Au Tataro ni Marawan Meang

Olaf Thorlief Jensen, Utah, USA

Ngke te 17 au ririki, ti maeka n te atimwakoro teuana i Norway maiaki ae atongaki bwa Andabeløy. E rairaki tamau nakon te Ekaretia iaon Andabeløy, ao I bwabetitoaki i taari ikekei.

Bon te tia akawa ngai n te tai anne ao n rangin ni mwatai n tararuan te booti. E anganai te mwiokoaki tamau bwa n na tararua ara taekitii i taari ae kabonganaki irouia kaain te tabo anne.

N te bong teuana n te 1941 ti karekea te tareboon mairoun te taokita i Flekkefjord, nako meang. Te aine ae maeka tao uoua te aoa raroana kaeana n te booti e tangira te bwainaoraki n te tai ae waekoa. E tuatua Dr. Hoffman ngkana I kona n anaia bwa e na noria, ma a raraoma au karo ibukin te angibuaka are biri mai Meangin Taari. Ti iangoia bwa ti na tataro, n tuanga te Tama are i Karawa te bwai ae ti riai ni karaoia. Ti karekea te kaeka bwa I riai ni mwananga.

Ngke I a kabwaka au booti n akawa ae te Tryg, ae 31-te buuti (10 te miita) nako taari, e aki raoiroi tarakin te bong ao a rangin ni bubura naao. Imwiin anakin te taokita, I butinako rinanon te kawai n otinako nako marawa. Ti na mwananga nakon te kaawa i meangin Lista, ae mena iaon bwaan Norway i maiakin mataniwiin te aba—e rangin n ataaki ibukin te angibuaka ao kaibuke aika koro.

I buti rinanon te angibuaka ni karokoa ae ti roko n te tabo n roro ae kiribwa, tao 40 te buuti (12 miita) rinanona, are e kairira nakon ara tabo. A rangin n ririeta naao, are I aki kona ni kabuta raoi te booti rinanon te tabo n rin, ti kabirimwakaira nakon te tabo n rin ao n untabataba ma taian bwaa.

“Tera ae ti riai ni karoaia?” e titiraki te taokita ni kaitara te ang ae korakora.

“Ti riai n tataro ibukina,” I kaeka.

I toki teutana ao n tataro, n tuanga te Tama are i Karawa ibukin te kawai. N te tai naba are I taekina amen, e roko te kaeka ae itiaki nakoiu. I waekoa n uringa a na karaki te tia akawa ae a karakinna nakoiu. Bwa e a tia n akawa n te tabo aei ngkoa ike e roko iai tain te angi buaka ae korakora ao n aki kona n otinako nako tinaniku. Ngke e tataninga tokin te angibuaka, e nora aron birin naao aika roko. Imwiin rokon naao aika bubura n rin, e irianaki ma te raoi n te tai ae uarereke imwiina—ae tau ibukina n rin nako nanon te tabo n rin.

I a tia n akawa n te tabo aei ma I tuai n ata aron birin te nao. I uota te boti nako matan te tabo n rin, ike ti tataninga ao n taratarai naao ake tenua ngke a rin. E koaua, ae e reke te raoi n te tai ae tawe. I kabuta te booti nako aon taari ae raoi nako nanon te tabo n rin ao ni uota Dr. Hoffman nakon te aba. E kawaekoa nakon te aine ae aoraki ngke I tataningaia n te booti, e rarabwa te Tama are i Karawa bwa e a tia ni kaeka au tataro.

Ngke e oki te taokita tao teuana te aoa imwiina, e taku, “Ti a tia ni kamaiua!”

Ni kamaiuaki man te rongorongo ao kerikakin te ang, I kabuta te booti n oki nakon mweengara n akea te kanganga.

I kaota au koaua bwa ngkana ti kainnanoa te ibuobuoki, ti riai n tataro. I ataia bwa te Tama are i Karawa e na bon kaeka.

A rangin n ririeta naao are I aki kona ni kaineta te booti nako nanon te rawa.