Ko e hā e lahi ʻo e ivi takiekina ʻo Sētané ki heʻeku ngaahi fakakaukaú?

ʻOku fakapapauʻi heʻetau Tamai Hēvaní ke tau maʻu ʻa e tauʻatāina ke filí, ʻa e malava ke fili ʻa e leleí pe koví. He ʻikai ke Ne fakamālohiʻi kitautolu ke tau fai lelei, pea he ʻikai ke lava ʻe he tēvoló ʻo fakamālohiʻi kitautolu ke tau fai kovi (vakai, Ngaahi ʻAkonaki ʻa e Kau Palesiteni ʻo e Siasí: Siosefa Sāmita [2007], 245).

Ko ia, ko e taimi ʻoku haʻu ai ki hoʻo fakakaukaú, ʻoku maʻu ʻe he tēvoló ʻa e ivi takiekina lahi ʻo fakatatau pē mo ia ʻokú ke fie foaki ange ki aí. Naʻe pehē ʻe he Palōfita ko Siosefa Sāmitá, “He ʻikai ke lava ʻe Sētane ʻo tohoakiʻi kitautolu ʻaki ʻene ngaahi fakatauelé kae ʻoua kuo pehē ʻe hotau lotó ʻoku tau loto mo tukulolo ki ai” (Ngaahi Akonakí: Siosefa Sāmita, 245). Naʻá ne toe pehē foki, “ʻOku ʻikai maʻu ʻe he tēvoló ha mālohi kiate kitautolu kae ʻoua pē kuo tau fakangofua ia” (245).

ʻIkai ngata ai, ʻoku talamai ʻe he folofolá “ʻoku ʻikai ha taha kehe ka ko e ʻOtuá pē ʻokú ne ʻafioʻi hoʻo ngaahi fakakaukaú mo e ngaahi holi ʻa ho lotó” (T&F 6:16), ko ia ʻoku ʻikai ʻiloʻi moʻoni ʻe Sētane ia ʻa e meʻa ʻokú ke fakakaukauʻí. Ko e meʻa pē ʻokú ne lava ʻo faí ko e fakahoko ha ngaahi ʻahiʻahi mo ha ngaahi fakatauele. Ka, kapau te ke fili ke muimui ki ai, ʻokú ne maʻu leva ha mālohi lahi ange kiate koe pea fakaʻau ke mālohiange mo e ngaahi ʻahiʻahí. ʻI he meʻa tatau pē, kapau te ke tekeʻi ʻa e koví pea fili ʻa e leleí, ʻe fakamālohia mo tāpuekina koe.