Ko Hai ʻOkú Ke Tanganeʻia Aí?
ʻOku nofo e tokotaha naʻá ne fai e talanoá ʻi Kalefōnia, USA.
Naʻe ʻiloʻi ʻe ʻEli ʻa e taha naʻe tanganeʻia aí, ka naʻe fuʻu manavasiʻi ke fakahā.
“Fai ki ho konisēnisí, ho lāngilangí, hoʻo tuí; tuʻu ko e helo” (Childrenʻs Songbook,158).
Naʻe uʻuuʻu tailiili pē ʻe ʻEli hono ngeʻesi nimá. Naʻe lue atu ʻa Misi Fiti ʻi he ngaahi ʻotu tesí mo ʻeke tahataha ki he fānau akó ha fehuʻi.
“Ko hai ʻokú ke tanganeʻia aí?” Ko e ʻeke ange ia ʻe Misi Fiti kia Selemií.
Naʻe ʻikai toe tatali ʻa Selemī ʻene talí. Naʻá ne talaange fiefia, “Ko ʻeku tangataʻeikí.”
Ne malimali ʻa Misi Fiti. “Fēfē koe Sala?”
Naʻe vave tatau pē mo ʻene talí. “ʻĒpalahame Linikoni.”
Ne ongoʻi ʻe ʻEli e tā vave hono mafú ʻi he hoko mai ʻa Misi Fiti he ʻotu ʻo e fānau akó. Ne nau talanoa ki he kau tangané ʻi he ʻahó kotoa, pea ko ʻeni, kuo pau ke talaange ʻe he taha kotoa ʻa e taha ʻoku tanganeʻia aí—ʻi he ʻao ʻo e kalasí kotoa!
Ne talaange ʻe ʻEmipā mo Siositeni ko ʻena faʻeé ʻokú na tanganeʻia aí. Ne talaange ʻe Uolotā ia ko ʻene kui tangatá. Ne ʻi ai mo ha niʻihi tokosiʻi kehe ne nau pehē ko ha tuʻi pe ko ha palesiteni.
Ne toe pē ha fānau ako tokosiʻi pea aʻu mai ʻa Misi Fiti kia ʻEli. Kuo pau ke ne fakakaukauʻi ha taha ʻoku tanganeʻia ai—mo vave foki.
Sio hifo ʻa ʻEli ki hono suú, pea mā. ʻOku ʻikai ko e palopalema totonú hono maʻu e taha ʻoku tanganeʻia aí. Naʻá ne ʻosi ʻiloʻi ʻa e taha ʻoku tanganeʻia aí. Ko Sīsū Kalaisi Naʻá Ne fakamoʻui ʻa e mahakí, fokotuʻu ʻa e maté, totongi huhuʻi ki he angahala ʻa e taha kotoa. Ko e tangane maʻongoʻonga taha ia kuo faifaiangé pea moʻui. Naʻe fuʻu ilifia pē ke ne lea ʻaki ia.
Toe uʻu ʻe ʻEli hono ngeʻesi nimá ʻi heʻene fakakaukau ke fakahā ki he kalasí kotoa ko Sīsū Kalaisi ʻoku tanganeʻia aí. Fēfē kapau ʻe kataʻi ia ʻe Selemī? Fēfē kapau ʻe lauʻi ia ʻe Sala mo ʻEmipā ʻi he mālōlō siʻí?
ʻOku moʻoni naʻá ne ʻiloʻi ko Sīsū Kalaisi ʻoku tanganeʻia aí. Ka ʻoku ʻikai ʻuhinga ia ke ʻiloʻi ʻe he taha kotoa.
Naʻe tuʻu tonu pē ʻa Misi Fiti ʻi muʻa he tesi ʻo ʻElí pea malimali. “Pea ko hai leva ʻokú ke tanganeʻia aí koe, ʻEli?”
Ne fakahilehila atu ʻa ʻEli ki he ʻotu ʻa e fānau ako hono tafaʻakí ʻo aʻu kia Misi Fiti. Peá ne fanafana ange, “ʻĒpalahame Lingikoni.”
Ne malimali ʻa Misi Fiti. Naʻá ne pehē ange ʻi heʻene lue atu ki he taha ako hoko mai ʻi he ʻotú, “Sai!”
ʻI heʻene mavahé atu pē, kuo hoholo hifo ʻa ʻEli ʻo fiemālie. Fakafetaʻi he kuo ʻosi. Ko e meʻa fakamuimui taha naʻá ne fie maʻu ke ʻilo ʻe he taha kotoa ʻi he kalasí, ko e taha ʻoku tanganeʻia aí.
Pehē hake ha leʻo ia, “Ko Sīsū Kalaisi.”
ʻĀʻā lelei e fofonga ʻo ʻElí ʻi heʻene sio māmālie atú. Ko ʻena—kiʻi mamaʻo siʻi atu pē he ʻotú—ʻoku ʻi ai ha kiʻi tamasiʻi louʻulu mafuefue. Naʻá ne tutue mo mā, pea naʻe tangutu maʻu pē ʻi mui ʻi he lokiakó. Naʻe ʻikai ke teitei ʻilo ʻe ʻEli ia hono hingoá. Naʻe ʻikai ke ne manatuʻi haʻane teitei puʻaki ha foʻi lea—tuku kehe ʻa e taimí ni.
Naʻe ʻi ai ha fānau ako tokosiʻi ne nau tafoki ke sio ki he kiʻi tamasiʻí, ka naʻe ʻikai ke ne fakatokangaʻi kinautolu. Naʻe sio pē kia Misi Fiti peá ne toe lea ange. “Ko Sīsū Kalaisi ʻoku ou tanganeʻia aí.”
Naʻe malimali lahi ʻa Misi Fiti pea hoko atu ʻi he ʻotú. Ka naʻe sio ʻa ʻEli ki he kiʻi tamasiʻí ʻo fakatumutumu. Naʻe manavasiʻi ia ke ne tala ki he tokotaha kotoa fekauʻaki mo e taha ʻoku tanganeʻia aí, ka naʻe ʻikai pehē ʻa e kiʻi tamasiʻí. Naʻe ʻikai foki ke ʻalu ki hono siasí! Ka naʻá ne ʻiloʻi hono mahuʻinga ke tuʻu ko ha faʻifaʻitakiʻanga ʻo Sīsū Kalaisí, ʻo aʻu ki he taimi naʻe faingataʻa aí.
Naʻe malimali atu leva ʻa ʻEli ki he kiʻi tamasiʻí. He ʻikai ke toe manavasiʻi ke fakahā ʻa e taha ʻoku tanganeʻia aí. He ko hono moʻoní, kuó na toko ua ʻi he taimí ni.