Ioe, Le Alii e, Ou Te Mulimuli Atu ia te Oe

Saunia e Elder Eduardo Gavarret

O Le Fitugafulu

E valaaulia i tatou e le Alii e ala i le faaaogaina o upu galue eseese: “O mai ia te au,” “Mulimuli mai ia te au,” “Savali faatasi ma au.” I tulaga taitasi ua avea lava ma se valaaulia e faatino.

“Aua faauta, ua tuuina mai e le Alii i atunuu uma, ni isi o lo latou lava atunuu ma gagana, latou te aoao atu lana afioga.”¹ O le asō ua toe faataunuuina ai lenei mau a o o’u mauaina le avanoa e faasoa atu ai o’u lagona i lau lava gagana.

I le 1975, sa ou auauna atu i le Misiona a Iurukuei Parakuei o se faifeautalai talavou. I le taimi o lou masina muamua, na faia ai e taitai sone se gaoioiga e faaalia ai se mataupu faavae o le talalelei. O faifeautalai taitasi na fusi [o latou] mata, ma na tau mai ia i matou e ao ona matou mulimuli i se auala e taitai atu ai i le fale taalo. Na tatau ona matou mulimuli i le leo o se tasi o taitai faapitoa, o se leo na matou faalogoina ae matou te le’i amata ona savavali. Peitai, na lapataiina i matou, o le a matou faalogoina nisi leo lea o le a taumafai e faasese i matou ma se ese ai mai le ala.

Ina ua mavae ni nai minute o le lagonaina o ni leo, talanoaga, ma—i le lotolotoi o mea uma—o se leo na faapea mai, “Mulimuli mai ia te au,” na ou lagona le faamautinoaga na ou mulimuli i le leo sa’o. Ina ua matou taunuu atu i le fale taalo o le falesa, na talosagaina i matou e aveese ie na fusi ai o matou mata. Ina ua ou faia, na ou iloaina e lua ni vaega o loo i ai ma na ou i ai i le vaega lea na mulimuli i le leo sese. “Sa pei lava o le leo sa’o lea,” sa ou fai ifo ai ia te au lava.

O lena mea na tupu i le 39 tausaga talu ai na i ai se aafiaga umi ia te au. Na ou faapea ifo ia te au lava, “Ia aua lava, nei toe mulimuli i le leo sese.” Ona ou faapea lea ia te au lava, “Ioe, Le Alii e, ou te mulimuli atu ia te Oe.”

Ou te manao e faamatala atu lenei aafiaga faatasi ai ma le valaaulia alofa a le Faaola ia i tatou:

“O a’u nei o le leoleo mamoe lelei, ua ou iloa a’u mamoe. …

“O a’u mamoe e faalogo mai i latou i lo’u leo, ua ou iloa foi i latou, ua latou mulimuli mai foi ia te au.”²

O le valaaulia e “mulimuli atu ia te Ia” o le valaaulia e sili ona faigofie, tuusa’o, ma mamana e mafai ona tatou mauaina. E sau mai se leo e le mafai ona le mautonu.

E valaaulia i tatou e le Alii e faaaoga ai ni upu galue eseese: “O mai ia te au,” “Mulimuli mai ia te au,” “Savali faatasi ma au.” I tulaga taitasi e le o se valaaulia faasamasamanoa; o se valaaulia ina ia faatinoina. Ua tuuina atu i tagata uma e Ia o le Perofeta Sili, Faiaoga Sili, le Alo o le Atua, le Mesia.

O le Valaaulia e “O mai ia te Au”

“Ia outou o mai ia te au, o outou uma o e tigaina ma mafatia i avega, o a’u foi e malolo ai outou.”³

O outou na e le’i avea ma tagata o le Ekalesia o le a mauaina lenei valaaulia e ala i leo o faifeautalai faatasi ai ma upu, “O le a e faitau i le Tusi a Mamona? O le a e tatalo? O le a e auai i le lotu? O le a e mulimuli i faataitaiga a Iesu Keriso ma ia papatisoina e i latou o i ai le pule?”⁴ O le a faapefea ona e taliina lenei valaaulia i le asō?⁵

Ou te valaaulia oe e faalogo ma talia le savali e ala i le faapea atu, “Ioe, Le Alii e, ou te mulimuli atu ia te Oe!”

O Carlos Badiola ma lona aiga, i Minas, Iurukuei, na feiloai atu i faifeautalai. Talu ai sa fai atu e alii faifeautalai ni fesili se tele i le taimi o lesona, na tonu ai ia i latou e valaaulia se tuaoi le lotu—o se tamaitai aulelei e 14 tausaga e igoa ia Norma—e fesoasoani ia i latou e tali [ia fesili]. O Norma sa avea ma se tamaitai aoga tuuto sa ia suesueina le Tusi Paia i le aoga i lena tausaga, o lea la pe a fai atu e faifeautalai se fesili, e tali lava e Norma. O ia o se “tagata sailiili taua.” O le lesona sa aoaoina i lena aso sa faatatau i le Upu o le Poto.

Ina ua foi atu o ia i le fale i le maea ai o le lesona ma faifeautalai, na iloa e Norma le mea e ao ona ia faia. Sa ia fai atu i lona tina, “Tina, ia amata atu nei e le toe i ai se kofe faasusu mo au. Na o le susu lava.” O lena tali na avea o se faaaliga vaaia o lona manao e talia le valaaulia e mulimuli ia Keriso, e pei ona tuuina atu e faifeautalai.

Na papatisoina uma Carlos Badiola ma Norma. Mulimuli ane, i le mulimuli ai i le faataitaiga a Norma, na papatisoina foi lona tina, lona tama, ma ona tei. Na ma tuputupu a’e faatasi ma Norma i lena paranesi laitiiti ae mamana. Mulimuli ane, ina ua ou foi mai se misiona, na ma faaipoipo ai. Na ou iloa lava o le a faigofie atu ona mulimuli i le Faaola faatasi ai ma ia i ou autafa.

O le tasi o se tagata o le Ekalesia ma ua taliaina lenei valaaulia ma faafouina le tautinoga i vaiaso taitasi e ala i le ai ma inu i le faamanatuga.⁶ O se vaega o lena tautinoga ua aofia ai le tausiga o poloaiga; o le faia o lea mea o loo outou fai atu ai, “Ioe, Le Alii e, ou te mulimuli atu ia te Oe!”⁷

O le Valaaulia e “Mulimuli Mai Ia te Au”

O le “Mulimuli mai ia te au” o le valaaulia a le Alii i le taitai talavou mauoa. Na tausia e le alii mauoa poloaiga i lona olaga atoa. Ina ua ia fesili atu i isi mea e mafai ona ia faia, na ia maua le tali faatasi ai ma se valaaulia manino: “Sau, … mulimuli mai ia te au.”⁸ Peitai, e ui lava na faigofie le valaaulia, ae sa le [faigofie] e aunoa ma le ositaulaga. Na manaomia ai taumafaiga—e o faatasi ma faaiuga ma faatinoga.

Sa valaaulia e le perofeta o Nifae le faatusatusaga faaletagata lava ia ina ua ia fesili: “Ma ua fetalai mai [Iesu] i le fanauga a tagata: Ia outou mulimuli mai ia te a’u. O le mea lea, o’u uso pele e, e mafai ea ona tatou mulimuli atu ia Iesu vagana ai ua tatou loto e tausi poloaiga a le Tama?”⁹

O le valaaulia e “o mai ia te au,” ia faalogo i Lona siufofoga, ma mulimuli i ai ua avea ma savali a faifeautalai mai le amataga, e fesoasoani i le toatele o tagata ina ia suia o latou olaga mo le lelei.

I le limasefulu tausaga talu ai na ulufale atu ai faifeautalai i le faleoloa fai uati a lo’u tama, ina ia tuu se uati e toe faaleleia. E pei ona faia e faifeautalai lelei, na latou faaaogaina le avanoa e talanoa ai ma lou tama ma lou tina e uiga i le talalelei. Na talia e lou tama faifeautalai, ma na talia e lou tina le savali ma le valaaulia e mulimuli ia Keriso. Mai i lena aso seia oo mai i lenei aso, o loo ia tumau ma le malosi i le Ekalesia. Na ia faapea mai, “Ioe, Le Alii e, ou te mulimuli atu ia te Oe!”

Pe a e taumafai e sau ia te Ia, o le a e maua le mana e aveesea ai avega o le olaga, pe faaletino pe faaleagaga, ma oo ai i se suiga lelei o le loto lea o le a fesoasoani ia te oe ia fiafia atili ai.

O le Valaaulia e “Savali faatasi ma A’u”

Na valaauina Enoka e talai atu le talalelei i ni tagata faigata, ma loto-ma’a’a. Sa ia lagonaina le le agavaa. Sa ia te ia ni masalosaloga pe mafai ona ia faia. Na faatoafimalie e le Alii ona masalosaloga ma faamalosia lona faatuatua e ala i le valaaulia “Savali faatasi ma au”—o se valaaulia e pei o le tootoo a se tagata tauaso po o se aao o se uo, e mafai ona taialaina ai ni la’a a se tasi o loo tau laalaa ma le le mautonu. E ala i le faaaogaina o le aao o le Faaola ma savavali faatasi ma Ia, na iloa ai e Enoka ua mausali ana la’a ma na avea ai o ia ma se faifeautalai maoae ma se perofeta.¹⁰

O le faaiuga e “o mai ia te au” ma le “mulimuli mai ia te au” e patino lava i le tagata. Pe a tatou talia lenei valaaulia, o le a siitia lo tatou tulaga o le tuuto, ma o le taimi loa lena o le a mafai ai ona tatou “savavali faatasi ma Ia.” O lenei tulaga e faamautuina ai se sootaga vavalalata ma le Faaola—o le fua lea o lo tatou taliaina o le valaaulia muamua.

Na ma taliaina taitoatasi ma Norma le valaaulia e “o mai ia te au” ma ia “mulimuli mai ia te au.” Ona, faatasi ai lea ma le lagolagoina o le tasi ma le isi, na ma aoao ai e savavali faatasi ma Ia.

O le taumafaiga ma le naunautaiga e saili o Ia ma ia mulimuli ia te Ia o le a tauia i faamanuiaga tatou te manaomia.

Na faapena le tulaga na oo i ai le fafine, faatasi ma se taumafaiga sili, na mafai ai ona pa’i atu i ofu o le Faaola¹¹ po o Patimaio le tagata tauaso, o lona naunautaiga na avea ma vaega autu i le vavega na tupu i lona olaga.¹² I tulaga uma ia e lua sa maua ai se faamalologa o le tino ma le agaga.

Aapa atu lou lima ma pa’i atu i Ona ofu, talia Lana valaaulia, ma faapea atu, “Ioe, Le Alii e, ou te mulimuli atu ia te Oe!”—ma savali faatasi ma Oe.

O le “O mai ia te au,” “Mulimuli mai ia te au,” ma “Savali faatasi ma au” o ni valaaulia o loo i ai le mana taua—mo i latou e taliaina ia valaaulia—ina ia fetuunaia lou olaga ma gaepu se suiga i totonu o oe lea o le a taitai atu ai oe e faapea atu, “Ua lē toe i ai [so’u] manao e fai mea leaga, ae ia faia mea lelei e lē aunoa.”¹³

I le avea ai ma se faailoaga mai fafo o lena suiga, o le a e lagonaina ai le naunautaiga malosi e “fesoasoani i e vaivai, sii i luga lima ua tautau i lalo, ma faamalosi tulivae ua vaivai.”¹⁴

O a ni laasaga e mafai ona tatou faia i lenei taimi ina ia “savali [ai] faatasi ma Ia”?

Fafaga le manao ina ia avea ma se soo sili atu ona lelei o Keriso.¹⁵
Tatalo mo lenei manao ina ia mafai ona tupu lou faatuatua ia te Ia.¹⁶
Maua le malamalama mai tusitusiga paia, e faamalamalamaina ai le ala ma faamalosia ai lou manao ina ia sui.¹⁷
Ia faia le faaiuga i le taimi nei e faatino ma faapea atu, “Ioe, Le Alii e, ou te mulimuli atu ia te Oe!” O le na o le iloaina o le upumoni o le a le suia ai lou lalolagi sei vagana e te liliuina le malamalama i le faatinoga.¹⁸
Tumau mausali i le faaiuga ua e faia e ala i le faaaogaina o nei mataupu faavae i aso uma.¹⁹

Tau ina ia avea saunoaga a lo tatou perofeta pele, o Peresitene Thomas S. Monson, e uunaia ai i tatou ina ia faatinoina lo tatou manao e talia le valaaulia a le Faaola. Na saunoa mai Peresitene Monson: “O ai le Tupu o le mamalu, lenei Alii o au? O Ia o lo tatou Matai. O Ia o lo tatou Faaola. O Ia o le Alo o le Atua. O Ia o le Mataisau o lo tatou Faaolataga. O loo Ia valaau mai, ‘Mulimuli mai ia te au.’ O loo Ia fetalai mai, ‘Ina alu ia, ma ia faapea ona fai.’ O loo Ia augani mai, ‘Tausi au poloaiga.’”²⁰

Tau ina ia tatou faia le faaiuga i le aso e faateleina lo tatou tulaga o le tapuai ma le tuuto i le Atua, ma ia mafai e a tatou tali i Lana valaaulia ona lagonaina leotele ma manino: “Ioe, Le Alii e, ou te mulimuli atu ia te Oe!”²¹ I le suafa paia o le Alii o Iesu Keriso, amene.