Ko e Hala Totonú

Fai ʻe ʻEletā Claudio D. Zivic

ʻO e Kau Fitungofulú

Mei he “ʻOua Naʻa Tau ʻAlu ʻi ha Hala Kehe,” Liahona, Mē 2014, 39–41.

“Fanongo ki he ngaahi folofola ʻa e ʻOtua ʻa ia naʻá ne fakatupu ʻa kimoutolú” (T&F 43:23).

Naʻá ku ʻaʻahi mo hoku fāmilí ʻi he ngaahi taʻu lahi kuo hilí ki he Paʻake Fakafonua ʻAlesó (Arches) ʻi ʻIutā, USA. Ko e taha ʻo e ngaahi ʻaleso fakaʻofoʻofa taha ʻi he paʻaké ko e ʻAleso Pelepelengesí (Delicate Arch), pea mau pehē leva ke mau kaka ʻi he moʻungá ke aʻu ki ai.

Naʻa mau kamata fiefia, ka naʻe ʻikai hano taimi kuo fie mālōlō ʻa e toengá ia. Naʻá ku fie aʻu vave ki ai, ko ia ne u hoko atu toko taha pē. Naʻá ku kamata ke muimui ʻi ha tangata naʻe hangē naʻá ne ʻilo ʻa e feituʻu ne ʻalu ki aí, ʻo ʻikai ke u toe fuʻu tokanga ki he hala ne totonu ke u ʻalu aí.

Naʻe fakaʻau ke faingataʻa ange ʻa e halá heʻeku kaká. Naʻá ku tui he ʻikai lavaʻi ʻe hoku fāmilí. Fakafokifā pē kuó u fakatokangaʻi atu ʻa e ʻAleso Pelepelengesí, ka ne u ʻohovale, koeʻuhí he ʻikai ke u lava ʻo aʻu ki ai. Naʻe ʻikai fakatau atu ʻa e hala ne u fou aí ki he ʻalesó.

Naʻá ku loto mamahi peá u foki. Naʻá ku tali taʻe-fiemālie pē kae ʻoua kuó u toe fetaulaki mo ʻemau kulupú. Ne nau talamai ne nau muimui ʻi he ngaahi fakaʻilonga naʻa nau fakahinohino ʻa e hala totonú, pea ʻi heʻenau tokanga mo feingá, ne nau aʻu ki he ʻAleso Pelepelengesí. Meʻapango, he naʻá ku ʻalu au ʻi he hala kehe. Ko ha lēsoni mahuʻinga ne u akó!

ʻOua naʻa pulia ho hala ki he moʻui taʻengata mo hoʻo Tamai Hēvaní. Muimui ʻi he ngaahi tefitoʻi moʻoni ʻo e ongoongoleleí mo e ngaahi fekau ʻoku mou ʻiló, pea te ke ʻi he hala totonú ai ke nofo mo Ia ʻo taʻengata.