―Rongorongon te Utu―I Tabe ni Karaoia
Moanakin karaoana e kona ni bebete ao ni kaunga. Kairake ni katobibia te aonaaba a karaoa rongorongon te utu ao a karekea uaana ke mwiina ae tamaroa.
E na moanaki mai iaa? Tao ko iangoia bwa am koraki a kaman tia ni karaoa te mwakuri ikekei ibukim. Ke tao ko boou nakon rongorongon te utu ao e taraa ni kakukurei. Tao ngkana ko moanna man kawakinan oin am tienoro ae onoti, katauraoan aara ibukin te tembora, ke n reiakinna mairouia am utu aika maiu, ko kona n ira waakin rongorongon te utu ni kawai aika a kaunga ao n iai nanoia.
Kawakinan Oin Am Tienoro: Ururingakin Ara Kakabwaia
Kawakinan te tienoro e bon aki bebete. Angin te tai ti bon tuangira i bon iroura bwa ti bon tatabetabe ke ni kua ke maiura a aki bati ni kakukurei ni koreaki rongorongoia. I nooria tabeua te ririki n nako bwa kawakinan te tienoro tiaki nanona bwa e matoatoa are e na rikirake tangirana irou.
I moanna man korean teuana te bwai ni katoa bong. E aki kakawaki ngkana e rang ananau ke ni kakukurei; I tii korei baike I angoi ke baikara ake a tia n riki n te bong anne. E a tia ni kakabwaia maiu.
N te bong teuana temanna man au utu e rootaki ao I aki ataia bwa terana ae N na taekinna nakon neiei, ma ngkanne I a kairaki bwa N na wareka nakoina rongorongon teutana au tienoro. I kona n tibwaua te bwai are I a tia n rinanona are I a tia n taua mwiina inanon te tienoro ae uarereke ae rooroo anne, ao I noora te anga are e kona ni buokia ni karaua nanona.
I kakoaua bwa ngkana ko moanna man korean teuana te bwai n te bongina, e na kakabwaia maium. N aki tabe iai bwa uarerekera ke bubura, korean taian kakabwaia inanon maium e kona ni buokiko n ururingi.
Gentry W., Utah, USA
Kunean te Kimwareirei inanon Rongorongon te utu: Ukoukoraia Bakatibu
Ngke I bwabetitoaki, I ongora taekan rongorongon te utu, ma I aki ataia bwa e kanga aron karaoana ke ngkana I kona ni karaoia. I baireia bwa N na tataroakinna, ao I namakinna bwa I riai ni moana au mwakuri iaona n te tai ae waekoa. I namakinna bwa au bakatibu a ingainga ibukiu ni waakinna ao bwa a na buokai ni kakaei rongorongo ake a tau ni karaoan taian otenanti.
I moanna man anaakin te kooti ibukin rongorongon te utu, ao te tai ae uarereke imwiina I weteaki bwa te tia rabakau iaon rongorongon te utu. E bon nako nanou ibukina bwa e karako au atatai iai, ma I butimwaea te wewete.
N te bong teuana I kawara tarin tibuu te unaine, are iai irouna taian taokumente ibukin rongorongon tibutoru te unaine. E aki tangiria ni kan tibwaua te rongorongo ae bati ibukina bwa n aia katei e aki riai taekinaia utu ake a tia ni mate. E taku bwa n te bong are imwiina bon kauringan maten tibutoru te unaine, ao e na tabe ni kabuoki taian taokumente. I bubuti ngkana I kona ni karekei moa tabeua rongorongo mairouia, ao e butimwaeai. I ataia ngkanne bwa e na bon buokai te Tama are i Karawa ni waakina au kakae.
Ngkai I beku n te tienta n rongorongon te utu irarikin te tembora, I teimatoa ni kunei riki rongorongoia au utu. I reiakinna bwa uoman mai buakoia tibun tibutoru te unaine bon taan roko ni maeka mai Itare are iai aia oniman irarikin São Paulo, Brazil. E a bua aia reitaki au utu ma aia koraki ake a mena n aia oniman, ma I kunea ai tariu te mwaane are e korea te boki ni kateiriki ibukin ara utu. E anganai te boki, are e kabanea ruaiwa te ririki ni koro rongorongo iaona. E taku bwa e aki ataia bwa bukin tera ngkai e riai ni koreia ma e namakinna bwa e na bae ni buoka temanna n taai aika a na roko. I ataia bwa bon tamnein Eria are e kaunga nanona.
I reiakinaki ni baike I rinanona bwa ti karaoa te mwakuri ae tabu. Ara bakatibu a kakantaninga ara ibuobuoki ao a mena n iterara bwa a na buokira.
Gabriel D., Brazil
Karaoan te Mwakuri n te Tembora: Otenanti aika Tabu
I bon rairaki ao tii ngai kaain te Ekaretia inanon au utu. I reiakinaki bwa teuana mai buakon otenanti aika tabu bon te bwabetito ibukia maate. I nakon te tembora inanon mwanangara, ao ngke I tabe ni kakauongo nakon te tia butimwaai are e maroroakina taekan taian otenanti, I namakina te bwanaa ae maaraara, man uarereke ae tuangai bwa N na nako nakon te tienta ibukin rongorongon te utu n anga ana bubuti ni karaoan te otenanti n te tembora ibukin tinana, are e a tia ni mate. I bon rang ni kukurei ngke e kaoti te rongorongo imwiina man te FamilySearch ni kamatoa bwa e a tia ni karaoaki te mwakuri n te tembora ibukina. E kakorakora au koaua, ao I a taia bwa teuana bukin menara ikai iaon te aba bwa ti na buokia ara bakatibu ni karekea ana euangkerio Iesu Kristo.
Marvin S., Biribin
Iriran ana Wirikiri te Tamnei: Reireiaki mairouia Bakatibu aika Maiu
Imwiin banen au reirei n te kauarinan, I namakina ana wirikiriki te Tamnei ae Raoiroi bwa N na kawaria ni kabane tibuu ake aman. Iai tabeua mwaawan au tai, ao I nooria bwa e na bae n aki kona ni manga reke riki au tai aei, ngaia are I a kabane teuana te wiiki ma tibuu aikai n tatabemania.
I kabanea au tai n tuoi kanoan taian bwaoki ake a maan, ni wareki reeta ake a maan, ao n tarai taian tamnei ake a maan. I korei mwiin rongorongon maiuia tibuu, n ririaki ni katobibi taian ruanimate, ao ni kawari taabo ake a maeka ao ni mwakuri iai tibuu. E boni kaunga! I reiakina ae bati ibukiia au bakatibu, tibuu, au karo, ao boni ngai. I nooria bwa e na bon aki kona n reke aekakin maiu aei ngke e aki riki aei nakoia au bakatibu.
Imwiin mwanangau, I oki ma 1,000 araia au bakatibu ao ni kona ni karaoa te mwakuri n te tembora ibukiia angiina mai buakoia. N iriran ana wirikiriki te Tamnei ae Raoiroi ao ni kakawarakia tibu bon teuana te babaire ae tamaroa are I a tia ni karaoia.
Shenley P., California, USA
Namakinan te Mweenga: Uotakin Aara nakon te Tembora
Ngke I bubutia tamau ana iango ibukin rongorongon te utu bwa e aonga ni bwanin Rikirakeu I bon Irou, e kabwarabwara bwa e kunei tabeua araia ara utu tabeua te ririki n nako ma e tuai kona ni katauraoi aara ni uoti nakon te tembora i bon irouna ibukin tatabetaben ana tai. Au ibuobuoki e na kona n angania aia tai au utu ni karekei kakabwaia man te tembora.
Ibukin tabeua namwakaina ake imwiina, I kabanei bwakantaain ao tairikin te Tabati ni karini aara inanon te kaombiuta ao n reiakin rongorongoia au utu mairoun tamau. Ti teimatoa n ootan birim aika uarereke ni kakaei riki rongorongo. N tabetai ngkana e kaangaanga warekan taian birim ake a maan, N na bae ni karaoa au tataro ae mabu ao ngkanne I a anaa te beeba ni katanetanei katotongan taian tamnei. Rinanon te mabubu, a kaoti taian ara.
N te kabane ao I a ikoti bwarikoriko n ara ibukia au utu, ao kairake inanon ara uoote a ibuobuoki ni katiaa te bwabetito. Au karo ao tabeman kaain te uoote ngkanne a uoti taian beeba n ara ni katiai otenanti ake tabeua n te tembora.
Ai bon tibwa teutana te tai ae nako imwaain ae I katauraoai n nako nakon te tembora ibukin oin au entaumente. I bon rang ni kukurei ma e bon nako naba nanou.
Ngkai ti a kaineti nakon te tembora, e kabwarabwara tamau bwa e a tia ni kunei tabeua beeba n ara ake I a tia ni katauraoi ni mwakuri iaon Rikirakeu I bon Irou. Tabeua a tia ni bua man ninneia, ngaia are e a uoti beeba n ara ibukin tinau, au kabae, ao i bon ibukina bwa e na katiai. E tibwauai nakoiu araia, ao I uring man au mwakuri are I karaoia.
Ngkai I karaoi berita aika tabu n te tembora, I namakina katobibiau irouia au koraki aika tangiraki n iteran te roki aika uoua. I namakina te rau n ataakina bwa I kona n ikotaki ma au utu n aki toki.
Holly P., Idaho, USA