Episekopo Dean M. Davies

Tauturu matamua i roto i te Episekoporaa Faatere Rahi

« I to’u apîraa », te na reira ra te Episekopo Dean M. Davies, « Ua riro to matou mahora nehenehe maita’i ei oaoaraa no’u, e ua apo mai au i te hoê haapiiraa : na te tahi tautooraa iti hau atu e faatupu i te hoê taa-ê-raa mau i roto fatata i te mau mea ato’a ta tatou e rave ». Ua riro te horo’araa maa vahi iti hau a’e ei peu tumu o te tamau noa i te tavini maita’i ia’na ei Tauturu matamua apî i roto i te Episekoporaa Faatere Rahi.

Ua tavini te Episekopo Davies ei tauturu piti no te Episekopo Gary E. Stevenson, tei paturuhia ei melo no te Pupu no te Tino Ahuru ma Piti Aposetolo i te 3 no atopa 2015.

Ua fanauhia te Episekopo Davies i Roto Miti, Utaha, i Marite i te 5 no setepa 1951. Ua paari oia hoê o na tamarii e va’u. Te faaite nei oia i to’na mauruuru i to’na na metua tei here e tei aupuru i ta raua mau tamarii, e tei tauturu ato’a ia ratou ia oaoa i te mau haamaita’iraa o te ohipa. Ua faaoipoipo oia ia Darla James i te matahiti 1973, i roto i te hiero no Roto Miti. E 5 ta raua tamarii e e 14 mootua.

Ua haapii ato’a mai te Episekopo Davies i te hoê haapiiraa faufaa roa a ora ai oia i San Franicsco, i Californie, i Marite, i te matahiti 1989 ra. I roto i te hoê aueueraa fenua, ua ite mata oia i te ino rahi o te mau fare tei patuhia ma te niu papû ore. « Na te feruri-maite-raa i te mau ohipa i taua mahana ra i haapapû i roto i to’u feruriraa e to’u aau e, no te pato’i manuia i te mau vero, te mau aueueraa fenua e te mau ati o te oraraa, e mea ti’a ia tatou ia patu i ni’a i te hoê niu papû … te niu o Iesu Mesia (« Hoê niu papû », Liahona, Me 2013, 9).

Ua riro te Episekopo Davie ei rave ohipa na te Ekalesia mai te ava’e tiurai 1995 maira. Aita i maoro a’enei, o oia te raatira faatere no te tuhaa faatere no te mau Opuaraa taa ê a te Ekalesia ; na’na e haapa’o i te ohipa fenua, te hamaniraa hoho’a hiero, e te paturaa hiero.

Hou a rave ai oia i te ohipa i roto i te Ekalesia, ua rave te Episekopo Davies i te ohipa i roto i te hoê taiete tapihaaraa no Lancaster, Pennsylvania, e i roto i te taiete Faahoturaa moni Bechtel no San Francisto, California. Ua farii oia i te hoê parau tu’ite licence no te tereraa faufaa faaapu i te fare haapiiraa tuatoru no Brigham Young University i te matahiti 1976 e faaoti ato’a oia i te tahi haapiipiiraa hau atu na te mau upoo faatere i te mau fare haapiiraa teitei no Stanford e no Northwestern.

Ua tavini te Episekopo Davies ei peresideni no te misioni no Puerto Rico San Juan, ei tauturu peresideni misioni, ei peresideni titi, ei tauturu peresideni titi, ei papa’i parau faatere no te titi, ei melo apooraa teitei, i roto e rave rahi episekoporaa, e ei misionare rave tamau i roto i te misioni no Uruguay/Paraguay.