Episekopo W. Christopher Waddell

Tauturu piti i roto i te Episekoporaa Faatere Rahi

Ei maona no te fare haapiiraa tuarua, ua farii o Christopher Waddell i te hoê moni haapiiraa (bourse) ha’utiraa pâ’iraa popo no te fare haapiiraa teitei no San Diego i California, i Marite. Tera râ, ua haapii oia ia faaite i te mauruuru i te hoê episekopo tei ani ia’na no ni’a i te tahi atu mau mea i te taime tei te fare oia i te mau taime faafaaearaa.

« Aita oia i parau e, ‘e aha te huru te pâ’iraa popo ?’ ua ani mai râ oia e, ‘e aha to oe huru ? Te pure ra anei oe i to oe mau pure, te vai paari noa ra anei oe, te vai itoito noa ra anei oe i roto i te Ekalesia ?’ Ua mauruuru roa vau i teie mau uiraa [no ni’a i] … te mau mea faufaa a’e », te faahaamana’oraa ïa a te Episekopo Waddell.

Na roto i te faatumuraa i ni’a i te mau mea faufaa a’e, ua tauturu te reira i te Episekopo Waddell ia haapa’o i na parau tumu e piti a te utuafare, « Ho’i mai ma te hanahana » e « Ti’aturi i te Fatu ». Aua’a taua ti’aturiraa ra i ti’a ai ia’na ia faataime i te ha’uti pâ’iraa popo no te tavini i te hoê misioni. I to’na ho’iraa mai na te misioni, ua ti’a ato’a ia’na ia haere tamau noa i roto i te hoê arapaeraa i te hoê tamahine i te tahi atu fare haapiiraa teitei. I muri a’e, ia oti raua i te faaipoipohia, na roto i te ti’aturiraa i te Fatu, ua ti’a ia raua ia faaroo i te Varua i roto i te raveraa i te mau faaotiraa no ni’a i te faanuuraa i te vahi.

Te parau ra oia e, « Mai te mea e, e rave oe i te ohipa na roto i te faanahoraa a te Fatu, e maita’i te mau mea ato’a ».

Ua tamau te ti’aturiraa i te Fatu i te haamaita’i i te Episekopo Waddell, tei tavini ei Hitu Ahuru hui mana faatere rahi mai te ava’e eperera 2011, a riro ai oia i teie nei ei tauturu piti i roto i te Episekoporaa Faatere Rahi.

Ua fanauhia o Wayne Christopher Waddell i Los Angeles, California, i te matahiti 1959. Ua faaipoipo oia ia Carol Stansel i te ava’e tiurai 1984 i roto i te hiero no Los Angeles California. E maha ta raua tamarii e e toru mootua. Ua riro na oia ei tauturu i roto i te peresideniraa no te area no Amerika Apato’a i te mau pae apato’erau Too’a o te râ, e parahi oia i Peru no te tahi taime poto.

Ua roaa i te Episekopo Waddell te hoê parau tu’ite licence i te matahiti 1984 i te fare haapiiraa teitei no San Diego. Ua rave ato’a oia i te ohipa no te tuhaa toru i roto i te faanahoraa Executive MBA i BYU. Ua haamata oia i te rave i te ohipa i te matahiti 1984 i piha’i iho ia Merrill Linch, i reira oia i riro mai ai ei mono peresideni no te mau faahoturaa moni.

Ua tavini te Episekopo Waddell ei Hitu Ahuru Area, ei peresideni no te misioni no Barcelone i Paniora (i reira ho’i to’na taviniraa ei misionare rave tamau), ei peresideni titi, ei tauturu i roto i te hoê peresideniraa misioni, ei episekopo, e ei tauturu i roto i te hoê episekoporaa.