Ieta Iaon te Ran
E maeka te tia korokaraki i Utah, USA.
I a tia ni bubutia ma te Tama are i Karawa bwa e na kanakoa nanou ao rawawatau, ma n akea kataaki aikai, N na bon aki roko nakon te “aba ni berita” ra are E kairai nako iai.
Tao onoua namwakaina imwiin reken au beeba man te reirei ae rietata, I moanna n rinanon namakinan te aki rau, namakinan te raraoma, ao namakinan te rawawata n te tai ae waekoa. Akea atakina bwa a kanga n reke aekan namakin aikai, ma a rangin ni korakora ao ni kamamaara.
I kataia n tokanikai iaoia. N te mwakuri, ngkana iai te mwakuri ae boou e karika te nano anne are I aki kona n te tekateka raoi iai. E na nako nanou, ao e na tata buroou n ae rangin ni korakora are I taku bwa e nang otinako man bwabwaau. E na reiti nako aei inanon boong aika mwaiti, ao imwiin okiu ni mwakuri ni katoa bong, ao e a roko irou te kua i bwaka naba iaon te kaintekateka. Imwain ae I ataia, e a nako te tairiki ao e a manga moanaki kanoan te bong ni mwakuri teuana.
A riki namakin aikai inanon namwakaina, e ngae ngke e a reke au mwakuri ae boou ao ni ukoukora te ibuobuoki ae tamaroa.
I tataro ni katoa ingabong iaon kawaiu n nako ni mwakuri ibukin te korakora ni kakoroa nanon te bong anne ao n oki nakon kainabau ao natiu. I aki ataia bwa e na toki ni ngai au kanganga aei, ao angin te tai e a roko te bwarannano irou. Ni boong aika mwaiti ao I aki toki n tang nako karawa ibukin te ibuobuoki ngkana a onrake matau n te rannimata. I tataro ma nanou ae korakora riki n aron ae I tuai mani kakaraoia mai imwaina, ni bubuti nakon te Tama are i Karawa bwa e na buokai n ataa te kataaki aei ao ni kanakoa mai irou.
I namakina te bua n te rotongitong ao te bwarannano ngkana I aki namakina te Tamnei. Ma ngke e buokai n tokanikai iaona te Tamnei, I kunea te aki raraoma ni waaki—e ngae ngke ti au tataro are imwiina. I moanna n onimakina Tamau are i Karawa nakon ae ti te tataro n tain te amwarake ke ti karaoan te tataro n te tairiki n aki rangin n iangoia. Ibukin aei, ao I a rikirake ni kaan riki ma Ngaia.
Kibakibarake Iaon Taian Nao
I nuukan te raraoma ao te bwarannano, I a manga wareka riki rongorongoia Iaretaite n rinanon te “marawa ae korakora” (Ita 2:25). I kona n ti iangoa nanoia ae korakora ngke a rin inanon aia kaibuke. E kona mwanangaia aei ni kakamaku, ma a ataia bwa a na nakon “te aba ae rine ibuakoia aba nako” (Ita 2:15).
Man mwanangaia, ti warekia:
“Te Uea ae te Atua e karekea te ang ae korakora bwa e na uka aon te ran, nakon te aba ni berita; ao ngaia are a kibakiba rake iaon taian nao imwain te ang.
“Ao e koro bukina bwa a mwaiti aia tai are a taunaki i kabin marawa, ibukin naao aika a maunga ake a roko iaoia, ao ibukin naba korakoran ma kakamakun te angi buaka are a riki man unin te ang.
“… Ngkana a otabwaniniaki n te ran ae bati a bon tang nakon te Uea, ao e bon uotia rake riki ieta iaon te ran.
“Ao e koro bukina bwa te ang e aki toki ukina nakon te aba ni berita inanon aia tai ni mena iaon te ran; ao ngaia are a kairaki n te ang” (Ita 6:5–8).
A rotai kiibu aikai ni kabane. I namakinna ae I mena inanon oin au kaibuke, ma ang aika katabeaianga n oreai ma naon te rawawata ni bwaro nako aou ao n taunai ma te bwarannano ae korakora. Ngke I “otabwaniniaki” ao man tang nakon te Uea, N na otirake nako eta man manga taunaki riki teuana te tai.
I a manga wareka riki te kibu 8: “E aki toki te ang ni kare nakon te aba ni berita … ao ngaia ae a uotaki nako moan te ang” (e kairaki ma katruturuana). Imwiina ao I namakina te bwai teuana. Te ang ae korakora are e kariki naao aika maunga bwa a na iinako iai kaibuke ao ni kakabwaiaia naba Iaretaite iaon kawaia. I a tia n rangin n reitaki ma te Tama are i Karawa bwa e na kakea te ang ao naao, ma ngkana akea, ao N na aki kona n roko bwa te “aba ni berita” ra are E kairai nako iai.
Kiibu aikai a biti au taratara n te maiu. Nanou ae korakora ao rawawatau e a tia ni kakorakora au taratara nakon te Tama are i Karawa. N akean te ang ao naao, N na bon aki kona n ata te Atua n ae I ataia—ao a na bon aki kona n roko n te aba ni berita tenaan Iaretaite.
Ma ngkai, tabeua te ririki imwiin te atatai aei, angiu ae korakora aki manga rebwetaua ao naou n rawawatau aikoa manga taunai. Ma ngkana ao n te tai are e a manga oki te angibuaka, N na wetea te Uea ao ni kakaitau, n atakina ae raan aika raoi aki uoti kaibuke nakon te aba ni berita—ma taai aika buaka a karokoia.
Kamatata n te tamnei iroun Jerry Harston