E parau te mau tamarii, « O tatou To’na mau rima »

Ua pahono oaoa te mau tamarii na te ao ato’a nei i te hoê tau taviniraa tei faanahohia na te mau ve’a o te Ekalesia. Ua ani te mau ve’a i te mau tamarii ia imi i te mau rave’a no te tavini, i muri iho, e papa’i i to ratou rima i ni’a i te hoê api parau, e papa’i i ta ratou ohipa taviniraa i ni’a i te hoho’a o te rima, e a hapono atu ai i te Liahona.

Ua farii te mau ve’a hau atu i te 30 000 hoho’a rima no ô mai i te mau tamarii ra tei haere e faaite i te here o te Faaora, ma te haamaita’i i te mau utuafare e te mau taata tupu na te ao ato’a nei.

Te faaururaa no te pororaa, ua tupu mai ïa na roto mai i te hoê a’oraa no te amuiraa rahi no eperera 2010 na te peresideni Dieter F. Uchtdorf, tauturu piti i roto i te Peresideniraa Matamua, te upoo parau « Outou to’u mau rima ». Ua faati’a te peresideni Uchtdorf i te aamu no te hoê tii no Iesu Mesia tei pepe i roto i te Tama’i rahi II o te ao. No te mea aita i nehenehe ia ratou ia tâtaî i na rima o te tii, ua papa’i te mau taata i teie mau parau i raro : « Outou to’u na rima ».

Ua riro te mau ohipa taviniraa a te mau tamarii ei mau ohipa faahiahia mai te mau hoho’a rima ta ratou i faatae mai. Ei hiʻoraa :

Natalie S., 5 matahiti, no Hong Kong, ua hapono oia e piti hoho’a rima. Hoê te parau ra, « Ua tauturu vau i to’u mama na rapae i te fare », e te tahi, « ua tauturu vau i te tura’iraa i te hoê taata i roto i te parahiraa huira ».

Erik S., 11 matahiti, no Russia, te parau ra e, « I roto i te oire e orahia nei e au, e mea to’eto’e roa te pu’e tau to’eto’e ». Ua tae mai te hoê utuafare i roto i to’na oire, e aita to ratou e ahu mahanahana. « Ua nehenehe ia’u ia horo’a i to’u pereue mahanahana ia Artur ra », te parau ïa a Erik, « e ua riro mai oia ei hoa no’u ».

Gabriela P., ahuru matahiti, no Venezuela, ua nene’i oia i ni’a i ta’na hoho’a rima : « I ta’u fare haapiiraa, tei roto to’u mau hoa e o vau i te piha ha’utiraa pere faanuu. Te imi ra vau i te hoê apiti no’u no te ha’uti, ite atura vau i te hoê tamaiti iti apî mai te huru ra e, te oto ra oia. Ua hinaaro vau e tauturu, aita râ vau i ite e, nahea. Ua parau maira te hoê reo e, a faariro noa ia oe ei hoa no’na. Ua haere atura vau e paraparau ia’na. I teie nei, e hoa rahi roa maua ».

Ua piahia te mau hoho’a rima i te pû faatereraa a te Ekalesia i Salt Lake City, Utaha, Marite, no te roaraa e piti hepetoma i roto i na ava’e no tetepa e atopa.