E ere o outou ana’e ra i roto i te ohipa

Na te peresideni Henry B. Eyring

Tauturu matamua i roto i te Peresideniraa Matamua

A fanuu ai outou mai te hoê taviniraa autahu’araa i te tahi, e ite ïa outou e, tei roto te Fatu i te ohipa i piha’i iho ia outou.

E te mau taea’e, ua mauruuru roa tatou no te piiraa te Fatu ia Elder Ronald A. Rasband, Elder Gary E. Stevenson, and Elder Dale G. Renlund ei aposetolo na te Fatu ra o Iesu Mesia. Te paturu nei tatou ia ratou ma to tatou aau, ta tatou mau pure e to tatou faaroo.

Ua ite tatou i to ratou faito aravihi rahi. Noa’tu râ, e hinaaro ratou i te mana’o haapapû i roto i to ratou piiraa, mai ia tatou atoa e, tei piha’i iho te Fatu ia ratou i roto i Ta’na ohipa. E hinaaro te diakono apî roa a’e i teie ti’aturiraa, mai te tahu’a rahi paari atoa e farii i te hoê piiraa apî.

E tupu mai taua paariraa ra a ite mai ai outou e, ua piihia outou e Ta’na mau tavini. Ta’u nei parau faaitoito, no te tautururaa ïa ia ite outou e, ia rave outou i ta outou tuhaa, e tuu mai te Fatu i To’na mana i roto i ta outou tautooraa.

Noa’tu â te piiraa e farii tatou i roto i te basileia o te Fatu, titauhia te haro’aro’araa rahi atu â i to te taata nei e te mau mana rahi atu â i to tatou iho nei. E titau te reira mau piiraa i te tauturu no ô mai i te Fatu, o te tae mai ihoa. E ite te diakono apî e, e parau mau te reira, e e tamau noa oia i te haapii na roto i te mau matahiti.

Tei ô nei hoê o to’u mau mootua tamaroa, o ta’na pureraa autahu’araa matamua teie. Ua faatoro’ahia oia ei diakono a ono mahana noa. Te tia’i ra paha oia i te opereraa i te oro’a i teie sabati i muri nei ei ohipa matamua na’na i roto i ta’na hopoi’a autahu’araa. Ta’u nei pure, oia ho’i, ia hi’o oia i te reira taime i to’na faito mau.

E mana’o paha oia e, ta’na ohipa na te Fatu, o te opereraa ïa i te oro’a i te taata e parahi ra i roto i te pureraa oro’a. E ere râ te rave-noa-raa i te pane e te pape te fâ a te Fatu. O te haapa’o râ i te hoê fafauraa e faahaere ia ratou i ni’a i te e’a e tae atu ai i te ora mure ore. E no te faatupu i te reira, titauhia ia horo’a te Fatu i te hoê ohipa haaputapûraa varua i te taata ta te diakono e opere ra i te oro’a.

Ua ite a’enei au i te reira i te tupuraa i roto i te hoê pû utuuturaa a pi’o ai te hoê diakono no te horo’a i te farii faraoa i te hoê vahine rouru hinahina. Ua hi’o oia i te faraoa mai te mea ra e e tao’a faufaa rahi. Aita roa e mo’ehia ia’u to’na mata ataata a rave ai oia i te oro’a e i muri iho ua tupa’ipa’i marû noa i te upo’o o te diakono ma te parau huru puai atoa râ e, « Mauruuru roa ! »

Ua rave noa ho’i taua diakono ra i ta’na hopoi’a autahu’araa. Tera râ, ua faarahi te Fatu i ta’na tautooraa. Ua ite-maitai-hia e, te haamana’o ra teie tuahine i te Faaora a faaite ai oia i to’na mauruuru no te taviniraa a teie diakono. Ua ite papû teie vahine na roto i to teie diakono horo’araa i te oro’a ia’na e e vai mai ïa te Varua i roto ia’na. Aita oia i vai oia ana’e ra i taua mahana ra. Aita atoa te diakono i vai ona ana’e ra i roto i ta’na taviniraa ha’iha’i.

Eita paha te haapii i roto i te Autahu’araa a Aarona e ite e, ia hahaere oia e haapii i te hoê utuafare, e hoa oia no te Fatu i roto i Ta’na ohipa. Te haamana’o noa nei â vau i te iteraa haehaa o te hoê tamaroa, e taea’e hahaere tei haere mai i to matou fare. Ua haapapû mai te Varua i ta’na mau parau ia’u e i to’u nei utuafare. Aita paha oia e haamana’o ra i te reira mahana, o vau râ, oia ïa.

E faarahi faahou â te Fatu i te tautooraa a teie tamaroa i te taime e piihia ai oia ei tahu’a. Te bapetizoraa matamua ta’na e rave, no te hoê paha, taure’are’a aita ona i mâtau. E pe’ape’a paha oia mai te mea e parau anei oia i te mau parau tano e e rave ti’a anei oia i te oro’a.

E faarahi râ te Fatu, o ta’na e tavini ra, i ta’na piiraa. Ua ma’iti te taata ta’na i bapetizo ia haere na ni’a i te e’a e tae atu i te ora mure ore. E rave ïa te Fatu i Ta’na tufaa rahi a’e. Ua na reira Oia no’u i te hoê taime a parau ai te hoê tamaiti ta’u i bapetizo, i roto i to’u nei tari’a ma te roimata e tahe ra i to’na na mata e « Ua mâ vau. Ua mâ vau. »

A faanuu ai outou mai te hoê taviniraa autahu’araa i te tahi, e ite ïa outou e, tei roto te Fatu i te ohipa i piha’i iho ia outou. Ua haapii mai au i te reira na roto i te farereiraa i te hoê peresideni pŭpŭ peresibutero i roto i te hoê amuiraa tĭtĭ a rave rahi matahiti i teie nei. I roto i te amuiraa ua faaitehia mai hau atu i te 40 i’oa o te mau taea’e e farii ra i te Autahu’araa a Melehizedeka.

Ua fariu mai te peresideni tĭtĭ ia’u e ua parau mărû mai, « Teie mau taea’e e tano ei peresibutero, e mau taea’e paruparu ana’e ratou paatoa ». No to’u maere, ua ani au i te peresideni e aha ra ïa ta’na faanahoraa no te faaora i teie mau taea’e.

Ua toro oia i to’na rima i ni’a i te hoê taure’are’a i muri roa mai i te fare pureraa. E ua na ô mai ra, « O ona. Te rahiraa o teie mau taea’e, ua faaho’ihia mai ïa e taua peresideni peresibutero ra ». Te parahi ra oia i ni’a i te parahiraa hopea, e ahu mahana noa to’na, afaro te avae i mua ia’na, te tahi i ni’a i te tahi, e to’na tiaa faaapu mutumutu.

Ua ani au i te peresideni titi e, ia farerei au ia’na i muri a’e i te amuiraa. I to maua farereiraa, ua parau vau i teie taure’are’a to’u maere i te mea ta’na i rave e ua ani au e nahea to’na raveraa. Ua haapee oia i to’na tapono i ni’a. Aita oia i hinaaro rii a’e ia parauhia e o ona te tumu.

I muri iho ua parau mărû mai oia, « Ua mâtau vau i te mau tane paruparu atoa i roto i teie oire. E pereoo uta to te rahiraa o ratou. E pereoo uta atoa to’u. E horoi au i to’u pereoo uta i te vahi e horoi ratou i to ratou pereoo. Ua riro mai ratou i muri iho ei mau hoa no’u.

« I muri iho e tia’i au i te taime e tupu te hoê fifi i roto i to ratou oraraa. E tupu ihoa te reira. E faati’a mai ratou ia’u. E faaroo vau e eita vau e imi i te hape. E ia parau ana’e ratou e, ‘E mea hape e vai ra i roto i to’u nei oraraa. I to’u mana’o, te vai ra te tahi faito maitai a’e.’ E parau vau ia ratou i te mea ta ratou e ere ra e te vahi e ite ratou i te reira. E ti’aturi mai ratou ia’u i te tahi taime, e ia na reira ratou, e rave au ia ratou na muri ia’u ».

Te ite ra outou e, no te aha oia i vai haehaa noa’i. No te mea ua ite oia e ua rave oia i ta’na tuhaa iti e ua rave te Fatu i te toe’a. Na te Fatu i haaputapû i te aau o taua mau taata ra i roto i to ratou mau fifi. Na te Fatu i horo’a ia ratou i te mana’o e, te vai nei te tahi atu mea maitai a’e no ratou e te tahi ti’aturiraa e e itehia te reira ia ratou.

Teie tamaiti apî—mai ïa outou ato’a—e tavini ïa na te Fatu, tei ti’aturi noa e mai te mea e rave oia i ta’na tufaa iti, e tauturu ïa te Fatu i taua mau taata ra ia ho’i i te fare e i te poupou o Ta’na ana’e e nehenehe e horo’a ia ratou. Ua ite atoa teie taata e ua pii te Fatu ia’na ei peresideni no te pupu peresibutero no te mea e rave atu oia i ta’na tufaa ohipa.

Te vai ra te taime i roto i ta outou taviniraa eita e noaa ia outou te manuïaraa rahi e ite-mata-hia mai ta teie peresideni apî no te pupu peresibutero. Tera ïa te taime e ti’a ai ia outou ia ti’aturi e, no To’na iteraa e, e rave outou i ta outou tufaa ohipa, ua pii Oia ia outou na roto i Ta’na mau tavini haamanahia. Ua riro te faaroo i to’na piiraa mai roto mai i te mau tavini a te Fatu ei mea faufaa rahi roa i roto i te taviniraa misionare a te papa o to’u nei papa ruau Henry Eyring.

Ua bapetizohia oia i te 11 no mati 1855 i St. Louis, i Missouri. I muri noa iho, ua faatoro’a o Erastus Snow ia’na i te toro’a tahu’a. Ua pii te peresideni o te titi no St. Louis, o John H. Hart, ia’na ia tavini i te hoê misioni i te Nunaa Cherokee i te 6 no atopa.¹ Ua faatoro’ahia oia ei peresibutero i te 11 no atopa. Ua tere atu oia na ni’a i te puaahorofenua no te misioni i roto i te Nunaa Cherokee i te 24 no atopa. E 20 matahiti to’na, e hitu ava’e noa to’na faafariuraahia mai.

Mai te mea te vai nei te tahi taea’e tei mau i te autahu’araa tei mana’o e aita to’na e aravihi aore râ ua ere oia i te hoê faaineineraa, o Henry Eyring ïa. Te tumu ana’e i noaa ai ia’na te itoito no te haere atu no te mea ïa e, ua ite to’na aau e, ua pii te Atua ia’na na roto i Ta’na mau tavini haamanahia. O te tumu ïa no to’na itoito. O tera ïa te tumu no to tatou itoito i te tamau-noa-raa, noa’tu e aha to tatou piiraa i roto i te autahu’araa.

I muri a’e i to Elder Eyring taviniraa e toru matahiti fifi e i muri a’e i te poheraa o te peresideni misioni, ua nominohia e ua paturuhia o Henry Eyring ei peresideni misioni i roto i te hoê rururaa tei tupu i te 6 no atopa 1858. Ua maere e ua hitimahuta oia mai te hoê diakono apî te huru. Ua papa’i oia, « E mea mana’o-ore-hia teie piiraa i taua ti’araa ra, no te mea râ o te hinaaro teie o te mau taea’e, ua farii ïa vau ma te oaoa, ma te ite atoa i taua taime ra i to’u paruparu rahi e to’u aravihi ore ».²

Ua tere atura teie peresideni Eyring, i te mau fenua Cherokee, Creek e Choctaw i te matahiti 1859. Na roto i ta’na mau tautooraa, ua « tuu faahou » mai te Fatu, mai ta Henry i parau, « i te hoê numera i te Ekalesia ». Ua haamau oia e piti ama’a, tera râ, ua papa’i e « e mea iti roa te feia itoito i roto i teie ohipa ».³

Hoê matahiti i muri mai, ua faaruru Henry i te fifi e, aita te mau ti’a poritita i rotopû i te mau taata ta’na e tavini ra i faati’a faahou i te mau misionare Feia Mo’a i te Mau Mahana Hopea Nei ia rave i ta ratou ohipa. A feruri ai oia e aha te rave, ua haamana’o a’era oia i te parau a to’na peresideni tahito tei na ô mai e ti’a ia faaroa’tu oia i ta’na misioni e tae noa’tu i te matahiti 1859.⁴

I te ava’e atopa, i tera matahiti, ua papa’i o Henry i te Peresideni Brigham Young no te arata’iraa, aita râ oia i farii i te hoê pahonoraa i ta’na uiraa. Ua papa’i Henry, « No to’u oreraa i faaroo i te tahi parau no ô mai i te peresideniraa o te Ekalesia, ua pii au i te Fatu na roto i te pure, ma te ani ia’na ia heheu mai ia’u to’na mana’o e to’na hinaaro no ni’a i to’u faaea-maoro-raa i roto i te misioni aore râ ia haere atu i Ziona na ».

Te parau faahou nei Oia : « Ua horo’ahia mai ia’u teie moemoeâ ei pahonoraa i ta’u pure. Ua moemoea vau e ua tae au i te Oire [no Roto Miti] e ua haere tia’tu vau i te piha toro’a a [te peresideni Brigham] Young, i reira to’u iteraa ia’na. Ua parau atu vau ia’na : ‘E [te Peresideni] Young, ua faaru’e au i ta’u misioni, ua haere mai au na ni’a i to’u iho mana’o, e mai te mea râ te vai nei te tahi hape i roto i teie tere, ua ineine au i te ho’i no te faaoti i ta’u misioni.’ [I roto i te moemoea, teie ta te peropheta] i pahono mai: ‘Ua faaea maoro oe, e mea maitai ïa’ ».

Ua papa’i Henry i roto i ta’na buka tamahana e, « No te mea ho’i e ua farii au i te mau moemoeâ na mua’tu o tei tupu, ua ti’aturi ïa vau e, e tupu atoa teie, no reira ua haamata vau i te reira ihoa taime ia faaineine no te haere ».

Ua tae atu oia i te Oire no Roto Miti i te 29 no Atete 1860, ma te haere avae noa i te rahiraa o te taime. Piti mahana i muri mai, ua haere atu oia i roto i te piha toro’a a te peresideni Brigham Young.⁵

Teie ta’na i papa’i no ni’a i teie nei tere : « Ua farerei au i [te Peresideni] Young, tei farii maitai mai [ia’u]. Ua parau vau ia’na, ‘[Peresideni] Young, ua haere mai au ma te ore i anihia, mai te mea e ua hape au, ua ineine au i te ho’i e faaoti i ta’u misioni.’ Ua pahono mai [o Brigham Young] : ‘E mea maitai roa… I imi noa nei matou ia oe ».

Ua faaite Henry i to’na oaoa ma te parau e, « Ua tupu ihoa ta’u nei moemoeâ ».⁶

Ua tae mai to’na oaoa na roto i te hoê haapapûraa e ua haa e ua tia’i na te Fatu i ni’a ia’na. Ua haapii oia i te mea parau mau no tatou paatoa—oia ho’i, ua faauruhia te mau tavini a te Fatu no te ite i te hinaaro o te Fatu. E ua haapapû o Henry Eyring i te mea ta’u atoa i ite : oia ho’i, e faauruhia te peropheta, ei peresideni no te autahu’araa, no te tia’i e no te atuatu i te mau tavini a te Fatu, e no te pii ia ratou.

Noa’tu e aha to outou piiraa i roto i te autahu’araa, ua mana’o paha outou i te tahi mau taime e aita te Metua i te Ao ra e tau’a nei ia outou. E nehenehe ta outou e pure no te ite i To’na hinaaro, e ma te hinaaro mau ia rave i te mau mea atoa Ta’na e ani mai ia outou ia rave, e farii ïa outou i te hoê pahonoraa.

E faati’a te Metua i te Ao ra ia ite outou e ua ite Oia ia outou, e te mauruuru nei Oia i ta outou taviniraa, e te ti’amâ ra outou i te parau fariiraa no ô mai i te Fatu o ta outou e hinaaro rahi i te faaroo: « Ua ti’a roa, e teie nei tavini maitai e te haavare ore, ua haapao maitai oe i tena na tao’a iti haihai, e faatiaau atu vau ia oe i ni’a iho i te mea rahi ; e haere oe i roto i te oroa oaoaraa a to Fatu ».⁷

Teie ta’u pure, ia haere atu te taea’e tata’itahi tei mau i te autahu’araa ma te faaroo e faaora i te mau varua atoa ta’na e tiaau nei. E amui mai te Atua i To’na puai i te mau tautooraa o Ta’na tavini. E putapû te aau o te mau taata no te rave i te mau ma’itiraa o te afa’i atu ia ratou i ni’a i te e’a o te evanelia ia tae i te poupou e ia faaatea ê atu i te oto.

Teie ta’u pure, ia ite te taea’e tata’itahi tei mau i te autahu’araa i te atuatu here e te tia’i a te Metua i te Ao ra, a te Faaora e a te peropheta a te Atua i roto i to’na piiraa i roto i te autahu’araa.

Te faaite nei au i to’u iteraa papû taa ê e tei roto tatou i te taviniraa a te Fatu tei ti’a faahou mai, o Iesu Mesia. Te faaite papû nei au e ua pii Oia ia outou e ia’u nei i roto i Ta’na taviniraa ma te ite i to tatou mau aravihi e te tauturu e titauhia no tatou. E haamaitai Oia i ta tatou mau tutavaraa hau atu i ta tatou i mana’o, a horo’a ai tatou ia tatou atoa i roto i Ta’na taviniraa. Te faaite papû nei au e faauruhia te peropheta a te Atua, te peresideni no te taatoaraa o te autahu’araa i ni’a i te fenua nei, e te Atua.

Te mauruuru nei au no te mau hi’oraa maitai o te mau taea’e no te autahu’araa i te mau vahi atoa. Te mauruuru nei te Metua i te Ao ra e te Faaora i te raveraa outou i ta outou tuhaa. Ua ite Raua ia outou, te hi’o nei Raua i ni’a ia outou e ua here Raua ia outou. Na roto i te i’oa o Iesu Mesia ra, amene.