Ko Ha Temipale ʻi he Tafaʻaki ʻe Taha ʻo Māmaní

Robin Estabrooks, Veisinia, USA

Naʻá ku kau ki he Siasí ʻi hoku taʻu hongofulu tupu lahí, ka naʻe ʻikai ke loto ki ai hoku fāmilí. Hili e mālōlō ʻeku tangataʻeikí ʻi hoku taʻu 20 tupú, naʻá ku kamata ngāue ki heʻeku hisitōlia fakafāmilí. Naʻe ʻikai fuoloa mei ai, naʻá ku hoko ko ha uaifi femoʻuekina mo ha faʻē ki ha fānau iiki, pea tuku ai e ngāue ki he hisitōlia fakafāmilí.

Koeʻuhí naʻe ʻikai ke Siasi haku fāmili, naʻá ku maʻu ai ha loto-holi ke fekumi ki heʻeku hisitōlia fakafāmilí. Naʻá ku saiʻia ʻi hono fai iá pea naʻá ku fakaʻamu maʻu pē ke maʻu ha taimi lahi ange ke ngāue ki ai.

ʻI hoku taʻu 33, naʻe hoko ha meʻa taʻeʻamanekina ʻi he fakaʻau ke kovi ange ʻeku moʻui leleí. Naʻá ku lava ʻo kaka moʻunga mo hoku fāmilí kimuʻa, ka naʻe fakaʻau ke faingataʻa e luelue pē ʻi homau feituʻú. Naʻe ʻikai te u kei lava e fakamaau fale houa ʻe ua ʻi he ʻaho Tokonakí, pea naʻá ku fiefia pē kapau te u lava ʻo vekiume. Naʻe tokolahi hoku kaungāmeʻá, ka ko ʻeni kuo tokosiʻi koeʻuhí naʻe ʻikai te u kei lava ke feohi mo kinautolu ʻo hangē ko ia ne u faʻa fai kimuʻá.

Ko e taimi ʻení naʻá ku kamata ke toe fakahoko ai e hisitōlia fakafāmilí. Naʻe kamata fakatotolo ʻe heʻeku tama fefiné ʻa e tafaʻaki ʻene tamaí peá ne fakakakato e ngāue ne laui taʻu ʻeku ngāue ki aí ʻi ha pō pe ʻe taha. Ne u fakakakato ha ngaahi toʻu tangata ʻi heʻeku tafaʻakí pea fakahū e ʻū hingoá ki he temipalé ke fakakakato e ngāué. Ne u fakaʻamua maʻu pē ke u fakafofongaʻi hoku fāmilí ʻi he ngāue fakatemipalé, ka naʻe ʻikai ke lava koeʻuhí ko ʻeku tuʻunga moʻui leleí mo e fuʻu mamaʻo mei he temipalé.

Ne kamata ke u tangi hili hono fakahū e ʻū hingoá, he naʻá ku ongoʻi hangē kuo ʻikai ke u tokanga ki hoku fāmilí koeʻuhí ʻe ʻikai te u ʻi ai mo kinautolu ʻi he ʻaho makehe ko ia ʻe fakahoko ai e ouau maʻanautolú. ʻI heʻeku hū ki he polokalama FamilySearch.org hili ha uike ʻe taha mei ai ke vakaiʻi e tuʻunga ʻo e ngāue fakatemipalé, ne u vakai ki ha meʻa fakaofo. Naʻe ʻikai ngata pē ʻi he kakato e ngāué, ka naʻe fakahoko e ngāué ʻe he kāingalotu ʻi he Temipale ʻAkalā Kaná! Ne u ʻohovale ke vakai ki hono fakakakato ʻe he kāingalotu ʻi he tafaʻaki ʻe taha ʻo e māmaní e ngāue fakatemipale maʻa hoku kiʻi fāmilí. Ne u toe tangi ʻi heʻeku fakakaukau ki he ngaahi feilaulau naʻe fai ʻe he kakai ʻi Kaná ke fononga ki he temipalé maʻa hoku fāmilí. ʻOku ou mātuʻaki houngaʻia ʻi he kāingalotu ko ia ʻo e vāhenga Temipale ʻAkalā Kaná ʻi heʻenau fai ʻa ia naʻe ʻikai te u lavá: ʻalu ki he temipalé ʻo fakahoko maʻa hoku fāmilí ʻa e tāpuaki ʻo e ngaahi ouau fakatemipalé.