Reiakinaki Riki taekan te Bwai are Ko Kona ni Kantaningaia
E maeka te tia korokaraki i Oslo, Norway.
Kairake i Oslo, Norway, a kabanea te bongina ni katauraoi maiuia n riki bwa mitinare aika bwanin aia tai.
Tamnein taian banna iroun lukas_zb/iStock/Thinkstock
N te tai are e katanoata iai Beretitenti Thomas S. Monson bitakin te ririki ibukin te mwakuri ni mitinare, kairake ni kabuta te aonaaba a ingainga nanoia tiaki n tii kaeka te kakao ni karaoa te beku ma te kakao naba ni katauraoi n nako ni beku. Ao teuana te kawai ni katauraoi bon reiakinan riki taekan te bwai are ko kona ni kantaningaia ngkana ko a riki bwa te mitinare ae bwanin ana tai.
Tabeman kairake i Norway a karaoa raoi anne n te tai ae abwabwaki “Ana Taneiai te Mitinare” e katauraoaki man te Fredrikstad Uoote ao te Oslo Norway Titeiki.
Te Rin n “Aia Tabo ni Kataneiai Mitinare”
A ikotaki kairake n te autinibotaki inanon te ruu are e tei ibukin te tienta ni kataneiai ibukia mitinare. “Ti anganaki te mwiokoaki bwa ti na reiakina taekan te aba,” e taku Jakob R. man Moss Uoote. “E anganira te kamatataki bwa e kanga arom ngkana e a roko weteam ni mitinare ao n ataia bwa ko kona ni weteaki nakon te tabo ae kaokoro man are ko taneiai iai.”
Kaitibo ma te “Beretitenti n te Mition”
“Ngkanne ti a nako n te mataroa are imwiina bwa ti na kaitibo ma te mitinare ae e a tia ni bane ana tai are e a karaoa ana mwakuri te beretitenti n te mition,” e taku Simon W. man Oslo Uoote. Te mitinare e a tia ni bane ana tai ao tabeman mitinare ake a tia ni bane aia tai a maroroakinna bwa tera ae ko kantaninga ngkana ko a karaoa am mwakuri ni mitinare. “I taku bwa e rang ni itiaki reiakinam mairouia mitinare ake a tia ni bane aia tai bwa tera ae ko kantaningaia n tain te mwakuri ni mitinare ae bwanin taina,” E taku Simon. Taan ira te waaki a karekea aia neimtaeki, a karekeaki toaia, ao a tuangaki bwa a na teimatoa n tiku ma toaia n tainako.
Karikirakean Konabwai
A reiakinaki kairake n taian wekitiaobu ibukin karikirakean maiua n tamnei ma aron naba tararuan kainnanoia n te maiu n rabwata n aron karaoan te uaati, kabonganan te kataumwane, ao n teimatoa ni marurung rabwataia.
“I unga n te wekitiaobu bwa e kaotaki bwa ko na kanga ni waakina am maroro iaon te euangkerio,” e taku Inger Sofie J. man Oslo Uoote. “Anne te bwai ae I kona ni waakina karaoana naba mangkai.”
“I unga ni kabwarabwara bwa ko na kanga ni kabongana Taetaekina Au Euangkerio,” e taku Karl Frederik O. man Fredrikstad Uoote. “I aki toki n iangoia n tainako bwa mitinare iai oin aia boki aika tabu n reirei mai iai, ma I kunea bwa te bwai are I a kaman karaoia n te tieminari e na buokai n riki bwa te mitinare ao n aron te bwai ae I a kaman tia ni kamatebwaia inanon Taetaekina Au Euangkerio.”
A mwaiti ataeinimwaane aika a taku bwa teuana mai buakon wekitiaobu aika kona n ururingaki e raonaki ma te taneiai n te bai ni katirakin te kabaraaki ae mainaina. “E kauringai bwa a mwaiti konabwai ake I kona ni mwakuri iaona ni katauraoi ibukin te mwakuri ni mitinare ae bwanin taina,” e taku Jakob.
“I reiakinna bwa e mwaiti ae I kona ni karaoi n te tai aei n raoniia mitinare aika bwanin aia tai ni mwakuri n ibuobuoki bwa ti aonga ni bane ni mwakuri nakon te kouru ae ti te arona,” e taku Sarah R. man Sandvika Uoote. “Membwa bon mitinare naba.”
Ngkai te kauring bwa mitinare ake a beku ni kabuta te aonaaba, ni karaoan taian kuuka ma amwarake a katauraoaki man aaba aika kakaokoro. “Anne e kauringai bwa I riai ni katai amwarake aika boou bwa I aonga n taneiai ni katai bwaai ake I tuai ni kang n tainako. Anne e na buokai n taneiai iai n te tai ae waekoa ngkana I a weteaki nakon te tabo ake a kang bwaai ake I tuai n taneiai iai,” e taku Simon.
Waakina te Katauraoi
“Ni kabanean te bong, imwiin ongoraeakinan aia koaua uoman kairake ao uoman mitinare ake a bon tibwa bane aia tai, ti anenea te kuna n taromauri ‘Called to Serve,”’ e taku Liss Andrea O. man Fredrikstad Uoote. “I namakinna bwa ngkana I teimatoa n anenea te kuna n taromauri aei n tainako, N na teimatoa ni karekea te kauring ngkana ti a riki bwa mitinare, ti beku ibukin te Tama are i Karawa ao E na kakabwaiaira.”
Ni kabanean te bong, kairake n te titeiki a oota bwa a aki tii katauraoia ibukin aia taneiai n te mwakuri ni mitinare ae bwanin taina ma a kona ni karekei aia taneiai mitinare n te tai aei ao ni kabuta maiuia.