Episekopo Gérald Caussé

Episekopo Faatere Rahi

Tei roto noa â Gérald Caussé i te haapapûraa i to’na toro’a i roto i te tapihaaraa o te hooraa maa i Farani i te 33raa o te matahiti a titau mai ai te peresideni o te taiete e paraparau ia’na. Ua ite oia i te mau ti’aturiraa faaroo o Gérald e to’na aravihi ia rave i te mau faaotiraa maita’i e ia faatahoê i te mau rave ohipa—e mau huru teie tei roaa ia’na na roto i te ohipa, te taviniraa e te faatereraa i roto i te Ekalesia. Ua faaoti te peresideni e, ua riro o Gérald ei taata e nehenehe ta’na e ti’aturi.

I to’na maere rahi, aita i maoro ua horo’ahia ia Gérald te hopoi’a no te faatere 1 800 rave ohipa. I te taime a piihia ai oia ei Hitu Ahuru hui mana faatere rahi hoê ahuru matahiti i muri a’e, i te ava’e eperera 2008, te faatere ra oia e rave rahi taiete hooraa maa.

Na roto i te aravihi no te ohipa putu faufaa e te faatereraa o te Episekopo Caussé, apitihia i ta’na taviniraa i roto i te faaroo e to’na ite no te ohipa faatereraa, e riro ïa ei tautururaa rahi no’na i roto i to’na ti’araa ei Episekopo Faatere Rahi apî no te Ekalesia. Ua tavini te Episekopo Caussé ei tauturu matamua i roto i te Episekoporaa Faatere Rahi mai te ava’e mati 2012 maira, e ua farii oia i to’na piiraa apî tau mahana rii noa i muri a’e i te amuiraa rahi no atopa. Te mono nei oia ia Elder Gary E. Stevenson, tei paturuhia i roto i te Pupu no te Tino Ahuru Ma Piti Aposetolo i te 3 no atopa 2015.

O te Episekopo Gérald Jean Caussé te 15raa o te Episekopo Faatere Rahi, e ua fanauhia oia i Bordeaux, i Farani, i te matahiti 1963. Ua faaipoipo oia ia Valérie Babin i te matahiti 1986, i roto i te hiero no Bern Suisse. E 5 ta raua tamarii e e 5 mootua.

Taa ê noa’tu i to’na iteraa i roto i te Episekoporaa Faatere Rahi e ei melo no te Hitu Ahuru, ua tavini na oia ei tauturu i roto i te peresideniraa Area no Europa e ei Hitu Ahuru Area, ei peresideni titi, ei tauturu peresideni titi, ei tauturu episekopo, ei tia’i pupu tahu’a rahi, e ei peresideni no te pupu peresibutero.

I to’na taure’are’araa, ua itehia i te Episekopo Caussé te oaoa e tae noa’tu te faaroo na roto i ta’na taviniraa i roto i te Ekalesia. Ua tavini oia ei faata’i piana no te paraimere i te 12raa o te matahiti, e ei peresideni no te Haapiiraa Sabati i te 16raa o to’na matahiti. Ua ohipa tamau noa oia i roto i te mau ohipa a te autahu’araa a Aarona.

« Na roto i taviniraa i roto i te Ekalesia », ma te apiti atu i to’na metua tane ei episekopo e ei peresideni amaa, « ua tauturu te reira ia’u ia roaa to’u iteraa papû », te na reira ra oia.

Ua roaa i te Episekopo Caussé te parau tu’ite master no te ohipa putu faufaa i te fare haapiiraa ESSEC Business i Farani i te matahiti 1987. Na mua a’e a haamata ai oia i to’na toro’a, ua tavini oia i roto i te Nuu Reva no Farani, e ua tonohia oia i roto i te hoê piha faatere a te OTAN.