Taimi ʻo e Folofolá

Fakamoʻui ʻe Sīsū ha Taha Kilia

Fai ʻe Erin Barker

ʻOku nofo ʻa e tokotaha naʻá ne faʻú ʻi ʻIutā, USA.

Ako fakataha ʻi he taʻú ni ki he Fuakava Foʻoú!

Fakakaukau ki ha taimi naʻá ke puke ai. Naʻe fai nai ʻe ha taha ha faʻahinga angaʻofa ke tokoni ke ke ongoʻi lelei ange ai?

ʻOku tau lau ʻi he Fuakava Foʻoú fekauʻaki mo e fakahaaʻi ʻe Sīsū ha angaʻofa ki he kakai naʻe puké. Naʻe ʻalu ha tangata mahaki kili fakamamahi, naʻe ui ko e kilia, ʻi ha ʻaho ʻe taha kia Sīsū. Naʻá ne ʻiloʻi naʻe maʻu ʻe Sīsū ʻa e mālohi ke fakamoʻui ʻa e taha kotoa pē naʻe puké. Naʻe tui ʻe lava ʻe Sīsū ʻo fakamoʻui ia. Naʻe ala ʻa Sīsū ki he tangata kiliá mo folofola ange, “Ke ke maʻa koe” (Maʻake 1:41). ʻI he ʻosi pē folofola ʻa Sīsuú, kuo fakamoʻui ʻa e tangatá.

Te tau lava ʻo molomolomuivaʻe ʻia Sīsū ʻaki haʻatau angaʻofa mo ʻofa ki he niʻihi ʻoku nau puke pe mamahí.

Ako Lahi Ange: Ko e Ngaahi Kosipelí

ʻOku ʻi he Fuakava Foʻoú ha ngaahi tohi makehe ʻe fā ʻoku ui ko e Ngaahi Kosipeli, ʻa ia naʻe tohi ʻe ha niʻihi ʻo e kau ākonga ʻa Sīsuú. ʻOku fakamatala ʻa e Ngaahi Kosipelí ki he taimi naʻe moʻui ai ʻa Sīsū Kalaisi ʻi māmaní. Ko e talanoa ki he fakamoʻui ʻo e tangata kiliá ʻoku ʻi he tohi ʻe tolu ʻo e Ngaahi Kosipelí. ʻOku ʻi he tohi Maʻake 1:40–42 mo e Mātiu 6:2–4 foki pea mo e Luke 5:12–14.

Ngaahi Fakakaukau ki ha Talanoa Fakafāmilí

Te ke lava ʻo fakaʻaongaʻi ʻa e kakai ʻi he folofolá he peesi 74 ke fakahoko ʻaki ʻa e talanoa mei he Maʻake 1:40–42. Hili ia pea te ke lava ke lau ʻa e Sute 1:22 mo palani ke fakahoko fakafāmili ha faʻahinga meʻa ke hoko ai ha lelei ʻi ha moʻui ʻa ha taha. Mahalo te mou lava ʻo tokoniʻi fakapulipuli ha taha!

Foʻi Hiva: “Talamai ʻa e Ngaahi Talanoa ʻo Sīsuú” (Tohi Hiva ʻa e Fānaú, 36)

Potu-folofolá: Maʻake 1:40–42

Ongo Vitiō: ʻAlu ki he Biblevideos.org ke mamata ʻi he “Jesus Heals a Lame Man on the Sabbath” mo e “Jesus Heals a Man Born Blind.”

Ko e Molomolomui-vaʻe ʻia Sīsuú

Fakatātaaʻi mo homou fāmilí ʻa e founga te mou lava ai ʻo fakahaaʻi ha ʻofa ki he niʻihi kehé ʻi he ngaahi tūkunga ko ʻení. Faʻu pē haʻamou ngaahi tūkunga!

• Kuo hiki mai ha fāmili foʻou ki homou kaungāʻapí.

• ʻOku anga taʻeʻofa ha fānau ʻe niʻihi ki ha kiʻi tamasiʻi ʻi he akó.

• ʻOku haʻu ha taha foʻou ki he Palaimelí, ʻoku ʻikai ke ne ʻilo ha taha he lotú.

• ʻOku ʻikai ha taha ke vaʻinga mo ho kiʻi tokoua pe tuofefine siʻí.

• ʻOku tangi ʻa e kiʻi pēpeé, ka ʻoku lolotonga feinga hoʻo faʻeé ke ʻai ʻa e meʻatokoni efiafí.

• ʻOku puke ha taha ʻi homou uōtí pe koló pea ʻikai toe lava ke hū ki tuʻa.

Tokoni Fakafolofolá: Kumi folofolá

ʻI he Maʻake 1:41 ʻoku fakaʻaongaʻi ai ʻa e foʻi lea ko e ʻaloʻofá. ʻOku ʻi he Tohi Tapú he taimi ʻe niʻihi ha ngaahi foʻi lea lalahi he ʻikai ke lava ʻo mahino kiate koe. Ko e taimi ʻokú ke maʻu ai ha foʻi lea ʻoku ʻikai ke ke ʻiló, te ke lava ʻo fakaʻaongaʻi ʻa e Fakahinohino ki he Ngaahi Folofolá ke tokoni atu. Hangē ko ʻení, te ke lava ʻo kumi ʻa e “ʻAloʻofá” ke ʻilo ai e ʻuhingá mo maʻu ha ngaahi potu folofola kehe ʻoku nau fakaʻaongaʻi. Ko e hā ha ngaahi toe foʻi lea kehe te ke lava ʻo kumi ʻi he talanoa kau ki he fakamoʻui ʻe Sīsū ʻo e tangata kiliá?