Te Kaitara nakon Au Mwakuri ni Mitinare
E maeka te tia korokaraki i Manaus, Brazil
Imwiin te intawiu ma ngai ni karaoan au mwakuri ni mitinare, e taku au beretitenti n te titeiki, “A na riki bwaai aika kamimi inanon maium ni kataia ni bita am iango.”
Kamatata n te tamnei iroun Greg Newbold
I kaaina te Ekaretia n au ririki ae te 15, ao aua te ririki imwiina I kanakoi au beeba ni mitinare. N au intawiu ma au beretitenti n te titeiki, e kamoamoai bwa N na baireia bwa N na beku ibukin te Uea n aron te mitinare ae bwanin ana tai. Ngkanne te tia kairiiri ane kairaki anne iai te bwai ae taekinna are e a kaunga nanou: “Te Tari, man te tai aei, a na kaoti bwaai aika kamimi inanon maium ni kataia ni bita am iango ibukin am babaire ni kan beku ibukin te Uea.”
Inanon tataningakin rokon au beeba ibukin weteau ni mitinare, I kataneiaki n riki bwa te tia mwakuri n te tabo ni botokaobi. Te mwakuri aei e anganai au tai ni karekei tabeua bwaai ake N na kainnanoi n te tabo ni mitinare ao ni buoka tinau ma aron te kabanemwane ni mweengara. A nakoraoi bwaai ni kabane.
N akea te tekeraoi, “bwaai aika kamimi” a moanna ni kaoti. Te moan, e kamwaruaki tinau ao e a kuri ni mate man ikoakina, ma te Tama are i Karawa ae akoi e kaoka maiuna inanon ae kamimi.
N te tai anne, tinau, mwaaneu aika karimwiu, ao Ngai ti maeka n te auti ae ti kakabwaka boona. Ti maiuakina boou ao te buoka ae bon tau are e a karekea tinau ibukin maten tamau n ririki ake mai imwaaina.
Tabeman aomata, n ikotaki ma kaain te Ekaretia, a na bae n titiraki, “Ko kona n ninikoria ni kitana tinam n aron aei ao n nako ni karaoa am mwakuri ni mitinare?” N ongoraau n te titiraki aei ae bati ni kaokiokaki e a moanna ni karika raraoman nanou (ni karaoan au mwakuri ni mitinare).
N te bong teuana e weteai au beretitenti n te titeiki ao e tuangai bwa e a roko au beeba ni mitinare ao ni bubutiai bwa N na kawara ana aobiti n te tairiki anne bwa e aonga n anganai te tinaniku n reta man ana etukuata te Ekaretia are e a kaman kakantaningaki. E bon nako nanou ao ni kukurei naba n te rongorongo.
N te bong naba anne, au manatia n te tabo ni mwakuri e butiai bwa N na maroro ma ngaia imwain te tawanou. Ngke I roko inanon ana aobiti, I kamauraki n te aro n iraorao, ao ti maroro inanon tabeua te miniti ibukin au kataneiai ao tera are I a tia n reiakinna n te kambwana. Ngkanne, te mwaane anne are e korakora n te kambwana iai te bwai ae taekinna are boni ngaia raoi oin miia angiia aomata inanon te kaawa: “Ko a tia ni karaoa te mwakuri ae tamaroa ikai n aron te tia kataneiai, ao ti kan aeaniko ao ni kateimatoako bwa kaain te tiim. Tera am iango?”
Aei teuana te babaire ae matoatoa inanon maiu. Te kauoua e riki bwa kanga te bwai ae akea tokina. E taraa n ae I kona n ongo aia titiraki aomata nakoiu ngkana N nang bon mwaninga taekan tinau n akea boutokakina irou ma au kataumwane ao n nako n te tabo ni mitinare.
Ma e boni ngae n anne, I uring bwaai ake I reiakin man koroboki aika tabu ao au tia kairiiri n te Ekaretia, ao inanon te kawai ae tabu. I kakoaua ma te aki nanokokoraki bwa e tangirai te Atua bwa N na karaoa au mwakuri ni mitinare ibukin Ana Ekaretia. I ataia bwa E na bon tararuaia au utu, bwa N na onimakinna, ao a na bane n nakoraoi bwaai ni kabane.
I kabwarabwara te kaangaanga nakon au manatia, ao ana kaeka bon te bwai ae I teimatoa n iaiangoia: “I taku bwa te kairake n ataeinimwaane ngkoe ae ko oinimwaane, ao ikai ko a katibanakoa te kakabwaia man maium.”
I karabwa ma nanou ni koaua ibukin ana ibuobuoki, ao 28 te bong imwiina I a roko n te tienta ni kataneiai ibukia mitinare i São Paulo, Brazil.
N au tai ni mitinare, te Uea e katauraoi kainnanoia au utu rinanoia raao inanon te Ekaretia ao inanon kawai aika kamimi. E a manga oki marurungin tinau ao a kaoti kakabwaia ibukin reken aia mwakuri ae boou mwaaneu ao ngaia.
“Bwaai aika kamimi” a bon kaoti raoi ngkana ti baireia bwa ti na beku ibukin te Uea. Irarikina I nanorinano n reita au koaua ma aia koaua te ngaa n aomata ake tabeman ake a kabaeaki ni beku ibukin te Atua bwa te mwakuri n ibuobuoki ni mitinare e a tia n roota maiu n te aro ae korakora.