Ti Taekina Taekan Kristo
Te Kabiti ae Karaoaki man Atiibu aika Raneanea n Tirika
E maeka te tia korokaraki i Utah, USA.
Iaon au mition i Taiwan, ngai ma toau ti kabanea ara tai ae uarereke n te bong teuana n te tai ni katauraoi n te National Palace Miutiem i Taipei. Te bwai are e katika matan te noo bon te rabakau ni karao banna ae aranaki bwa te Kabiti ae karaoaki man te atiibu ae raneanea n tirika. Ngaia are angiina aomata a bwakananoia iai, ma te bwai ae I bon tii nooria bon te kabiti ae kaaraki man kabiraki ae karaoaki man te atiibu ae raneanea man tirika. E rangin tamaroa taraakina, n akea te nanououa iai, ma e na bon bae n iai te bwai teuana ae I miti.
Ngke e a tia tabera n te miutiem, I titirakina toau, “E aera ko a bon katuua iangoan te Kabiti ae karaoaki man te atiibu ae raneanea n tirika?”
“I tangira te rabakau ni karao banna anne!”
“Bukin tera?” I titiraki. “Kioina ngkai bon tii te kabiti.”
“Ko manikangare? Te Kabiti ae karaoaki man te atiibu ae raneanea n tirika bon te taetae ni karariki are e kabwarabwara maiu!” e katanoata neiei.
“Te kabiti?”
“Eng. Ko aki ataa te rongorongo?”
“Taraan ae I aki.”
E a kaongoai te rongorongo. Ao e boni koaua. E riki bwa te taetae ni karariki ibukin au mition ao maiu.
Ibukin karekean te atiibu ae kaaraki ae raneanea n tirika bwa e na rang kakannato man kakawaki, e riai te atiibu ae raneanea aei ni matoatoa ma karana ae tii te matana. Baika a kaaraki aika karaoaki man te atiibu ae koro raneaneana a kabonakoaki n te boo ae bobuaka ibukina bwa a bon kuri kaangaanga aron kunean aekaki n atiibu ae koro tamaroaia aei. Te Kabiti ae karaoaki man te atiibu ae raneanea e bon kiriin tabona ao e mainaina n iterana are teuana, ao iai bwangabwangana ao e kiritibutibu. Akea temanna te tia kaakaari ae e na kabanea ana tai iaon te mwakoro n atiibu ae raneanea ae aekakin aei, ni karokoa are e kaoti temanna are a aranna Itiaina bwa te mwaatita n te kaakaari ae bane arona.
Ngkana e kona n taetae te atiibu ae raneanea aei, I kona n iangoa te maroro bwa e na irekereke ma te tia kaakaari ae boou. I iangoa te tia kaakaari ae tabeka te mwakoro n atiibu ae raneanea aei.
“Tera ae ko tangiria?” e na bae n titiraki te atiibu ae raneanea.
“I tabe ni kakakaaea te atiibu ae raneanea ae e na kaaraki,” e na taetae te tia kaakaari.
“Ngkanne kakaea te mwakoro teuana. Ngai akea manenau. Iai uoua karan rabwatau ae a renganaki are ko na aki kona ni karaurenakoi. Iai bwangabwangau ao ni kiritibuitibu. A na bon akea manenau. Tai kabanebuaka am tai.”
“O, te atiibu ae raneanea ae uarereke ae nanoroo. Onimakinai. Bon te mwaatita n te kaakaari ngai ae bane arou. N na karaoiko bwa te tia rabakau ae e koro arona.”
Tera are e karika rangi n tamaroan te Kabiti ae karaoaki man te atiibu are raneanea bwa te mwaatita n te kaakaari ae bane arona aei e kabongana mamaaran te atiibu ae raneanea―kaara aika uoua, bwangabwangana, ao te kiritibutibu―ni karaoa te kabiti bwa e na taraa n ae maiureirei. Te mwakoro are e mainaina ae matoatoa e riki bwa boton te kabiti, ao te bwangabwanga ao te kiritibutibu a karika te baanikai bwa e taraa ni maiu. Ngke arona bwa tiaki ibukin “mamaaran” te atiibu ae raneanea, e na kona n ae e na aki taraaki n aiaron raoi teina.
Ibukin tikauarerein te rabakau ibukin te banna aio, e a riki bwa te bwaintangira ibukin temanna te bwaanuea iaon Tiaina ao ni katamaroai ruun ana baareti aika bubura man tamaroa i Atia ni karokoa are n te kabane ao e a kamenaaki n te miutiem i Taiwan.
E kauringai taekan Ita 12:27: “Ngkana a roko aomata nakoiu N na kaota nakoia mamaaraia … E tau au akoi nakoia aomata ni kabane ake a kananorinanoia i matau, ma n onimakinai, ao ngkanne N na kakorakorai mamaaraia nakoia.”
Imwiin nooran te Kabiti ae karaoaki man te Atiibu ae raneanea, te boki ae tabu ae e a moanna n iai nanona ae boou. Ngaira ni kabane bon tii te arona ma te mwakoro n atiibu ae raneanea aei, ma tii ngkana ti bon teimatoa naba n ira waakin te kaakaari ibukira. Ti riai n onimakina te mwaatita n te kaakaari ae bane arona, Iesu Kristo, are e na anai mamaarara ao ni karikii bwa korakorara. Ngaira, n ara taratara ae aki tau, n tabetai ti kabotoi ara iango iaon arora aika aki tau ao ngkanne ti nanorawawata ibukina bwa ti taku bwa akea manenara. Ma ara Tia Kamaiu, Iesu Kristo, e nooria n aron ae ti riki iai. Ngkai ti butimwaea ana Mwakuri ni Kamaiu bwa e na roota maiura, E na karikiira nakon te aro n rabakau ao ni konabwai are e na maeka n te bong teuana ma aia King king.