Mweengara, Ara utu
Nanon Lizochka
E maeka ngkai te tia korokaraki i Belgium.
Kamataata n te tamnei iroun Annie Henrie
Ngai ma kaainabau ti kaaina te Ekaretia i Rutia inanon 1995 ao ni kabaeaki n te ririki are imwiina i Stockholm Sweden Tembora. Natira aika uoman aika kairake n ataeinaine a kabaeaki naba nakoira. Uoua te ririki imwiina riki ao ti a kakabwaiaaki ni karekea temanna riki natira te aine, Lizochka, e bungiaki nakoira. Aron maiura a bon nako raoi. Ti bon bane ni kukurei. Ma uoua te bong imwiin bungiana, natira ae uarereke e moanna ni iai ana kaangaanga n amarakena. Inanon teuana te namakaina rawawatana e rikirake ni kekerikaki nakon tii uoua te katenimwakoro te rawawata (300 te kuraem).
Taani mwakuri n aia tienta ataei n te onaoraki a tuangiira bwa ti na kabatiaa riki te tai ni kakamwarakea. I nooria bwa e tangiria ni kan amwarake ma e aki kona. N tokina, kaainabau e uotia nakon te onaoraki n te kaawa ae bubura. E waekoa te taokita n anganiira mwiin te tutuo―iai buakakan buroona ngke e bungiaki. Teuana buunongin buroona e aki mwakuri, ao buakakan butin te raraa nakon mamaana e a karekea te kaangaanga nakoina ibukin ikeikeina ke amwarakena.
E kainnanoa te korokoro, ma i Rutia ataei ake tenaan kabanea ni uarereke ake a na karekea te korokoro aio bonuoua aia ririki. Natira te aine ai bon tibwa teuana ana namwakaina ni maiu. Te taokita e kabwarabwara aron tokin aorakina ao n taku bwa imwiina riki, ngkana e a ikawai riki, a na karaoa te korokoro.
Teuana te namwakaina riki imwiina, marurungin Lizochka e waekoa n rikirake n rangi ni buakaka, ao ti waekoa ni uotia nakon te onaoraki. I tobwaia ngke ti buti. E taraai n aiaron ae e bubuti ibukin buokana. Ngke arona bwa I tuai n riki bwa kaain te Ekaretia, I aki ataia bwa tera ae N na tia ni karaoia. Ma kaainabau ao ngai ti onimakina te Uea ao ni matoatoa ni kakoaua bwa a na bane n tamaroa bwaai ni kabane. I kataia ni karaua nanona, man taku, “Tai maaka te bwai teuana, natiu ae uarereke. Te Atua e tangiriira. E na buokiira, ao bwaai ni kabane a na Nakoraoi.”
N tokina ti a roko. Ngke I mwaneia ni katenaa ma ngai, I biri nakon te tabo ni butimwaai n te aoraki. Matan Lizochka a moanna n iin. E aikoa ikeike. N aki kona n taetae, I tuanga te taokita taekan natiu, ao taan mwakuri n te onaoraki a uotia nakon te iunite are e tararuaki iai baika a kakaiaki. Te taokita e taku bwa mamaana a moanna n tibutau, ao a katoma ma te mitiin n ikeike.
Te bong are imwiina ti taetae ma te tarekita n te tabo ni korokoro n te burooo. E taku, “I a tia ni karaoi aeka ni korokoro aikai ma tii temana te ataei ae e ikawai riki. Ai roro ra neiei ngkai?”
“Uoua te namakaina,” ti tuangnga.
“E a kaman n rangi ni korakai. E bon rangi ni uarereke, ao tibutauan mamaana e a kariki kaangaanga nakon bwaai, ma ti riai n aki katikua ni kamaanna riki. I tuai man karaoa te aekaki ni korokoro aio nakon te ataei ae uareeke. N na kataia ni karaoa au kabanea ni kona. Kam na riai ni kabooa te buunong ae taboro ae karaoaki, ma e rangi ni bobuaka―e kaania $2,100. Te korokoro e na karaoaki inanon aua te bong.”
Tera ae ti na karaoia? Tiaki ngaira ke tiaki ataa temanna ae iai ana mwane n aron anne. E ngae n anne, ara kaangaanga e a roko nakoia tabeman, ao rinanon aia tituaraoi ao ana nanoanga te Uea ti a kona ni karekea te mwane. Kaainabau e kabooa te buunong are ti rang ni kainnanoia bwa e aonga ni katanaki maiun ara ataei.
Tiaki tii ni kabane taarira ma maneraa n ara mwaanga aika tataro ao n aki mamatam ibukin natira te aine ae uarereke ma ai aroia naba mitinare ao Aomata aika Itiaki ni Boong Aika Kaitira inanon te kaawa ae bubura. Ti namakina aia boutoka. N tekatekara inanon te ruu ae bubura ni bongin te korokoro, ti namakina rokon te Tamnei ae Raoiroi ao n namakina aia tataro tarira ao mwaanera. Ti ataia bwa a bon mena irarikira! Ao te Atua bon bon raora, e kairiia taan korokoro. E na bon aki kitaniira, ao bwaai ni kabane a na bon nakoraoi.
Ngke e a otinako te tia korokoro imwiin ana korokoro, teuaei, kanga e taraa n nanououa, e tuangiira, “A nakoraoi bwaai ni kabane. Ti a karina te buunong. I aki ataia bwa e kanga aron karinana, ma e tokanikai karinana.” Ma ti ataia bwa e kanga n tokanikai karinana. Te Tama are i Karawa e bon kakabwaiaa.
Lizochka e tiku inanon te onaoraki inanon teniua riki te bong i bukin tibutauan buroona ao mamaana a moana ni kerikaaki. E a tia ni koreaki ni katangainaaki ao n ituaki ni kainaki man te kun ae mmanii bwerebwere, ao tabeua te bong imwiina riki a manga korokoro riki ni kaina bwabwaana ao bwain rabwatana. A kuri n akea taokita ae a kantaningaia bwa e na maiu. Ma iai ara kakoaua iroun te Tama are i Karawa ao inanon mwaakana, ao ti kakoaua bwa ngkana bon Ana Kantaninga, e na marurung.
Tii te Atua ae e kona ni kaoka nakoira Lizochka ae natira. Ma ni katoabong, e rikirake ni marurung. E tiku inanon te onaoraki teuana riki te namwakaina, ao ngkai ai raora inanon mweengara.
Te Atua bon Atuan taian kakai. E ongo ara tataro, ao inanon ara tai aika matoatoa, E uouotiira. Kakatai e kakorakora ara onimaki ao e reireiniira bwa ti na onimaki, e na iai ara kantaninga, ao ara tangira.