Brian K. Ashton

Tauturu piti i roto i te peresideniraa rahi no te Haapiiraa Sabati

Ua piihia te taea’e Brian K. Ashton no te tavini i roto i te peresideniraa rahi no te haapiiraa Sabati i muri noa iho i te faaotiraa oia i ta’na taviniraa ei peresideni no te misioni no Texas Houston Apato’a. Ua faaarahia te piiraa i te ava’e tiunu ra, e ua paturuhia oia i roto i te amuiraa rahi no atopa 2015.

O te taea’e Tad R. Callister noa â te peresideni rahi, e te taea’e Devin G. Durrant, tei tavini na ei tauturu piti mai te ava’e eperera 2014 ra, ua riro mai ïa ei taututu matamua.

Ua vata te hoê ti’araa i roto i teie peresideniraa i te mea e, ua piihia o John S. Tanner ia tavini ei peresideni no te fare haapiiraa tuatoru no Brigham Young University–Hawaii.

Ua fanauhia o Brian Kent Ashton i Provo, Utaha, Marite, i te matahiti 1969, ia Kent e o Vicki Brown Ashton. Oia te matahiapo no na tamarii e iva. Te haamana’ o nei oia i to’na na metua ei nau orometua haapii tamau i te evanelia i roto i te utuafare.

Ua tavini te taea’e Ashton i te hoê misioni rave tamau i roto i te misioni no Peru Lima Apato’a. Ua rave oia i te faaotiraa e tavini na roto i te tauturu a te hoê hoa maita’i tei faauruhia ia parau ia’na e, e mea ti’a ia’na ia tavini i te hoê misioni. I te faaiteraa mai to’na hoa i to’na mau mana’o, ua farii o Brian i te haapapûraa a te Varua. I roto i ta’na misioni, ua farerei oia i te tahi mau fifi rahi i te pae no te ea, i reira to’na piiraahia ei peresideni no te hoê amaa rahi. I taua taime ra, ua pure pinepine tamau oia no te ani i te tauturu i te Metua i te Ao ra. « Ua haapii mai au ia ti’aturi i ni’a Ia’na, e ua rave Oia i te mea ta’u i tia’i », te na reira ra oia. « Te haapiiraa ia ti’aturi Ia’na, te reira ïa tei faatupu i te taa-ê-raa ».

I muri a’e i ta’na misioni, ua haere oia i te haapiiraa i Brigham Young University, i reira to’na mâtauraa i ta’na vahine, o Melinda Earl. Tera râ, hou a faaipoipohia ai raua, ua tavini teie tuahine i roto i te misioni no Malaga i Paniora, a rave ai ïa te taea’e Ashton i te ohipa i te mau pae ropû no Marite. I muri a’e i te misioni a te tamahine, ua faaipoipohia raua i roto i te hiero no St. George i Utaha. E hitu tamarii ta raua.

Ua farii te taea’e Ashton i te parau tu’ite no te faatereraa i te ohipa puturaa faufaa i te fare haapiiraa no Harvard, are’a te tuahine Ashton, ua haere oia i te haapiiraa utuuturaa ma’i. E fatu ohipa te taea’e Ashton e ua haamau oia e rave rahi taiete ohipa.

Ua tavini na te taea’e Ashton ei episekopo, ei melo apooraa teitei, ei peresideni pupu peresibuero, e ei orometua haapii no te piha feia paarii.