Te horo’araa i te tauturu i te tîtîhoria (réfugié)

Te tamau noa nei te faanahoraa LDS Charities, te rima tauturu a te Ekalesia, i te horo’a i te tauturu i te mau fenua ua topa te mau taata e rave rahi i roto i te ati na roto i te mau fifi rau tei tupu. Teie e toru hi’oraa :

Na roto i te tama’i i rotopû i te Rusia e te nuu Ukraine, hoê mirioni taata tei reva ê mai te matahiti 2014 ra. Ono ahuru i ni’a i te hanere o te mau taata tei reva ê i te fenua e mau ruhiruhia. Ua toro atu te LDS Charities i to’na rima i te Faanahoraa Faahoturaa a te Hau Amui, no te tahoê i roto i te ohipa tautooraa e te mau pupu e ere na te hau e vai ra i tera iho fenua, no te utuutu i te feia veve e te ruhiruhia tei reva ê i te fenua. Ua horo’a te LDS Charities i te mau tauhaa tamâ, te mau afata haumitiraa e te maa no te roaraa e toru ava’e i e 37 vahi, no te rahiraa e 13 000 taata.
Mai te ava’e tenuare mai, ua hau i te 350 000 tîtîhoria tei faaru’e i to ratou fenua no te horo ê i te tama’i i Siria, e ua imi i te faaearaa i Europa, e te mana’ohia ra e, e tata’i piti taua numera ra i te hopea o te matahiti. Te apiti nei te LDS Charities i te mau pupu e ere na te hau, na te ao ato’a nei, i te mau apooraa oire, e i te mau pû a te hau i te fenua iho no te pahono i te mau hinaaro o teie mau tîtîhoria, e te horo’a nei i te mau rave’a i te mau amuiraa a te Ekalesia no te fenua iho no te faaohipa i roto i ta ratou mau tautooraa.
No te horo’a i te haapûraa maita’i a’e i roto i te mau puhaparaa tîtîhoria na te ao ato’a nei, te amui nei te LDS Charities i roto i te hoê opuaraa a te Tomite Rahi a te mau Hau Amui haapa’o i te tîtîhoria. Ua faanaho te hoê taiete hoo tauhaa na te ao ato’a nei i te hoê hoho’a fare maita’i a’e ia faaauhia i te mau fare ie. I roto i taua hoho’a fare ra, te vai ra te mau opani e te mau haamaramarama o te horo’a mai i te parururaa maita’i a’e, e tae noa’tu i te tapo’i fare paari no te paruru i te taata i te mau fifi o te natura. Te faaineinehia maira e 333 fare ta te LDS Charities i horo’a no te hoê puhaparaa tîtîhoria i Iraqi Kurdistan.