Naʻe Fanafana mai ʻa e Laumālié Kiate Au

Christina Albreacht Earhart, Uāsingatoni, USA

“Hei, ongo tama! Foki mai!” ko e ui ia siʻa leʻo fie tokoni.

Naʻá ku tafoki hake ʻo fakatokangaʻi ha ongo kiʻi tamaiki tangata ʻokú na taʻu nima mo e fitu nai, ʻokú na lele ʻi he loto tauʻanga meʻalele ʻo e falekoloá, ʻoku tafenoa pē hona loʻi matá. Naʻe mataʻi hohaʻa ʻa e tokotaha faifakataú ʻi heʻene ui atu kiate kinauá.

Ko e taimi naʻá ku tafoki mai ai ki heʻeku kaá, ne fanafana mai ʻa e Laumālié, “Te ke lava ʻo tokoni heni.” Naʻe leʻo siʻi ʻa e fanafaná ka naʻe mātuʻaki mahino pea ʻi ha momeniti pē mei ai kuó u lele ʻi he loto tauʻanga meʻalelé ʻo hangatonu atu ki he ongo kiʻi tamaiki tangatá.

Naʻá ku maʻu ʻa e tamasiʻi lahi haké ʻoku tuʻu ʻi ha veʻe meʻalele lanu melomelo. Naʻá ku aʻu atu ʻo tūʻulutui ʻi hono tafaʻakí.

“Mālō e lelei. Ko hoku hingoá ko Kilisitina. ʻOkú ke sai pē?”

ʻI heʻeku leá, naʻe tangi lahi ange mo kuku hono matá. Naʻe aʻu mai mo e tangata faifakataú mo e tamasiʻi ʻe tahá.

Talamai ʻe he faifakataú, “ʻOku ou tui ʻokú ne lea faka-Falanisē ʻataʻatā pē.” “Naʻa mau fakatokangaʻi ʻena lele ʻi he loto falekoloá, ʻokú na hē.”

Naʻá ku toe fakafeʻiloaki ange pē au ki he ongo kiʻi tamaikí ʻi he lea faka-Falaniseé. Ko ʻeku ʻuluaki lea fakafonuá ʻa e lea faka-Falaniseé, ka naʻe ʻikai ke u toe fakaʻaongaʻi talu hono ohi au ʻi heʻeku kei siʻí ki ha fāmili lea faka-Pilitānia. Ko hono moʻoní, ʻoku kovi ʻeku lea faka-Falaniseé. Neongo ia, naʻe ʻikai ke kovi pe fuʻu faingataʻa ʻi he momeniti ko iá. Naʻe mahino e leá ʻi heʻeku fakakaukaú pea mo hoku leʻó ʻi heʻeku fakanaʻanaʻa ʻa e ongo kiʻi tamaikí.

Naʻe fakamatala mai ʻe he kiʻi tamasiʻi lahi haké, he lolotonga ʻene halotulotú, ne ʻikai ke na maʻu mo hono kiʻi tokouá ʻena ongomātuʻá ʻi ha feituʻu ʻi he falekoloá pea ne na lele ki tuʻa ke kumi kinaua. Naʻe kamata ke u fakatokangaʻi ʻi heʻeku fakafanongó hono fakaofó, he naʻe ʻikai ngata pē ʻi heʻeku lea tauʻatāina ʻi he lea faka-Falaniseé ka naʻe toe mahino lelei kiate au foki ʻi heʻeku fakanaʻanaʻa ʻa e ongo kiʻi tamaiki ilifiá.

Naʻá ku talaange ki he faifakataú, “Kuo pulia ʻena ongomātuʻá pea ʻokú na fie tatali heni kiate kinaua, ʻi heʻenau veʻe meʻalelé.” Naʻe talamai ʻe he kiʻi tamasiʻí ʻa e hingoa ʻo ʻena ongomātuʻá, peá u ʻoange ia ki he faifakataú koeʻuhí ke ne ui kinaua he meʻa fakaongo leʻo lahí. ʻOsi pē mei ai ha ngaahi miniti siʻi kuo fakatokangaʻi atu ʻe he kiʻi tamasiʻí ʻene tamaí ʻi heʻene hū mai ki tuʻa mei he falekoloá pea lele atu ke fakafetaulaki ki ai.

Naʻá ku fakatokangaʻi ʻi heʻeku muimui atu ʻi he kiʻi tamasiʻí ki heʻene tamaí, naʻa mo e lea māvae ʻi he lea faka-Falaniseé, kuo ʻikai ke u toe lava ia ʻe au. Naʻá ku holiholivale ke lea ʻaki ha meʻa ʻe lava ʻo mahino ki he ongo kiʻi tamaikí, ka naʻe ʻikai ke u toe lava ʻo lea ʻaki ha meʻa tuku kehe pē ha ngaahi foʻi lea tōtōholo. Faifai, peá u foki ki he lea faka-Pilitāniá, ʻo pehē ange pē ki he kiʻi tamasiʻí, “Nofo ā Fakafiefia ke u fetaulaki mo koe.”

Naʻá ku houngaʻia ʻi heʻeku mavahe mei he ongo kiʻi tamaiki tangatá mo ʻena ongomātuʻá. Naʻe ngāue ʻa e Tamai Hēvaní ʻo fakafou ʻiate au ke fakafiemālieʻi ha toko ua ʻo ʻEne fānau īkí. Naʻá ku ongoʻi loto fakatōkilalo ʻi he lava ke fakaʻaongaʻi ʻe he ʻEikí ʻa e ngaahi meʻa fakangatangata ʻoku ou lavá ke fakahoko ʻaki ʻEne ngaahi taumuʻá. Naʻá ku fakamālō ke siotonu ʻi he meʻa ʻe lava ke hoko ʻi heʻetau foaki kitautolu kiate Ia ʻi he taimi ʻoku fie maʻu aí, ʻo aʻu ai pē ki he ngaahi tūkunga taʻe-ʻamanekiná.