Ngaahi Fehuʻi mo e Talí
“Te u lava fēfē ʻo maʻu ha fiemālie lahi feʻunga ke talanoa ki heʻeku pīsopé ʻo kau ki ha ngaahi palopalema pe meʻa ʻoku ou hohaʻa ki ai?”
Mahalo te ke ongoʻi tailiili ke talanoa mo hoʻo pīsopé fekauʻaki mo e ngaahi meʻa ʻokú ke fefaʻuhi mo iá, pea ʻoku hoko pē ia. ʻOku tau faʻa tailiili kimuʻa ke tau foua ha ngaahi meʻa foʻou pe kimuʻa pea tau talanoa mo ha taha lahi.
Ka ko ʻetau pīsopé ʻoku ui ʻe he ʻOtuá. Naʻe ui ia koeʻuhí ko ha ākonga līʻoa ia ʻa Sīsū Kalaisi. Te ne fai hono lelei tahá ke angaʻofa mo maʻu ha mahino. Ko ʻene taumuʻá ke tokoniʻi koe ke ke haʻu ki he Fakamoʻuí koeʻuhí ke ke maʻu ha nonga. ʻI he kamataʻangá, mahalo te ke ongoʻi mā ke talanoa mo ia kau ki hoʻo ngaahi fehuʻí pe angahalá, ka he ʻikai sio lalo ai kiate koe. Ko hono moʻoní, ʻe fiefia ʻi hoʻo maʻu ha holi ke fakalakalaká. Pea te ne tauhi hoʻomo pōtalanoá ʻo ʻikai fakahāhā holo.
ʻOku ʻikai totonu ke ke fuesia toko taha pē hoʻo kavengá. ʻE lava ke tokoni atu hoʻo pīsopé ke ke maʻu e tali ki hoʻo ngaahi fehuʻí pea, kapau ʻe fie maʻu, tokoni ke ke fakatomala mo ikunaʻi, tuʻunga ʻi he Fakalelei ʻa Kalaisí, ʻa e ngaahi ongoʻi halaiá, siva e ʻamanakí, pe taʻe-tāú.
ʻI hoʻo talanoa ki hoʻo pīsopé, te ke ongoʻi ʻene ʻofa kiate koé. Neongo ʻokú ne fatongia ʻaki ʻa e uōtí pe koló kakato, ko e meʻa ʻoku tokanga taha ki aí ko e tuʻunga lelei ʻa e kau talavoú mo e kau finemuí. ʻOku ʻikai ke ke fakahohaʻasi ia ʻi hoʻo kole tokoní.
Te ke lava ʻo lotua ki he Tamai Hēvaní ke maʻu ha mālohi mo ha loto-toʻa ke talanoa mo hoʻo pīsopé. Kuó Ne fakamafaiʻi hoʻo pīsopé ke tokoni atu pea ʻoku fiefia hoʻo pīsopé ke fai ia. Kapau te ke ʻalu ʻi he loto tauʻatāina mo ha holi ke lelei ange, te ke fakatokangaʻi te ke mavahe mei hono ʻōfisí mo ha ongoʻi ʻoku toe lelei ange ʻi he taimi kimuʻá.
He ʻIkai Ke ne Taʻetokaʻi Koe
ʻOku foaki ki he pīsope ʻo homou uōtí ʻa e mafai ke ne tataki koe ʻi he ngaahi sitepu ʻo e fakatomalá. ʻI he taimi ʻe niʻihi, ko e tafoki ko ia ki hoʻo pīsopé, ko e founga pē taha ia ke ke fakatomala kakato ai ʻo fou ʻi he Fakamoʻuí. Ko e taimi naʻá ku fie maʻu ai ke talanoa ki heʻeku pīsopé, naʻá ne tokoniʻi au ke u ʻilo ʻa e Fakamoʻuí mo ikunaʻi ʻa e ngaahi kafo loloto taha naʻá ku maʻú. ʻOku loto hoʻo pīsopé ke tokoniʻi koe. Ko hono uiuiʻí ke tokangaʻi koe, pea he ʻikai ke sio lalo kiate koe koeʻuhí ko ha faʻahinga meʻa ʻokú ke fie maʻu ke mo talanoa ki ai.
Madison D., taʻu 18, ʻIutā, USA
ʻOku Fiefia Hoʻo Pīsopé ke Tokoni
Naʻá ku faʻa ongoʻi hohaʻa ʻi he ngaahi ʻinitaviú, ka naʻe faifai pē peá u fakatokangaʻi naʻe fiefia maʻu pē ʻeku pīsopé ke tokoni ke u fakaleleiʻi ʻeku ngaahi palopalemá. Falala ki hoʻo pīsopé; ko ha tauhi sipi ia pea ko e uōtí ʻa ʻene tākangá.
Jaime R., taʻu 19, Sokopamupā, Polīviá
He ʻIkai Ke Ne Lavakiʻi Hoʻo Falalá
Kuo fakaʻau ʻo u ʻiloʻi ko e pīsopé ʻoku meimei ko e tokotaha lahi falalaʻanga taha ia ʻe lava ke kumi tokoni ki ai ha taha taʻu hongofulu tupu. He ʻikai ke ne teitei maumauʻi hoʻo falalá—ko e meʻa kotoa pē ʻokú ke vahevahe mo iá, ʻe nofo ia ʻi hono ʻōfisí. ʻOku mātuʻaki faingataʻa he taimi ʻe niʻihi ke vahevahe hoʻo ngaahi palopalemá, ka ʻoku ʻai ʻe hoʻo talanoa hangatonu mo ha taha ʻoku ʻofa mo tokanga pea mo fie maʻu ʻa e lelei tahá maʻaú ke faingofua ange.
Nicole S., taʻu 18, ʻAitahō, USA
Te Ke Lava ʻo Falala Ki Ai
Ko hoʻo pīsopé pe palesiteni fakakoló ko ha tamaioʻeiki moʻoni ʻa e ʻEikí. Te ke lava ʻo falala ki ai ki ha fakahinohino ʻi hoʻo feinga ke maʻu ha ueʻi fakalaumālie mei he Laumālie Māʻoniʻoní pea mo e folofolá. Kuo pau ke mahino kiate koe ʻoku ʻi ai ʻa e pīsopé ke tokoni pea ʻoku tataki ia ʻe he ʻOtuá.
Stanislav R., taʻu 19, Tonetisikī, ʻIukuleini
Manatuʻi ʻOkú Ne ʻOfa ʻIate Koe
Kapau ʻoku ʻi ai haʻo meʻa ʻokú ke fuʻu fie maʻu moʻoni ke talanoa ki ai mo e pīsopé, mahalo naʻa faingofua ange ke ke ʻuluaki talanoa mo ia kau ki he akó mo ha ngaahi meʻa fakalūkufua kehe. Kapau ʻokú ke manavasiʻi koeʻuhí he ʻoku fie maʻu ke ke talanoa mo ia kau ki ha ngaahi meʻa ke fakatomala ai, manatuʻi pē ʻokú ne ʻofa ʻiate koe. ʻOku ʻikai fie maʻu ia ke ke manavasiʻi fekauʻaki mo ʻene fakakaukau kiate koé, koeʻuhí he ko e hā ʻe sio lalo ai kiate koe ʻi hoʻo fie maʻu ke ofi ange kia Kalaisí?
Ashley D., taʻu 17, ʻAlesona, USA
Lotua ke ke ʻIlo
Fehuʻi pē kiate koe pe ko e hā ʻokú ke ongoʻi taʻe-fiemālie ai ʻi hoʻo talanoa mo e pīsopé. ʻOkú ke fakakaukau he ʻikai ke lava ʻo tokoni atu ke fakaleleiʻi hoʻo ngaahi palopalemá? Lotu ke ke ʻiloʻi ʻoku ʻofa ʻa e pīsopé ʻiate koe pea kuo ui ke tokoni atu kiate koe.
Adam H., taʻu 13, Kalefōnia, USA
Naʻa Mo Haʻo Fai ha Fehalaaki
ʻE lava pē ʻo faingataʻa mo fakamā ke vete ha ngaahi meʻa ki hoʻo pīsopé, ka ʻi hoʻo hū ki tuʻa mei he ʻōfisi ko iá, te ke ongoʻi fiemālie, pea te ke ʻiloʻi ʻoku ʻofa ʻa e Tamai Hēvaní ʻiate koe. ʻOku finangalo ke ke fiefia, naʻa mo haʻo fai ha fehalaākí.
Amanda W., taʻu 16, ʻIutā, USA
ʻOku ʻi Hení ke Tokoni
Ko e pīsopé ko e tauhisipi ia homou uōtí. Manatuʻi te ne fai hono lelei tahá ke tokoniʻi koe pea ʻokú ne maʻu ʻa e mālohi ʻo e ʻOtuá ke kau mo ia. Kapau ʻokú ke ongoʻi manavasiʻi, te ke lava ʻo lotua ha mālohi ke ke lava ʻo talanoa ki hoʻo pīsopé. Ko hono fakaʻosí, te ke fiefia naʻá ke ʻalu ki ai—pea ʻe ʻaonga ia.
Samuel H., taʻu 14, ʻAitahō, USA