Titiraki & Kaekaaia
Tautaekaanakin am iango e kanganga, ma e bon kona ao n uoti kakabwaia: “Ngkana ko reiakina tararuaan am iango, ko kona n tokanikai iaon anuai, are kakeakin bonganan ana katei te aomata. Ko kona ni karekea te unga n nano, n tokanikai iaon te maaku ao ni karekea te maiu ni kukurei.”1
Iangoi naba kakabwaia aikai:
-
Iango aika itiaki ana buoka “mwiokoam ae korakora ma ni matoatoa i matan te Atua,” ao “te Tamnei ae Tabu e na riki bwa raom n tainako” (taraa D&C 121:45‒46).
-
Iango aika itiaki a na buokiko ni kinaa te kairi, ibukina bwa te Tamnei are Raoiroi e taetae nakon nanom ao am iango (taraa D&C 8:2‒3).
-
Iango aika itiaki a na buokiko n ongeaba nakon te moan tua ae korakora: n tangira te Atua n nanom ni kabanea, tamneim ni kabanea ao n wanawanam ni kabanea (taraa Mataio 22:37).
A mwaiti bwaai aika ko konai ni karaoi ni kaitiaka te iango, are ko konai n noori man taian iango iaon iteranibaa aikai. Ma teuana te oi ni bwai ae ko kona ni karaoia―tokanikaim iaon te “anua n aomata.” Te anua ni mwane ao te anua n aine e tatangira te iango ae aki itiaki. Aio aron konaakina. “Bon ana kairiribai te Atua te aro n aomata … ao e na teimatoa n aki toki, ni karokoa ae e kakauongo nakona ana wirikiriki te Tamnei ae Tabu, ao e na kakorakora nakon te aro n aomata ao n riki bwa ae itiaki rinanon ana mwakuri ni kamaiu Kristo ae te Uea, ao n riki n aiaron te ataei, n ongeaba, n ongotaeka, n nanorinano, n tataonakinnano, n onrake n te tangira” (Motiaea 3:19).
Tera te bwai teuana ae ko kona ni karaoia n te bong aei ni karika Ana mwakuri ni Kamaiu te Tia Kamaiu ni uota te bitaki aio nakon maium?
Kareke Rongorongo ao Raao
Te tabo ni waaki ae tamaroa bon rinean tamnei aika kakukurei, anene, ao te wareware. Rineia raom aika iriko aika kam kona ni kawakin maroro aika riai ao mwakuri aika raoiroi. Ngkai iai iroumi bwaai aika raraoi aika kam kona ni iangoi, ko na rikirake ni kunea bwa e bebete kamaunaan iango aika bubuaka, ao a na aki manga oki n roko.
Amber S., ana ririki 18, British Columbia, Canada
Tataro
E uotai ni kaniai te tataro nakon Tamara are i Karawa ao e buokai ni kabanea au tai iaon iango aika raraoi.Kamatebwaiakin booki aika tabu e kakorakoraa onimakinau n tokanikai iaon kariiri; inanon booki aika tabu I kona n noori katoto mai rouia ana reirei Kristo aika kakaonimaki. Kaotakin au koaua e kona naba ni buokai ni kawakina au iango bwa e na itiaki.
Dasha M., ana ririki 17, Kyiv, Ukraine
Koroboki Aika Tabu
Warekan booki aika tabu ni katoa ingabonga imwain te reirei e ibuobuoki. Ni waetatan reken te iango ae buakaka irou, I a ieniikuri n onea mwina n ae tamaroa riki. N onea mwiin ae tii te kangai, “Tiaki, Tai iangoa anne” (ae bon te bwai ae raoiroi be na karaoaki), onea mwiina n te iango ae raoiroi. Uringa, Ko bon tautaekana am iango, tiaki Taatan, Ngaira Natin Tamara are i Karawa mwaane ao aine aika ninikoria ao ti kataia ni karikirakeira.
Nick C., ana ririki 16, Arkansas, USA
Raoiroi ke Buakaka
Ko aki kona ni kaira am iango be nako ma ia, ma ko kona n taua taekan tikuna. Ko kona n titiraki: E na raoiroi nakoiu te iango aio? E na buokai nakon te tabo ae e eti? Ngkana e roko te iango ni kariri n am iango, anenea te anene ae raoiroi, iangoa te ururing ae mamate nanom iai, ke tataro. Bon aron onean mwin te iango ae buakaka n ae rairoi.
Lisa P., ana ririki 17, Denmark
Ana Katoto Riaai
Inanon 1 Nibwaai 15:27; E taekiniia kanoana Nibwaai bwa tamana, e nora te kaotioti ibukin te kai ni kamaiu, are katobibiaki n te barekareka. Ma Riaai e aki ata te barekareka bukina bwa “ana iango [e] kamaunaki ni bwaai tabeua.” Aio are taua te koaua ibukira n te bong aei. Ngkana ti tangiria ni kan kaonaki n te raoiroi, tataroakinna, ao kaatuua iangoan bwaai aika raraoi, ao ngkanne ara aingo a na onrake n te raoiroi ao te tamaroa bwa iango aika bareka a na akea korakorai n tiku iroura.
Hattie W., ana ririki 16, Arizona, USA
Anene n Taromauri
Anene n taromauri a kona ni buokirani kaitiaki kin ara iango. Anene aika raraoi a tabekaarakea te tamnei. Ngkana I kona ni kakauongo nakon anene n taromauri, A aki toki n tabekairake nakon te aonaaba ae ai aron te tiretio ae rangin rau. A buokai ni uringa ana tangira Tamara are i Karawa ibukira n tatabemaniira, ao e kabebetea totokoan te kariiri.
Amanda A., ana ririki 18, Amazonas, Brazil
Kamatebwaian booki aika tabu n te utu
Ngkan a roko iango aika aki itiaki inanon au iango, I kataia ni uringi koroboki aika tabu aika I wareki ma au utu n te moan ingabong. Ni katoa ingabong n te aoa 6.00, a wareki koroboki aika tabu kaain au utu. E boni moan taai, ma bon te kakabwaia ao e anganai te namakina ae korakora inanon te bong anne.
Elena W., ana ririki 16, Switzerland
Te Toa
Tataron te toa e kaotia bwa ngkana ti katoka iaora aran Kristo, ni kawakin Ana tua, ao ni uringa n tainako, E na mena iroura Tamneina. Man uringakina, E na mena Tamneina iroura. Man ururiingakina, iai ara konabwai ni kanakoi iaongo n aonaaba ao ni kababanei ara iango iaon baika akea tokiia. Ngkana ti ururiingnga n aki toki, ara iango, te bwai ae ti tangiria, ao mwakuri a na bitaki nakon ae tamaroa riki.
McKay M., ana ririki 18, Utah, USA