Ngaahi Fakakaukau Maʻá e Efiafi Fakafāmili ʻi ʻApí

ʻOku ʻi he makasini ko ʻení ha ngaahi fakamatala mo e ngaahi ʻekitivitī ʻe lava ke fakaʻaongaʻi ʻi he efiafi fakafāmili ʻi ʻapí. Ko ha fakakaukau ʻeni ʻe ua.

“ʻOku Ou Fie Maʻu Koe he Houa Kotoá,“ peesi 30: ʻE lava ʻa e ngaahi himí ʻo hoko ko ha ivi mālohi ʻi heʻetau moʻuí ʻo hangē ko hono tokoniʻi ʻe he fakalea ʻo e himi “ʻOku Ou Fie Maʻu Koe he Houa Kotoá“ ʻa Paki Mi-Sungu ke papitaisó. Fakakaukau ki ha taimi ne tāpuekina ai hoʻo moʻuí ʻe ha himi pea fakakaukau ke vahevahe ʻa e aʻusia ko iá mo ho fāmilí. Fakaafeʻi ʻa e mēmipa takitaha ʻo e fāmilí ke ne fili ha himi manako mo fakamatalaʻi e anga ʻo ʻene tāpuekina ʻene moʻuí. Hili ia pea mou hivaʻi ʻa e ongo himí takitaha mo homou fāmilí. (ʻE lava ke mou fakavahavaha ʻeni ki ha ngaahi uike.)

“Lotú mo e Ngaahi Falelotú,“ peesi 68: Hili hoʻo lau ʻa e talanoa ko ʻení, fakaʻaliʻali ha ngaahi fakatātā pe fakamatala ki he ngaahi siasi kehekehe ʻi homou koló pea mou talanoaʻi mo homou fāmilí e ngaahi fehuʻi ko ʻení: Ko e hā ha ngaahi meʻa ʻoku tau faitatau ai mo e ngaahi tui fakalotu kehé? Ko e hā e ongo ʻa e Tamai Hēvaní ki he kotoa ʻo ʻEne fānaú? Ko e hā e anga ʻoku totonu ke tau fai ki he kakai ʻoku kehe ʻenau tui fakalotú? Fakakaukau ke mou fakaʻaongaʻi ʻa e fakamatala “Ko hono Fakapalanisiʻi ʻo e Moʻoní mo e Kātakí“ ne fai ʻe ʻEletā Dallin H. Oaks ʻo e Kōlomu ʻo e Kau ʻAposetolo ʻe Toko Hongofulu Mā Uá (Liahona, Fēpueli 2013, 28–35) ke tokoni ki hono tali e ngaahi fehuʻi ko ʻení.