Ana Tiim te Utu
E maeka te tia korokaraki i Toronto, Canada.
E bon bebete te tokanikai ngkana a uaia ni bane ni mwakuri aomata n tatabemania.
“When we’re helping, we’re happy” (Children’s Songbook, 198).
E ikenrawa Ammon ngke a kitana te takakaro ae te butibooro ngaia ma Tamana. “I aki ota iai,” e taku. “A mwaiti ara taan takakaro aika bwakuaku. Bukin tera ti aki kona ni karekea ara bwii?”
Tamau bon te tia butibooro ae bwakuaku. Tao e kona n ibuobuoki.
“I taku bwa ko kainnanoia n reireiniko ni mwakuri n aron te tiim,” e taku Tamau. “Kam bane n tangiria ni karina ami booro, ngaia anne?”
“Eng,” e taku Ammon. “Ma ti aki ngaira ni kabane taan karekea te bwii. Anne ae ko nanonna”
E ioioa atuuna Tamau. “Ko aki kona ni karina am booro n ti ngkoe. Te moan taan tutuki a kainnanoia n anaa te booro man te tiim are teuana, e koaua?”
E ngare Ammon. “E bon matoatoa karekean te bwii ngkana akea iroum te booro.”
“E koaua,” e taku Tamau. “Ngkanne taan tutuki a na angan temanna are e kona ni karekea te bwii. Akea ae kona ni karaoia n tii ngaia.”
“I katautaua,” e taku Ammon.
Ngke a roko ni mweengaia, e taua te teei Tinau ngke e tabe ni karaoa te katairiki.” e titiraki. “E uara te takakaro?”
“Ti a manga konaaki riki,” e taku Ammon. “Ma ti na karaoa riki ae nakoraoi n are imwiina.”
“Anne te anua ae raoiroi,” e taku Tinau.
“I a bora ni baki!” e takarua Miguel ngke e biri n rin ma Samuel, ao Lucas.
“Ataeinimwaane, kam kona n ibuobuoki ni katauraoa te taibora ao ni kararoai bwaintakakaro?” e bubuti Tinau.
A bane ni ngurengure ataeinimwaane aika a man.
“Ma I aki takakaro n taian bwaintakakaro,” e taku Samuel.
“E na bae ni maan n aki totoki!” E tang n takaerere Miguel.
E ngare Tamau. “I taku bwa iai ana kaangaanga ara utu n aron ana tiim Ammon.”
“Tera te baenne?” e titiraki Samuel.
“Ti aki kaai ni mwakuri,” e taku Ammon. “Ti bane n tangiria ni karekea bwiin ara kouru man kanakin ara katairiki. Ma tia katikui bwaai ni kabane nakon Tinau.”
“E koaua!” e taku Tamau. “Ti na kanga ni mwakuri n aron te tiim?”
Iai ana iango Ammon. “Tera ngke arona bwa Ngai ma Samuel ti katauraoa aon te taibora? Ataeinimwaane ake tabeman a kona n rikorikoi bwaai n takakaro.”
“Te iango ae tamaroa!” e taku Tamau.
E waetata n tauraoi te katairiki. E rukum baina Ammon ibukin te tataro. E kukurei bwa a na utu a mwakuri inanon te tiim. Ana kantaninga bwa kaain ana tiim n te butibooro a kona ni karaoa naba ae ti te arona.
Kamatata n te tamnei iroun Mark Jarman