Elder L. Whitney Clayton

Peresideni matahiapo no te Hitu Ahuru

I to’na apîraa, ua haapii Elder L. Whitney Clayton i te here i te ohipa e i te utuafare. Pauroa te mahana maa, i te po’ipo’i roa, e reva’tu to’na metua tane, i ta’na ohipa taote. Na mua a’e oia a reva’tu ai, e papa’i oia i ni’a i te tapura ereere i te hoê tapura ohipa e rave i taua mahana ra. Ia ho’i mai oia, e amui atu oia i ta’na mau tamaiti no te rave i te ohipa i piha’i iho ia ratou. Na roto mai i to’na metua tane, ua haapii mai Elder Clayton i te faufaa o te ohipa tei haamaita’i i to’na oraraa.

Ua ite ato’a te utuafare o Elder Clayton e, te tamaaraa pô, e taime ïa no te utuafare. « E paraparau matou no ni’a i te poritita, no ni’a i te ohipa tei tupu i te fare haapiiraa, no ni’a i te mau taata i te tahi a’e pae i ô matou, no ni’a i te evanelia, e no ni’a i te Ekalesia … Ua riro ïa ei rave’a no te tupuraa i te rahi ». Ua riro te mau aparauraa i te taime tamaaraa ei peu ta raua o ta’na vahine i haapa’o noa e ta raua mau tamarii.

Ua nominohia o Elder Clayton ei peresideni matahiapo no te Hitu Ahuru i te 6 no atopa 2015. Te mono nei oia ia Elder Ronald A. Rasband, tei piihia i roto i te Pupu no te Tino Ahuru ma Piti Aposetolo.

Ua paturuhia Elder Clayton ei Hitu Ahuru hui mana faatere rahi i te 31 no mati 2001. Ua tavini oia ei melo no te peresideniraa o te Hitu Ahuru mai te matahiti 2008 maira, e na’na i tiaau i te mau area no Utaha. Ua tauturu oia ia Elder David A. Bednar no te Pupu no te Tino Ahuru Ma Piti Aposetolo i roto i te tiaauraa i te mau area no Afirita Apato’a Hiti’a o te râ, e Afirita Too’a o te râ. Ua tavini ato’a oia ei melo i roto i te Tomite no te ohipa haaparareraa parau. Ua tavini oia ei tauturu i roto i te peresideniraa area no Amerika Apato’a te mau pae apato’a mai te matahiti 2002-2003, e ei peresideni mai te matahiti 2003-2006.

Ua fanauhia i Roto miti, Utaha, i Marite, i te matahiti 1950, ua faaipoipo ia Kathy Ann Kipp i te matahiti 1973 i roto i te hiero no Roto Miti. E 7 tamarii ta raua e e 20 mootua.

Ua roaa ia Elder Clayton te parau tu’ite licence no te ohipa moni i te fare haapiiraa teitei University of Utah, e te hoê parau tu’ite no te pae o te ture i te fare haapiiraa teitei University of the Pacific. E paruru to’na toro’a i California, i Marite mai te 1981 e tae atu i te 2001.

Ua tavini oia ei Hitu Ahuru Area, ei ti’a retioni, ei tauturu peresideni misioni, ei melo apooraa teitei, ei episekopo, ei peresideni misioni o te titi, e ei orometua haapii i te Parau haapiiraa no te Evanelia. Ua tavini oia ei misionare rave tamau i Peru mai te matahiti 1970 e tae atu i te 1971.