Rikanaan ro ilo Kalim̧m̧ur M̧okta
Jeremaia
“Jeremaia eaar mour ilo tōre im jikin ko reppen, ak Irooj eaar kōtļo̧k an mour ‘juon tōre in kōjatdikdik ilo koba eo an Israel ilo raan-ko āliktata.’”1 —Linda K. Burtōn, būreejtōn eo an Doulul eo Eutiej an Kōrā, eaar ba:
Pija in lemlem eo jān dimdimich/iStock/Thinkstock; Jeremaia, jān Walter Rane © IRI
N̄an nejin Hilkiah, juon pris in Anathoth, epaake Jerusalem. Tōre ko ij jodikdik, “naan in Irooj eaar itok n̄an eō, im ba,
“M̧okta jān Aō kar kōm̧anm̧an eok ilo lo̧jien jinōm̧, Iar jeļā eok, im m̧okta am̧ kar ļotak jān lo̧jien, Iar kōjenolo̧k eok, im Iar kapit eok juon rikanaan n̄an ri aelōn̄ ko.”
Iaar en̄jake aō jab pojak n̄an kūr in, im iaar ba, “Lo, Ijjab jeļā kōnnaan: bwe n̄a juon ajri wōt.”
Irooj eaar ba, “Kwon jab ba, n̄a juon ajri wōt: bwe kwonaaj etal n̄an aolep jikin ko Inaaj jilkinļo̧k eok etal ie, im kwonaaj ba aolep men ij jiron̄ eok.
“Kwon jab mijak mejāer: bwe N̄a ippam̧ n̄an lo̧mo̧o̧ren eok.” Innām Irooj eaar “en̄n̄ūr lo̧n̄iū” im likūt naan ko.2
Iaar kannaan ilo Jerusalem enan̄in 40 iiō ko, jān 626 n̄an 526 b.c., tōre ko an kiin̄ Josiah, Jehoiakim, im Zedekiah.3 Iaar mour ilo ejja tōre ko an rikanaan Liai ilo Bok in Mormon. Kōm̧ ar jim̧or jiron̄ armej ro renana ilo Jerusalem im jiron̄ kōn jorrāān eo an jikin eo eļap.4
Irooj eaar jiron̄ eō bwe in lo̧o̧ki kanaan ko aō ilo “juon bok lemlem.”5 Ke Kiin̄ Hehoakim eaar ron̄ kōn kanaan ko, eaar tile bok lemlem eo. Irooj eaar bar jiron̄ eō n̄an bar je kanaan ko im kobaik elōn̄ļo̧k.6
Iaar ioon jum̧ae ke iaar kwaļo̧k naan ko an Irooj. Pashur, nejin kōpna eo eutiej, eaar den̄te eō im likūt eō ilo kaje. Rinana ro rekōņaan bwe in mej kōn kwaļo̧k ko aō. Iaar juon rikanaan eo ejej bōnbōn in, ekkā aer likūt eō ilo kalbuuj. Iaar mour ilo juon tōre eo elukkuun nana.7
Ak jekdo̧o̧n mour ilo iien inepata, Irooj eaar kōtļo̧k eō bwe in lo bwe riIsrael ro ren kuk ippān doon ilo raan eo āliktata, bwe Irooj eaar je kien eo an “ilo būruweer,” im bwe En bōktok er “juon jikin kweilo̧k, im ruo jān juon jowi” n̄an Zaion.8
Ke ij kwaļo̧k wōt kōn naan in Irooj—men̄e eaar pen—Iaar jeļā kōn aō wūjlepļo̧k kōn gospel in eaar tōlļo̧k n̄an aenōm̧m̧an. Ilo ad kōļapļo̧k an juon make jem̧jerā ippān Irooj, jemaron̄ en̄jake kōjatdikdik ilo iien apan̄ im būrom̧ōj.