas na. Usa ka tawo migawas agi sa kilid nga pultahan—sa pagsuta kon aduna bay gikinahanglan nga tabang. Sa pagsulod og balik, siya miingon, “Si Presidente Monson moapil kaninyo sa dili madugay.”
Mga 15 minutos ang milabay, si Presidente Monson misulod sa kwarto. Agi og pagtahud, kami mibarug sa dihang misulod siya. Kami nalipay nga nakakita kaniya ug nahimuot nga maayo siya. Wala mahibaloi unsay hinungdan nganong nalangay siya.
Midiretso si Presidente Monson ngadto sa pulpito ug miingon, “Mga Kaigsoonan, pasayloa ko nga nalangay ko, gikinahanglan ko sa akong asawa karong buntaga.”
Nakadayeg ko og maayo ug napaubos, ug dili ko makapugong sa paghunahuna kabahin sa iyang mga pulong.
Kini importante kaayo nga miting. Ang tibuok senior nga pagpangulo sa Simbahan nagpundok, apan mipakita og ehemplo si Presidente Monson kanamong tanan. Nagkinahanglan ang iyang asawa niya, ug siya migahin og panahon sa pag-atiman kaniya. Talagsaon kini nga wali. Wala na koy laing nahinumduman nga gisulti nianang adlawa, apan akong nahinumduman kana nga wali: “Gikinahanglan ko sa akong asawa.”
Pagsunod sa Ehemplo sa Propeta
Mosugyot ko og lima ka paagi nga kita makasunod sa ehemplo ni Presidente Monson.
1. Kita mahimong positibo, ug mahimong malipayon.
Diha sa Perlas nga Labing Bililhon, si Propeta Joseph Smith mihulagway sa iyang “pagkagaan og buot” (Joseph Smith—Kasaysayan 1:28). Ang “pagkagaan og buot” naghulagway usab ni Presidente Monson.
Kausa si Presidente Monson miingon: “Kita … makapili sa pagbaton og positibo nga kinaiya. Dili nato makontrolar ang hangin, apan atong mapahiangay ang mga layag. Sa laing pagkasulti, kita makapili nga magmalipayon ug magmapositibo, bisan unsa pay mahitabo.”1
Usa ka adlaw nagpaabut ko sa gawas sa boardroom sa Unang Kapangulohan. Gidapit ko didto sa pag-apil sa miting aron sa paghisgot sa mga butang kalabut sa templo. Hilom kong milingkod sa gawas sa kwarto, nag-inusara. Abi nako nga ang Unang Kapangulohan anaa na sa miting ug dapiton ko sa pag-apil kanila sa pipila ka minuto.
Samtang naglingkod ko, nakadungog ko og usa ka tawo nga naglakaw diha sa hawanan nga nanaghoy. Naghunahuna ko, “Adunay usa ka tawo kinsa wala makasabut sa hustong pamatasan. Dili mo maglakaw-lakaw nga managhoy gawas sa opisina sa Presidente sa Simbahan.”
Pagkataud-taud ang nanaghoy naglakaw na sa may kanto—si Presidente Monson kadto. Siya malipayon, ug positibo. Siya mainitong miabi-abi kanako ug miingon, “Tingali sugdan nato ang miting sulod sa pipila ka minuto.”
Bisan sa dakong gibug-aton sa tibuok Simbahan diha sa iyang abaga, siya ehemplo sa kalipay ug kanunay siya nga adunay positibo nga kinaiya. Ingon niana gyud unta ta.
2. Kita magmabination ug mahigugmaon ngadto sa mga bata.
Si Jesus kanunay maghisgot sa mga bata. Ang Iyang propeta, si Presidente Monson, kanunay maghisgot usab sa mga bata. Akong nakita, ilabi na sa mga pagpahinungod sa templo, kon unsa niya kahigugma ang mga bata ug, pinaagi sa iyang ehemplo, nagtudlo kanato unsaon sa pagtratar kanila. Sa matag pagpahinungod sa templo nag-focus siya sa mga bata. Ganahan niyang apilon sila sa seremonya sa bato sa pamag-ang ug kanunay nagdapit og pipila kanila sa pagbutang og mortar diha sa bato sa pamag-ang aron sa pag-apil sa simbolo nga pagkahuman sa templo. Himoon niya kining makalingaw kanila. Himoon niya kining halandumon alang kanila. Kanunay siyang may dakong pahiyom alang kanila. Siya nag-awhag ug nagdayeg kanila. Nindot kaayo kini nga talan-awon.
Ang iyang madasigong pagtimbaya usahay maglakip sa pag-apir, pagpalihok-lihok sa iyang dunggan, ug pag-awhag sa pagserbisyo og misyon ug pagminyo diha sa templo.
Mga pipila ka tuig ang milabay si Presidente Monson na-eskedyul sa pagpahinungod sa Oquirrh Mountain Utah Temple sa iyang adlaw nga natawhan. Sa iyang pag-abut sa templo ug pagduol sa atubangang pultahan sa templo, nagpundok ang grupo sa mga kabatan-onan. Klaro kaayo nga nasayud sila nga adlawng natawhan kadto ni Presidente Monson tungod kay misugod sila sa pagkanta og “Happy Birthday” kaniya. Mihunong ug miatubang siya kanila nga may dakong pahiyom. Gani misugod siya sa pagwara-wara sa iyang mga bukton daw naggiya kanila sa pagkanta. Sa katapusan sa kanta gidugang nila ang mga pulong nga “Ug daghan pa.” Siya miingon ngari nako, “Kana ang akong paborito nga bahin.”
Ang mga bata ug kabatan-onan sa Simbahan nahigugma kaniya, ug sila wala magduha-duha nga siya nahigugma usab kanila!
3. Kita makasunod sa mga aghat sa Espiritu.
Nindot kaayong pagpadayag ni Presidente Monson ang iyang debosyon ngadto sa Ginoo ug sa iyang pasalig sa pagsunod sa mga aghat sa Espiritu niini nga mga pulong: “Ang pinakanindot nga kasinatian nga akong nasayran sa kinabuhi mao ang mobati sa aghat ug mosunod niini ug sa dili madugay masayran nga kini katumanan sa pag-ampo o panginahanglan sa usa ka tawo. Ug kanunay nakong ipaabut sa Ginoo nga kon aduna siyay ipabuhat, si Tom Monson andam nga mobuhat niana alang Kaniya.”2
Kana ang sumbanan nga angay sundon sa kada usa nato.
4. Kita makahimo sa paghigugma sa templo.
Si Presidente Monson mailhan sa kasaysayan isip usa sa talagsaong mga tigtukod sa templo sa kasaysayan sa Simbahan. Sukad nahimong Presidente sa Simbahan niadtong Pebrero 2008, iyang gipadayon ang dakong buluhaton sa pagtukod og mga templo. Sa unom ka tuig nga siya ang propeta, si Presidente Monson mipahibalo sa mga plano sa pagtukod og 33 ka bag-ong mga templo.
Si Presidente Monson miingon, “Unta ang matag usa kanato magpuyo og takus nga kinabuhi, uban sa limpyo nga mga kamot ug putli nga mga kasingkasing, aron ang templo mahimong motandog sa atong mga kinabuhi ug mga pamilya.”3
Siya usab mihatag niining talagsaon nga saad: “Samtang kita naghigugma sa templo, naghikap sa templo, ug nagtambong sa templo, ang atong kinabuhi mopakita sa atong pagtuo. Samtang kita mosulod niining balaan nga mga balay sa Dios, samtang kita mohinumdom sa mga pakigsaad nga atong gihimo sa sulod, makabuntog kita sa tanang pagsulay ug tintasyon.”4
Sundon nato ang sumbanan nga gipakita sa propeta para kanato kabahin sa paghigugma sa templo.
5. Kita mahimong mabination, masinabtanon, ug mahigugmaon.
Si Presidente Monson talagsaon nga ehemplo sa paghigugma sa uban. Ang iyang tibuok pagpangalagad napuno sa pagbisita ngadto sa mga panimalay; pagpandong sa iyang mga kamot ngadto sa mga ulo ug paghatag og mga panalangin; paghimo og wala damhang mga tawag diha sa telepono aron sa paghupay ug pagdasig; pagpadala og sulat sa pagdasig, pagdayeg ug pasalamat; pagbisita sa mga ospital ug care center; ug paggahin og panahon sa pag-adto sa haya bisan sa busy kaayo nga iskedyul.
Sama sa buhaton sa Manluluwas, si Thomas Monson nagbuhat og kaayohan (tan-awa sa Mga Buhat 10:38) ug nagpanalangin ug naghigugma sa uban; kini ang nakapadasig sa iyang kinabuhi.
Usa ka talagsaong ehemplo sa kaayo ni Presidente Monson nahitabo niadtong 2012. Sa hapit na mahuman ang nindot kaayong Brigham City Utah Temple, nakigkita ko sa Unang Kapangulohan aron sa paghisgot sa mga plano sa pagpahinungod niini. Tungod kay ang Brigham City usa lang ka oras sa amihanan sa Siyudad sa Salt Lake, sayon lang unta ni Presidente Monson sa pagbiyahe didto aron sa pagpahinungod.
Hinoon, si Presidente Monson miingon, “Ang Brigham City mao ang lungsod nga natawhan ni Presidente Boyd K. Packer, kining talagsaon nga Apostol kinsa milingkod tupad nako sulod sa daghang katuigan diha sa Napulog Duha. Gusto nakong ihatag kaniya ang pasidungog ug panalangin sa pagpahinungod sa templo sa iyang lungsod nga natawhan. Mopalayo ko, ug i-assign nako si Presidente Packer sa pagpahinungod sa Brigham City Temple. Gusto nako nga iya na kining higayon.”
Usa kadto ka maanindot nga adlaw alang ni Presidente Packer ug Sister Packer, kinsa nagdako usab sa Brigham City. Natandog kaayo ko sa kamabination ug kamanggihatagon nga buhat ni Presidente Monson ngadto sa iyang kauban nga Apostol. Mamahimo kita nga sama niana. Kita makapakigbahin ug magmabination ug mas maghunahuna niadtong naglibut kanato.
Ang Sumbanan sa Propeta
Gitudloan kita ni Presidente Monson sa paagi sa pagpakabuhi sa atong kinabuhi pinaagi sa iyang talagsaon ug makapadasig nga mga mensahe sa kinatibuk-ang komperensya. Gitudloan ta niya unsaon nga mahimong sumusunod ni Jesukristo pinaagi sa iyang talagsaon ug maanindot nga personal nga ehemplo. Sa pagkatinuod, ang Ginoo naghatag kanato og sumbanan sa tanan nga mga butang, ug usa sa mga sumbanan nga kinahanglan natong tinguhaon mao ang pagsunod sa atong minahal nga propeta.
Mopamatuod ko nga adunay Dios sa langit kinsa nakaila ug nahigugma kanato. Siya mihatag nato og propeta—aron sa paggiya kanato, sa pagtudlo kanato, ug sa pagdumala kanato niining ulahing mga adlaw. Nagtuo ko nga ang Ginoo nagdahum nga atong higugmaon ang propeta, paluyohan siya, ug mosunod sa iyang ehemplo.
Giisip nako nga dakong panalangin nga mabuhi sa panahon diin si Thomas S. Monson mao ang propeta sa Ginoo. Samtang kita mosunod kaniya ug maningkamot nga mahimong mas mahisama kaniya, molampus gyud kita nga mahimong mas matinud-anong mga disipulo ni Ginoong Jesukristo.