Pōpoaki ʻa e Faiako ʻAʻahí
Ko e Ngaahi ʻUlungaanga ʻo Sīsū Kalaisí—ʻIkai Ha Angahala pe Mālualoi
Ako ʻi he faʻa lotu ʻa e fakamatala ko ʻení pea fekumi ke ʻiloʻi e meʻa ke vahevahé. ʻE hanga fēfē ʻe he mahino ki he moʻui mo e ngaahi fatongia ʻo e Fakamoʻuí, ʻo fakatupulaki hoʻo tui kiate Iá mo faitāpuekina ʻa kinautolu ʻokú ke tokangaʻi ʻi he faiako ʻaʻahí? Ke maʻu ha fakamatala lahi ange, ʻalu ki he reliefsociety.lds.org.
Tuí, Fāmilí, Fakafiemālié
ʻE tokoni ʻa e mahino ko Sīsū Kalaisi naʻe ʻikai Haʻane angahala pe mālualoí ke tau feinga faivelenga ke muimui Heʻene sīpingá. Naʻe pehē ʻe ʻEletā Siosefa B. Uefilini (1917–2008) ʻo e Kōlomu ʻo e Kau ʻAposetolo ʻe Toko Hongofulu Mā Uá: “Ko e kākāʻí ko e lohiakiʻi pe takihalaʻi. … Ko ha taha ʻoku ʻikai kākaá ko ha taha ia ʻoku tonuhia, loto fie faitotonu, mo ha ngaahi taumuʻa haohaoa, pea ʻoku hāsino ʻi heʻene moʻuí ʻa e ngāue faingofua ko e fenāpasi ʻene tōʻonga fakaʻahó mo e ngaahi tefitoʻi moʻoni ʻo e faitotonú. … ʻOku ou tui ʻoku fuʻu fie maʻu lahi ange ʻi he taimí ni ke ʻoua naʻa fakameleʻi ʻe ha meʻa ʻa e kāingalotu ʻo e Siasí ʻo laka ange ʻi ha toe taimi koeʻuhí he ʻoku ʻi ai ha tokolahi ʻi māmani ʻoku ʻikai mahino kiate kinautolu hono mahuʻinga ʻo e ʻulungaanga ko ʻení.”1
Naʻe pehē ʻe Palsiteni Tietā F. ʻUkitofa, Tokoni Ua ʻi he Kau Palesitenisī ʻUluakí, fekauʻaki mo e mālualoí: “ʻOku ʻikai ha taha ʻiate kitautolu ʻoku aʻu ki he tuʻunga anga faka-Kalaisi ko ia ʻoku tau ʻilo ʻoku totonu ke tau faí. Ka ʻoku tau holi fakamātoato ke ikunaʻi ʻetau ngaahi fehalaākí mo e fakahehema ke faiangahalá. ʻOku tau fakaʻamua ʻaki hotau lotó mo hotau laumālié ke tau lelei ange ʻi he tokoni ʻa e Fakalelei ʻa Sīsū Kalaisí.”2
ʻOku tau ʻilo “ʻe fakamāuʻi kitautolu ʻo fakatatau mo ʻetau ngaahi angafaí, ngaahi holi ʻo hotau lotó, pea mo e tuʻunga kuo tau aʻu ki aí”3 Ka ʻi heʻetau feinga ke fakatomalá, te tau hoko ʻo haohaoa ange—pea ʻoku “monūʻia ʻa e loto-maʻá he te nau mamata ki he ʻOtuá” (Mātiu 5:8).
Ngaahi Potufolofola Kehé
Mei he Folofolá
ʻOku ʻikai ha kākā ʻi he fānau īkí. Naʻe folofola ʻa Sīsū Kalaisi: “Tuku ke haʻu kiate au ʻa e tamaiki īkí, pea ʻoua naʻa taʻofi ʻa kinautolu: he ʻoku ʻo e kakai peheé ʻa e puleʻanga ʻo e ʻOtuá. … Pea fua hake ʻe ia ʻa kinautolu ʻi hono nimá, ʻo hilifaki hono nimá kiate kinautolu, mo ne tāpuakiʻi ʻa kinautolu” (Maʻake 10:14, 16).
Naʻe toe ngāue foki ʻa Kalaisi ki he longaʻi fānau ʻi he Ongo ʻAmeliká hili Hono Tutukí. Naʻá Ne fekau ke ʻomai ʻe he kakaí ʻenau fānau īkí kiate Ia peá Ne “tuku ʻa kinautolu ʻi he funga kelekelé ʻo takatakai ʻiate ia, pea naʻe tuʻu ʻa Sīsū ʻi honau lotolotongá. …
“… [Pea] naʻá ne tangi, pea naʻe fakamoʻoni ki ai ʻa e kakaí, pea naʻá ne fua hake ʻa ʻenau fānau īkí, taki taha, ʻo ne tāpuakiʻi ʻa kinautolu, mo hūfakiʻi ʻa kinautolu ki he Tamaí. …
“Pea ʻi heʻenau hanga atu ke vakaí naʻa nau tangaki hake honau matá ki he langí, ʻo nau mamata ki he matangaki ʻa e langí, pea naʻa nau vakai ki he kau ʻāngelo ʻoku ʻalu hifo mei he langí ʻo hangē ʻoku nau ʻi he lotolotonga ʻo e afi; pea nau ʻalu hifo ʻo takatakai ʻa e fānau iiki ko iá, … pea naʻe tauhi ʻa kinautolu ʻe he kau ʻāngeló” (3 Nīfai 17:21, 24).