2014
Ua Tuuina Atu e Auaunaga Limafoai a le AAG le Fesoasoani
Novema 2014

Ua Tuuina Atu e Auaunaga Limafoai a le AAG le Fesoasoani

Talu mai le popofou o le Toefuataiga, ua iloga tagata o Le Au Paia o Aso e Gata Ai mo lo latou naunautaiga e aapa atu ma sii i luga i latou o e o mafatia.

I tausaga talu ai nei, sa tuuina atu ai e tagata o le Ekalesia ma isi, e ala atu i foai limafoai, auala e faamanuia ai e polokalama o Auaunaga Fesoasoani Agaalofa a le Ekalesia olaga o tagata i le lalolagi atoa. I le 2013 lava ia, na silia ma le 10.5 miliona tagata i atunuu e 130 na fesoasoani atu i ai polokalama o auaunaga agaalofa a le AAG.

Ua faalautele atu lenei taumafaiga mai le sauniaina o ni oloa mo le faamafanafanaga ma le tausia o le soifua i le faaavanoa atu o vai mama; i le aoaoina o faatosaga ma fomai e faasaoina ia ola o le faitau afe o pepe faatoa fananau mai; i le tuuina atu o nofoa faataavalevale. E le gata i lea, ua fesoasoani le Ekalesia i le aoaoina o le tausiga o mata, tui puipui, ma fesoasoani atu i nuu ma alalafaga i le totoina o meaai paleni.

Fesoasoani i Tagata Sulufai

Ua faia e le Ekalesia se taumafaiga faifai pea ma le taua ina ia fesoasoani i tagata sulufai faapea foi ma isi o loo mafatia mai feteenaiga ma le leai o ni meaai. Talu ai nei:

  • Na foai atu e le Ekalesia le faitau afe o faleie ma sapalai o meaai masani i aiga i Chad ma fauina ni vaieli e pamuina i lima, latrines ma fale taele i tolauapiga a tagata sulufai i Burkina Faso.

  • I Ioritana, Suria, Lepanona, Iraki, ma le eria o Kurd, o loo tufatufaina atu i ai e Auaunaga Limafoai a le AAG ia pepa meaai, palanikeke, sapalai faafomai, pusa faasoifua maloloina, ie afu, ma lavalava o le taumalulu. I Iraki ma le eria o Kurd, o loo tiliva atu i tagata ua manunua i taua ni nofoa faataavalevale ma isi masini e feoai ai.

  • I Kasa, sa foai atu i falemai tutotonu ni vailaau faafomai, sapalai faafomai, ma susu pauta.

  • I Isaraelu, sa foai atu i ai se masini e siaki ai tagata [ultrasound] i se falemai.

  • I Iukureini ma Rusia, na faipaaga ai le Ekalesia ma le Polokalama o Atiinae o Malo Aufaatasi e tuuina atu meaai, mea e momoe, lavalava, ma mea faalesoifua maloloina mo tagata e 30,000 ua faaaunuua i le taimi o le vevesi faalemalo.

Na galulue ia Auaunaga Limafoai a le AAG e le faaituau i se vaega faaupufai ma fesoasoani i tagata i soo se faatuatuaga.

Taumafaiga Faatoomaga

Sa tali atu foi le Ekalesia pe a tulai mai ni mala faalenatura.

  • I Siera Leone ma Laipiria, sa faaauai e le Ekalesia ni volenitia e 1,600 i totonu lava o alalafaga e tuuina atu aoaoga i le auala e aloese ai mai le Ebola ma saunia meaai ma mea autu o le tumama ma sapalai faafomai.

  • I le mavae ai o lologa na mafua ona o le mamafa o timuga i Pakisitani ma Initia, na tuuina atu e le Ekalesia meaai, pusa mo le tumama, ma sapalai faafomai.

  • I Toga, sa faatamaia e se afa le faitau selau o fale, e aofia ai fale o aiga o le ekalesia e 116. O le a fesoasoani tagata o le ekalesia i le toefausia o o latou fale. Sa latou maua ia aoaoga e uiga i le auala e fau ai a latou lava fale ma sa talosagaina ia latou fesoasoani atu ia le itiiti ifo ma le fa isi tagata i le fausia o o latou fale. O loo toe faaolaina foi e le Ekalesia ia fua o faatoaga ma tuuina atu aoaoga i le faiga o togalaau i aiga.

  • I Mekisiko, ina ua tuua e se afa le faitau afe o fale na faaleagaina pe faatamaia, sa tuuina atu e taitai o le Ekalesia i le lotoifale ni meaai ma vai i tagata na aafia, ma sa galulue faatasi le Ekalesia ma le malo e saunia ni pusa meaai.

O Mea e Mafai Ona E Faia

O foai e tuuina atu i le Tupe Fesoasoani o Auaunaga Agaalofa e mafai ai e le Ekalesia ona tali vave atu i faalavelave. E le gata i lea, po o fea lava o latou nonofo ai, e mafai e tagata o le ekalesia ona faaalia le alofa faaKeriso, tuuina atu le auaunaga, ma fausia le faaaloalo mo tagata uma. O le iloaina o tagata sulufai ma tagata malaga mai mai isi atunuu i totonu o o tatou lava alalafaga, po o i latou o loo onosaia se mala faaletagata lava ia, o le ofoina atu ia i latou o se faauoga, fiafia, ma se siosiomaga faafeiloai o se faatinoga lea faaKeriso ma o le a le faia fua e aunoa ma se aoga.

O loo taumafai le Ekalesia e ala atu i ona lima agaalofa, ina ia faaaoga le fautuaga a Peresitene Thomas S. Monson e faapea “e mafai ona tatou faamalosia le tasi ma le isi; ua tatou maua le tomai e iloa ai i latou e le o amanaiaina. Pe a i ai ni o tatou mata e vaai, taliga e faalogo, ma loto e iloa ma lagona, e mafai ona tatou aapa atu ma laveai mai” (“O Le Valaau e Auauna Atu,” Liahona, Ian. 2001, 58).

Ua feiloai atu le Peresitene o le Itu o Amman Jordan ma lona afafine i tagata sulufai.

SARAH JANE WEAVER, CHURCH NEWS