I Ongo Bwanaia Ataei

Joy Cromar, California, USA

Aorakin te iango bon te bwai ae I aki tangiria bwa n na manga rinanona riki. Ma imwiin are akea irou inanon 12 te ririki, e a manga riki.

I maaku ao I rangin n un. I titirakina te Tama are i Karawa ao n tataro ibukin te korakora bwa n na tokanikai iaona rinanon katakiu. I tang naba nako Ina bwa e na aki maan aorakiu nakon nimaua te ririki, n aron are e riki n te kabanea n tai.

Iai natiu ma kainabau aika teniman, uoman te mwaane ao temanna te aine, ake a tia ni kakabwaiaira ma 13 tibura. Atakin te aoraki ae I rinanona, natiu te aine e barongaa te bong n aki mamatam ao n tataro ma kain te utu. Ni kabane tiibu ataei, man te ririki 1 nakon 10, a tangiria n tataro ibukin tibuia te unnaine, ao teniman ake a tia ni bwabetitoaki a tangiria n aki mamatam. Bon te bwai ae karaunano atakina ae kainabau, ataei, ao tibu a na karaoa aia aki mamatam ao n tataro ibukiu.

N te bong are imwiina ngke I uti man matuu, namakinan te aoraki e tara n aki rangin ni korakora. Te bong are imwiina e a kerikaki riki. N te kanimaua ni bong ao ai bon akea aorakiu. N te tairiki anne, ngke I tabe n iangoia bwa e kanga n riki te kakai anne, te bwana e ringa nanou ao e taku nakoiu, “I ongo bwanaia ataei.” E a tia te Tama are i Karawa n ongo bwanaaia ni bubuti ao e a tia ni kaekai aia tataro n nanorinano, n onimaki, ao n tangira.

E reirei te Tia Kamaiu:

“E koaua ae I tuangkami ba ngkana kam aki rairaki, ao ngkana kam aki katotong aroia ataei aika uarereke, ao kam aki rin n uean te Atua.

“Ma ngaia aei, ba ane e karinanoa n ai aron te ataei aei, ao moan te kakanato n uean te Atua” (Mataio 18:3–4).

I a tia ni koro reta ma tibu ao I kaitauia ibukin aia aki mamatam ao aia tataro ibukiu. I tuangia bwa I tangiria. I tuangia bwa e a tia te Tama are i Karawa n ongo bwanaia ao ni kaekai aia tataro.

Ngkai a ikawai tibu n te euangkerio, au kantaninga bwa a na bon uringa te tai are e taetae iai te Tama are i Karawa nakon tibuia te unaine, “I ongo bwanaia ataei.” Ao au kantaninga bwa te atatai anne e na kakorakora aia kakoaua ao ni buokia n tei ni matoatoa n te euangkerio.

Ni kabane tiibu, aika 1 nakon 10 aia ririki, a tangiria n tataro ibukin tibuia te unaine, ao teniman ake a tia ni bwabetitoaki a tangiria bwa a na aki mamatam.