E Tangiriko

Alice Victoria Weston-Sherwood, Arkansas, USA

I tekateka ni konan ruun te tiretio irarikin te aokan n tain katabuan te Memphis Tennessee Tembora. Beretitenti James E. Faust (1920–2007), te membwa n te Moan Beretitentii man te 1995 nakon 2007, e roko bwa e na katabua te tembora. Ngaia ma taan kairiiri ake tabeman a tekateka irarikin te bwai n taetae. Ana kuaea te Ekaretia n te tabo a rin n te ruu ao a tei ibukin Beretitenti James E. Faust ao taan kairiiri ake tabeman.

Te ataeinaine ae te tia reirei ni kakawari bon kain te kuaea. Inanon te bootaki, I tataro bwa e na karekea te bwai are e roko ibukina. E taekinna ni karaba nakoiu bwa e roko ibukin katabuan te tembora n te bong arei ni kakaea ana iango te Uea. E a tia ni karaoa te bure ae kakaiaki n taai aika nako, ao e taku bwa e a tia n rairananona, ao e teimatoa ni kekeiaki n namakina ae raoiroi ibukina ao namakina ae raoiroi ngkana e nako n anene n te kuaea.

I karekea taraan Beretitenti Faust, n namakinna ngkai ngaia, te tia tei ibukin te Uea n te Moan Beretitentii, e tangiria ni karaoa te bwai teuana. Ma n na kanga n tuangnga, ao e na kanga ni karaoa te bwai teuana? Imwiin te bootaki, e na otinako man te ruu n aron are e moan n rin iai, ao a na akea te kabwarabwara, akea te iobai, ao akea te taetae ni kawai. I ataia bwa e tabetabe man iai babaire ni mwanangana, ma I teimatoa n tataro.

Beretitenti Faust, e tarai ma te iango ae korakora n te tai ae aki maan—mwatireti n ana ari a ikotaki. Ngke e a bane te bootaki, te kamatata ae kakukurei e kaonaki moana ma te oota.

E a manga taraai riki ao n te tai ae aki maan e teirake, n tannako, ao n takin baina nako mooa n aron are e kona ni karaoia. E berita nakon raoraou. Imwiina e taekiinna ma te aki raraoma ao n takarua, “E tangiriko te Uea!”

Ana kanikina Beretitenti Faust e uareereke ao man aki kanganga ao e korakora are e na kona n roko mairoun te Tamnei ae Raoiroi n reitaki nakoina te bwai ae I aki kona. Taeka tabeua aikai a kakabwaiaia raoraou ao n teimatoa ni kamatoatoa au onimaki are e tabeaianga te Uea n rongorongon maiura ao “bwa man bwaai aika uarereke man aki kanganga” (Aramwa 37:6).