Burabeti n te O Tetemanti
Ieremia
“E maeka Ieremia n te tai ao n te tabo ae korakora iai te kaangaanga, ma te Uea e anganna te kariaia bwa e na moantaai n noora ‘te tai ni kantaninga n tain manga ikotakin Iteraera ni boong aika kaitira.”’1 ―Linda K. Burton, beretitenti ni kabuta n te Botaki n Aine
Tamnein te ninira ni boki iroun dimdimich/iStock/Thinkstock; Ieremia, iroun Walter Rane © IRI
Bon ngai natin Ierekia te mwaane, te ibonga iaon Anatota, irarikin Ierutarem. Inanon au tai ni kairake, “e roko ana taeka Iehova irou, ae kangai,
“Ngke I tuai ni karikiko i nanon te biroto ao I ataiko, ao ngke ko tuai n oti nako mai nanon te biroto ao I tabuiko; I motika bukim ba te burabeti nakoia botanaomata.”
I namakinna te aki tauraoi n te wewete aei, ao I taku, “Akea ngai, te Uea ae Iehova! Nooria, I babanga taetae: ba te tei ngai.”
Ma E taku Iehova nakoiu, “Tai kangai, Te tei ngai: ba ane I kanakoko nakoina ao ko na kawaria, ao ane I tuangko ao ko na taekinna.
“Ko na tai maku irouia: ba I memena iroum ni kamaiuko” Imwina E arora baina te Uea “ao e riinga wiu” ao e karini taeka inanona.2
I taetae ni burabeti iaon Ierutarem ibukin 40 te ririki, man 626 nakon 586 b.c., inanon ana tai n tautaeka Iotia, Ieoiakim, ao Tetekia.3 I maiu n te tai ane tii te arona ma te burabeti ae Riaai n ana Boki Moomon. Ti kaai ni kabuakakaia aomata aika buakaka i Ierutarem ao ni moantaai n taekina uruakan te kawa ane e korakora anne.4
E tua nakoiu te Uea bwa N na korei mwiin au taetae ni burabeti inanon “te nira ni boki.”5 Ngke e ongo taian taetae ni burabeti te Uea ae Ieoiakim, e kabuoka te nira ni boki. E tua te Uea nakoiu bwa N na manga korei riki taian taetae ni burabeti ao ni karin riki aika mwaiti nako iai.6
I teimatoa n rinanon te kaitara ngkai I taetaekina ana taeka te Uea. Batiura, natin te mataniwi iaoia taan tautaeka, e oreai ao e kamenaai inanon bwaai ni kabaebae. A tangiria ni kan tiringai koraki ni kamwarua ibukin taetaekinan te euangkerio irou. Bon te burabeti ngai ae I aki kinaaki, angin te tai I karenakoaki n te ruu iantano ao n te auti ni kaikain. I maeka raoi inanon te tai are e korakora iai te buakaka.7
Ma n aki tabe ma te maeka ribuakon te karawawataki, te Uea e anganai te kariaia bwa N na moantai n nooria bwa Iteraera e na ikotaki n te kabanea ni bong, bwa te Uea e na korea Ana tua “inanoia,” ao bwa E na uotiia “tatabeman man kaawa nako, ao kaka uoman man utu nako” nakon Tion.8
Ngkai I teimatoa n taetaekina ana taeka te Uea―e ngae ngke e boni kaangaanga―I reiakinaki bwa te motinnano man te nano nakon te euangkerio e kairiko nakon te rau. Ngkai ti karikirakea ana iraorao te aomata i bon irouna ma te Uea, ngaira ni kabane ti kona n rinanon te kantaninga ribuakon te kataaki ao te karawawataki.